Daniel Cueli asoleya na rede un censu de los llavaderos del conceyu de Cabranes

La Rede de Museos Etnográficos d’Asturies ta acabante asoleyar nel so repositoriu dixital un nuevu trabayu del etnógrafu Daniel Cueli “Llavaderos. Censu del Conceyu Cabranes”. Na obra, l’autor fai estudiu de tolos llavaderos de Cabranes, apurriendo tolos datos posibles y semeya del so estáu actual. Daniel Cueli ye’l director de la revista “N’ast, cartafueyos d’ensayu” y autor de dellos trabayos nel campu de la etnografía, incluyendo unu asemeyáu a esti pero dedicáu a los llavaderos del conceyu de Sariegu. L’orixe d’esti censu ta nun estudiu que fizo nel añu 2011 y qu’apaeció asoleyáu na revista d’etnografía Asturies, memoria encesa d’un país: “Llavaderos na Comarca de la Sidra, Piloña y Siero”. Esti trabayu, xurdió del so interés "por poner en valor unes construcciones que nos sieglos XIX y XX xugaron un papel perimportante, meyorando enforma les condiciones de les muyeres na dura xera de llavar la ropa, pero poco reconocíu, polo menos dende’l puntu de vista académicu". Y ye que según esplica Cueli "hasta esi momentu malapenes esistía bibliografía específico sobre estes construcciones n’Asturies, namás que referencies que nun pasaben d’unes poques llinies n’obres xenériques sobre etnografía, arquiteutura popular o sol papel de la muyer na sociedá tradicional asturiana". L'estudiu inicial asoleyáu n'Asturies memoria encesa d'un país, fízose sobre la base d’un estensu trabayu de campu llevó al autor a visitar más de cien llavaderos nel ámbitu territorial acutáu pa facelu, pero nun incluyía un censu d’estes construcciones. "Esti fechu llevóme, precisamente pa completalu dafechu, a dir censando, pali que pali, toles construcciones esistentes y d’ehí esti documentu, que recueye’l censu llavaderos del Conceyu Cabranes y que vien a amestase al yá iguáu del Conceyu Sariegu", esplica l'autor. Cueli comenta nel entamu del estudiu que los llavaderos de Cabranes tienen un estáu de conservación "regular, llegando a alcontrase construcciones en mui bon estáu pero tamién exemplares fechos una llaceria". En total, caltienense ventiséis, repartíos per toles parroquies cabraniegues, anque, esplica Cueli "la mayoría concéntrense, como ye lóxico, nes de más población, distribuyéndose de la manera que vien darréu: ocho en Torazu, siete en Fresnéu, cinco en Santolaya, trés en Pandenes, dos en Viñón y namás qu’ún na de Graméu". Documentación: L’etnógrafu Daniel Cueli asoleya un censu de llavaderos de Sariegu Más información: Descarga'l llibru de baldre Fonte: Asturnews

Conferencies en Cabranes pol centenariu de Xosefa Canellada

Pola mor del centenariu del ñacimientu de la filóloga y escritora María Xosefa Canellada, el Conceyu de Cabranes, en collaboración col Seminariu de Filoloxía Asturiana de la Universidá d'Uviéu, organiza unes conferencies na Casa la Cultura-Centru de Llectura de Santolaya (Cabranes). Los actos van entamar el vienres 19 d’ochobre.

Xulio Viejo Fernández, profesor de la Universidá d'Uviéu y miembru del Seminariu de Filoloxía Asturiana va falar el vienres día 19 d'ochobre a les 19,30 hores de l’autora, na conferencia titulada "María Xosefa Canellada: investigación y compromisu".

El vienres siguiente, 26 d'ochobre a les 19,30 hores, el profesor de la Universidá d'Uviéu, Ramón d'Andrés dará llectura a la conferencia "Lo que pensaba María Xosefa Canellada de la normalización del asturianu”.

Les xornaes van rematar el miércoles 31 d'ochobre a les 19,30 hores con "Obra lliteraria de María Xosefa Canellada: la ética nel canon lliterariu", por Pilar Fernández, profesora del Institutu "Pérez de Ayala" d'Uviéu.

La entrada a toes elles ye llibre.

Fonte: Asturnews