L’aplicación de Wikipedia p’Android va tar n’asturianu y munches llingües más gracies a la comunidá asturiana

Wikipedia p’Android va tar n’asturianu

 “El trabayu d’una llingua pequeñina beneficia a millones de persones”, señalen dende la comunidá asturiana de Wikipedia tres consiguir desbloquiar una situación que nun permitía tornar l’aplicación p’Android a los idiomes con códigu de trés lletres. Na actualización próxima va tar n’asturianu dafechu.

 Los miembros de la comunidá de la Wikipedia n’asturianu atoparon un problema a la hora de trabayar na torna de l’aplicación p’Android, que nun contaba con versión n’asturianu. Ésti consistía en que la platafoma Translatewiki nun permitía guardar el llabor fechu de traducción al nun almitir les llingües con locale de trés lletres, como tien el nuesu idioma: ‘ast’.

 “Treslladamos-y un informe fallu, yá qu’Android reconoz los códigos de trés lletres dende va un par d’años, miráronlu y dieron el preste”, espliquen dende la comunidá asturiana de Wikipedia, arguyosa pol fechu de que “el trabayu d’una llingua pequeñina beneficia a millones de persones”. Y ye qu’agora cualquier idioma con locale de trés lletres va poder facer la torna de l’aplicación p’Android de Wikipedia.

 Hai que destacar qu’esta aplicación yá ta disponible n’asturianu pa iOS, el sistema operativu de los iPhone, tres laincorporación del asturianu al CLDR, la base de datos llingüística que naz d'un consorciu de les empreses con más pesu nel terrén informáticu, ente les que ta Apple. Ello consiguióse esti branu gracies a un llabor de cinco años de Softastur, la comunidá asturiana que trabaya pa tornar software llibre al nuesu idioma.Fonte: asturies.com

La llingua asturiana yá ta presente en CLDR como un idioma más

por Pablo R. Guardado

La base de datos llingüística cola que trabayen les empreses informátiques más importantes como Google, Apple o Microsoft, yá acepta a la llingua asturiana. "Ye un pasu tan importante como consiguir el locale 'ast'", espliquen dendeSoftastur, la comunidá asturiana d'usuarios que trabaya pa tornar software llibre al nuesu idioma.

Tres cinco años de trámites col Proyeutu CLDR (Common Locale Data Repository), finalmente l'asturianu ta incluyíu nesta base de datos llingüísticu que naz d'un consorciu de les empreses con más pesu nel terrén informáticu y que ye "la infraestructura qu’usen Google, Libreoffice, Apple, Windows, IBM, Twitter, ente otres empreses, nel so software". Sicasí, esto nun significa que, por exemplu, Windows incorpore'l nuesu idioma nes sos versiones nueves, yá qu'esta decisión depende de Microsoft, anque sí facilita a la llingua asturiana tar presente en munchos productos, programes y aplicaciones.

"Nun ye fácil dar esti pasu, que ye tan importante como lo foi consiguir el locale 'ast', yá que los responsables del Proyeutu CLDR son mui esixentes", espliquen dende Softastur, que pon como exemplu'l problema que tuvieron hai cuatro años col alfabetu. "Mandamos-yos de l'A a la Z, incluyendo la h aspirada y la che vaqueira, y ellos respondiéronnos que nun esistíen tomando como referencia un llibru vieyu de Xuan Xosé Sánchez Vicente. Tuvimos que ponenos en contautu con elli pa que-yos unviara un escritu n'inglés nel que-yos esplicaba que la normativa cambiara nesti tiempu y que dambes lletres sí yeren correutes", espliquen.

Amás, el procesu pa incorporase a la base de datos ábrese cada seis meses, lo que ralentiza'l mesmu. Finalmente, ésti yá terminó y l'asturianu ye una llingua más nesta base de datos qu'incorpora'l nome de la llingua, del territoriu, los díes de la selmana, mes, añu, periodu del día completu y abreviáu, nomes de los fusos horarios, estayes xeográfiques, les divises, patrones de data y d’hora y conxuntos de caráuteres usaos pa la escritura de la llingua, ente otros. "Evidentemente, esto uniformiza una bayura de términos, como por exemplu los nomes de capitales, países, etc.", apunten dende Softastur.

Asturianizador de Windows

Ún de los próximos avances que podría tener el nuesu idioma gracies a esta incorporación al CLDR podría ser un 'Asturianizador' pa Windows gracies a la collaboración de Softastur con Softcatalà, coleutivu que tien desendolcáu un 'Catalanitzador'. Ésta ye una ferramienta mui cenciella que, nel casu de nun tener Windows en catalán, permite al usuariu cambiar el sistema operativu a esti idioma y tolos programes y aplicaciones esistentes en llingua catalana usando un asistente.

Semeya de Josep M, de Softcatalà.                                                                                                 Fonte: Asturies.com