La llengua asturiana, més a prop de l'oficialitat?

Tot i l’amenaça de pluja, unes 2.000 persones van recórrer els carrers d’Oviedo durant el vespre d’aquest divendres, en el marc del Dia de les Lletres Asturianes i amb un objectiu comú, aconseguir l’oficialitat d’aquesta llengua.

Com estava previst, en el marc de la celebració, l’entitat organitzadora, la Xunta Pola Defensa de la  Llingua Asturiana, va donar a conèixer el seu pla per forçar una reforma de l’Estatut que permeti a la llengua asturiana accedir al rang de llengua cooficial en aquest territori.

El pla passa per aconseguir el suport d’una quarta part dels diputats de la cambra asturiana -12 de 45-, xifra necessària per començar els treballs de la reforma. De moment, tot i no transcendir el nom ni els partits que farien el pas, la presència de membres de Izquierda Unida i Podemos a la manifestació, que sumen 14 parlamentaris a la Junta General, dóna a entendre que aquests partits serien els que defensarien la proposta de reforma.

Ara bé, segons declaracions de Xosé Candel, representant de la Xunta Pola Defensa, la presència de càrrecs locals del PSOE a la manifestació són “detalls” que indiquen que aquest partit podria modificar el seu posicionament “monolític” sobre l'oficialitat. Entre aquests “detalls” hi hauria també el suport a l'oficialitat dels regidors socialistes de Bimenes, o el vot favorable a les ordenances municipals de l’asturià a Avilés, governat pel PSOE.

Banda de gaiters

La manifestació, encapçalada per una banda de gaiters i amb presència també de tots tipus d’entitats i organitzacions culturals, a més de sindicats, va recórrer el centre d’Oviedo per finalitzar davant el Teatre Campoamor, on va tenir lloc l’acte institucional de la diada, organitzat per l’Academia de la Llingua.

Segons l’organització hi van participar unes 2.000 persones, 400 segons la Policía Local, sota el lema 'L'asturianu llingua oficial. El futuru nes nueses manes'. Una tempesta va remullar Oviedo just abans de l’inici de la manifestació, però va respectar el recorregut de la mateixa. Durant la marxa, en un ambient tranquil i festiu, es van cridar consignes a favor de l'oficialitat de la llengua asturiana.

La reivindicació de l'oficialitat és una demanda recurrent de part de la societat asturiana, que veu com l’estatus de la seva llengua s’ha quedat, potser de forma permanent, a un pas de l'oficialitat, ja que la vigent Llei d’ús i promoció del bable/asturià, del 1998, garanteix el dret dels ciutadans a utilitzar-la i avala la validesa en les comunicacions amb les institucions asturianes, i el mateix Estatut d’Autonomia, al seu quart article afirma que “el bable gaudirà de protecció” i que “es promourà el seu ús, la seva difusió en mitjans de comunicació i el seu ensenyament”, apuntant, això sí, que “es respectarà en tot cas les variants locals i la voluntarietat en el seu aprenentatge”.

Fonte: ElNacional.cat

Cano emponderó’l “papel que la muyer xuega nel procesu hestóricu de caltenimientu y recuperación de la llingua”

por Pablo R. Guardado

Ana María Cano nun quixo entrar en temes políticos nel so discursu institucional pol Día de les Lletres Asturianes –anque dexó cayer delles crítiques– pa centrase nel Premiu Nacional de Lliteratura Asturiana, que recibió Xuan Bello, y l’homenaxe que l’ALLA fixo a la muyer pol so llabor na recuperación y caltenimientu del idioma.

Estos dos fechos centraron tamién l’actu d’esti añu nel Teatru Campoamor de l’Academia de la Llingua Asturiana (ALLA), nel que nun hebo nomamientos d’académicos nuevos. Con un patiu de butaques práuticamente enllenu nesta ocasión y cola presencia d’autoridaes del mundu políticu, cultural y social del país –finalmente, como s’esperaba, el presidente Javier Fernández nun acudió–, los miembros de l’ALLA xubieron al escenariu pel pasiellu central al son d’una gaita tres un entamu musical a cargu de Mariluz Cristóbal y la vigulinista Bárbara González-Quevedo.

Sonia Avellaneda y Próspero Morán conduxeron l’actu, que va pasar a la historia por ser el primeru nel que s’entrega’l Premiu Nacional de Lliteratura Asturiana. La presidenta Cano encargóse d’entregar el medallón conmemorativu, obra d’Adolfo Manzano, y una edición artesanal con una antoloxía de la so obra a Xuan Bello ente fuertes aplausos

Política llingüística “de verdá”

Tres el discursu de Bello, xubió al atril Cano, que tres saludar y agradecer la presencia del públicu, señaló que “llueu de la esperiencia del últimu añu –y na Academia’l tiempu mídese del Día de les Lletres d’un añu al Día de les Lletres del añu viniente– sedría pa min perfácil empobinar esti discursu per un camín de xusta crítica al gobiernu d’Asturies no que fai a la política de so rellacionada con esta institución y cola llingua milenaria d’esti pueblu. Pero non, güei nun voi falar de la situación pela que, apocayá, pasó l’Academia de la Llingua Asturiana y que punxo en peligru’l so propiu y fundacional calter como muérganu de normativización y tutela de los derechos llingüísticos de los asturianos y asturianes, y hasta la so mesma sobrevivencia como institución pública del Principáu”.

Tampoco nun quixo “falar de la política llingüística que se vien desendolcando n’Asturies de magar entamó esta llexislatura, una política llingüística ‘invisible’ nos sos llogros”, magar que “podría facelo y llargamente”, porque “güei axúntennos equí dos fechos d’una enorme importancia simbólica y qu’ameriten, ensin dulda, que fixemos la nuesa atención y procuru nellos. Refiérome, per un llau, a la concesión del ‘Premiu Nacional de Lliteratura Asturiana’, na so primer edición, al escritor Xuan Bello y, per otru, al Homenax que l’Academia quier facer al papel de la muyer nel procesu de caltenimientu y recuperación de la llingua asturiana”.

Asina, calificó a Bello como “un escritor d’una importancia ensin precedentes pa les nueses lletres”, al que calificó como’l “más universal” dende qu’espublizare ‘Historia universal de Paniceiros’. Sicasí, Cano quixo recordar la so primer obra, ‘Nel cuartu mariellu’, asoleyada nel 1982 cuando’l premiáu tenía 16 años: “García Arias supo ver qu’aquellos versos podíen ser el formientu d’una gran obra lliteraria y, como davezu, acertó”.

“Lo que fai universal una obra lliteraria nun ye que la llingua na que ta escrita seya importante o non, que seya grande o pequeña, que la fale muncha o poca xente. Lo que realmente la fai universal ye’l so valir y la calidá lliteraria; porque esto ye lo que trescala y tresciende’l tiempu y les llendes xeográfiques”, apuntó darréu la presidenta de l’ALLA, qu’aguarda que “Xuan Bello siga per munchu tiempu escribiendo páxines máxiques nel llibru de la lliteratura asturiana”. Porque “el procesu de recuperación llingüística ye responsabilidá de toos y de toes y caún de nós tien de cumplir el so llabor: los escritores xenerando una lliteratura de la meyor calidá; l’Academia cumpliendo’l so llabor normativu, tutelar y d’investigación con independencia y rigor; los medios de comunicación emplegando l’asturianu con normalidá dafechu; el sistema educativu tresmitiendo la llingua y la cultura del país… Y los políticos faciendo política llingüística; política llingüística de verdá”.

Les muyeres y la lliteratura

L’otru fechu que l’ALLA quixo destacar esti Día de les Lletres Asturianes foi “el papel que la muyer xuega nel procesu hestóricu de caltenimientu y recuperación de la llingua del Pueblu Asturianu”. L’homenaxe tuvo presente “dende’l cartel anunciador, hasta l’actuación de güei del Grupu ‘Muyeres’, pasando pel esceicional númberu, en cuantes a conceición y calidá, de la revista ‘Lliteratura’ qu’axunta a muyeres escritores n’asturianu como son Pilar Arnaldo, Lourdes Álvarez, Ángeles Carbajal, Iris Díaz Trancho, Elisabet Felgueroso, Raquel F. Menéndez, Sabela Fernández, Yolanda Fidalgo, María José Fraga, Esther García López, Aurora García Rivas, Carmen Gómez Ojea, Irma González-Quevedo Pedrayes, Vanessa Gutiérrez, María Xesús Llope, Marisa López Diz, Laura Marcos, Claudia Elena Menéndez Fernández, Marta Mori, Berta Piñán, Esther Prieto, Susana Sela, Paquita Suárez Coalla, Ana Vega o Consuelo Vega”.

“Prúyenos rindir homenax a esa muyer, a la que supo tresmitir la llingua a les nueves xeneraciones, a les madres y a les güeles que nos añaron y nos deprendieron a ver el mundu y a entendelu dende la propia llingua y que pasaos los años, na recta final yá, siguen col mesmu enfotu añando y deprendiendo a los nietos les coses de la vida; y a la muyer que supo y sabe asumir en momentos perabegosos la responsabilidá y les consecuencies apareyaes de la defensa ensin resquiebres de lo que-y pertenez por derechu”, señaló Cano, que citó a Xosefa Xovellanos, Enriqueta González Rubín o María Teresa González, ente otres muyeres escritore y investigadores, ensin escaecer a les autores del Navia-Eo. “Porque yera una cuestión de xusticia, porque asina lo sentimos na Academia y porque la que vos fala ye una muyer que tien como mayor honor, de toles sos xeres desempeñaes, el ser Presidenta de l’Academia de la Llingua Asturiana”, finó pa depués lleer unos versos de Lurdes Álvarez y glayar “¡Puxa oficialidá! ¡Puxa Asturies!”.

La llectura d’una esbilla de poemes del númberu especial de ‘Lliteratura’ y l’actuación de Muyeres, con una adautación musical y escénica de ‘País Malva’ pa la ocasión, punxeron el ramu al actu académicu.

Fonte: Asturies.com

“Nun queremos acabar la llexislatura ensin aprovechar la oportunidá d’echar a andar una reforma estatutaria”, señala Candel

Manifestación pola oficialidá 2016

 La Xunta pola Defensa de la Llingua Asturiana (XDLA) entama esti vienres, con motivu del Día de les Lletres Asturianes, una manifestación pa reclamar la oficialidá del idioma. Como novedá, va presentar el ‘Proyeutu 2018 pa la Oficialidá’, que busca echar a andar una reforma del Estatutu al tener los sofitos suficientes.

 “P’aniciar una reforma estatutaria hai dos víes: que lo soliciten los conceyos o una cuarta parte del Parllamentu, esto ye 12 diputaos”, esplica Xosé Candel, de la XDLA, qu’asegura que cuenten “con un compromisu pa superar esa cifra de 12 diputaos cola que poder echar a andar dicha reforma”. Ensin querer citar quiénes apoyaríen usar la vía del artículu 56.1, recuerda que “hai trés partíos na Xunta Xeneral que sofiten la oficialidá de distinta manera”, esto ye Podemos (9), Izquierda Xunida (5) y Foro (3), calcando en que la suma de diputaos favoratibles “ye mayor de 12”.

 Candel reconoz qu’esti procesu nun asegura algamar los 27 diputaos necesarios pa reformar l’Estatutu, pa lo que sería necesariu l’apoyu de la FSA-PSOE, pero destaca que “nun queremos acabar la llexislatura ensin aprovechar la oportunidá d’echar a andar una reforma estatutaria y abrir alderique. Ye la primer vez que la Xunta Xeneral tien na mano aniciar un procesu de reforma ensin nengún de los partíos hasta agora mayoritarios”. P’algamar l’oxetivu final, la oficialidá del idioma, dende  la XDLA apunten como mui necesario “contar con una importante movilización social”, esperenando un apoyu civil asemeyáu o superior a les de les anteriores veces que se punxo sobre la mesa la reforma del Estatutu.

 De momento, la fueya de ruta va siguir, tres l’anuncia prevista na manifestación, con reuniones cola FSA-PSOE y Ciudadanos pa treslladar el proyeutu. La intención de la XDLA ye que l’apertura del procesu comience enantes de mayu de añu qu’entra, “siempre que se pueda entamar un debate seriu y con garantíes”, asegura Candel.

Salida a les 19.30 hores

 La manifestación ‘L’asturianu llingua oficial. El futuru nes nueses manes’ va partir a les 19.30 hores d’esta tarde de la Estación del Norte (Renfe) d’Uviéu, pa finar frente al Teatru Campoamor, onde a les 20.30 hores va dar comienzu l’actu de l’Academia de la Llingua Asturiana pol Día de les Lletres Asturianes. Organizaciones polítiques, sindicatos y asociaciones sofiten esta marcha pa reclamar los derechos llingüísticos de los asturianos y asturianes.                                                                                                  Fonte: asturies.com

La XDLA echa andar la iniciativa “Proyeutu 2018 pa la Oficialidá” y convoca manifestación del Día de les Lletres Asturianes

Al tiempu que convocaba pa esti vienres 5, a les 19,30 hores, dende la Estación del Norte d’Uviéu,a la so añal manifestación col llema de “L’asturianu llingua oficial. El futuru nes nueses manes”, la XDLA facía anuncia d’una iniciativa pa echar a andar la reforma del Estatutu d’Autonomía al traviés del artículu 56.1.La organización anunciaba esti miércoles la puesta en marcha d’una iniciativa pa echar a andar la reforma del Estatutu d’Autonomía al traviés del artículu 56.1, al mesmu tiempu que facía anuncia de la iniciativa yá cuenta col compromisu de más d’una cuarta parte de los diputaos y diputaes.

La Xunta pola Defensa de la Llingua Asturiana (XDLA) vieno acabante convocar tamién la manifestación col llema “L’asturianu llingua oficial. El futuru nes nueses manes”, esti vienres 5 de mayu, Día de les Lletres Asturianes, a les 19,30 hores, dende la Estación del Norte d’Uviéu.

Na manifestación va dase anuncia del “Proyeutu 2018 pa la Oficialidá”: un proyeutu pa echar a andar una reforma estatutaria al traviés del Artículu 56.1. Pa eso, contamos col compromisu d’un grupu, ampliu y plural, de más d’una cuarta parte de los diputaos y diputaes (cantidá mínima pa entamar un procedimientu de reforma estatutaria).

Pela primer vez na historia contemporánea d’Asturies, diz la Xunta pola “tenemos ente nosotros una oportunidá real p’abrir una reforma del Estatutu d’Autonomía d’Asturies, a costafecha pa incluyir la oficialidá del asturianu. Ye la primer vez que la Xunta Xeneral tien na mano aniciar un procesu de reforma ensin nengún de los partíos hasta agora mayoritarios”.

La convocatoria de la manifestación fina diciendo que “ye’l momentu de demostrar que’l futuru ye nuesu, que ta nes nueses manes”. El déficit democráticu que ta suponiendo la negación de los derechos llingüísticos de la ciudadanía asturiana a lo llargo de más de 30 años tien qu’acabar”.

Fonte: Asturnews

La ESAD homenaxa a la Compañía Asturiana de Comedias nesta Selmana de les Lletres Asturianes

Sergio Buelga va dar una charra al alumnáu sobre'l teatru popular asturianu y va representase 'Que nun se pierda nel aire'.

Al igual que fixera l'añu pasáu, la Escuela Superior d'Arte Dramáticu (ESAD) va entamar una xornada con motivu del Día de les Lletres Asturianes nos díes previos a la celebración. Nesta ocasión decidió homenaxar a la Compañía Asturiana de Comedias y a la so trayeutoria centenaria.

Pa ello, conviden a Buelga pa falar al alumnáu sobre'l teatru popular asturianu. Darréu, los propios estudiantes van representar 'Que nun se pierda nel aire', dramaturxa de Leopoldo García-Pumarino a partir de microrrellatos de Carmen Gómez Ojea, Miguel Allande, Paula Pulgar y Carlos Rubiera.

L'actu va tener llugar mañana vienres, a partir de les 12.30 hores, nel xixonés Teatru Alejandro Casona.                                                                                       Fonte: asturies.com

“N’otres comunidaes sería impensable que nun asistiera’l so presidente al Día de les Lletres”, diz Cano

• . Xuan Bello lleva’l primer Premiu Nacional de Lliteratura Asturiana

Esti miércoles na sede de l’Academia de la Llingua Asturiana (ALLA) presentóse’l XXXVIII Día de les Lletres Asturianes, que se va celebrar el prósimu 5 de mayu a les 20.30 hores y nel que, como ye vezu, ta convidáu’l presidente Javier Fernández. Xuan Bello va recibir el Premiu Nacional de Lliteratura Asturiana.

Ésta ye la principal novedá de la Xunta estraordinaria de l’ALLA, que nesta ocasión nun va acoyer el nomamientu d’académicos nuevos. D’esta manera, prémiase una trayeutoria d’un escritor o escritora, cola fin de dar visibilidá a la lliteratura fecha en llingua asturiana.

El gallardón, que va ser triañal, va recibilu nesta primer edición Bello. Va consistir nun medayón conmemorativa fecha por Adolfo Manzano n’esclusiva, que representa’l tueru d’un árbol inspiráu nel texu milenariu de Bermiego per un llau, y pel otru, la Cruz de la Victoria y el nome del ganador. Amás, va espublizase una edición artesanal con una antoloxía del escritor de Paniceiros, obra del diseñador Monchi Pedreira, de Signum.

Ana María Cano, presidenta de la institución académica, y Xosé Antón González Riaño, vicepresidente, encargarónse d’anunciar tolos detalles d’una gala na que s’espera la presencia d’autoridaes de la política y cultura del país. Ente ellos ta convidáu, como tolos años, el presidente d’Asturies, anque nun s’espera la presencia de Javier Fernández el vienres nel Campoamor.

“N’otres comunidaes sería impensable que nun asistiera’l so presidente al Día de les Lletres”, aseguró Cano al ser entrugada por esta cuestión. Faciendo memoria, sí apuntó que Fernández sí asistiera nel pasáu al actu, pero nunca como presidente, y que l’únicu que sí asistió “en funciones foi Pedro de Silva”.

Actuación de Muyeres

Amás de la entrega del Premiu Nacional de Lliteratura Asturiana, y del siempre esperáu discursu institucional de Cano, va celebrase un entamu musical, de nome ‘Caleyucu’, a cargu de Mariluz Cristóbal y Bárbara González Quevedo, y la llectura d’un esbilla de poemes de la revista númberu 33 de ‘Lliteratura’, dedicada nesta ocasión a les autores asturianes.

Va encargase de zarrar l’actu, Muyeres, que van facer una adautación musical y escénica de ‘País Malva’ pa la ocasión.                                                                          Fonte: asturies.com

Oríxenes, xunidá y diversidá

Xuan Porta

Europa foi nomada asina per primer vegada fai 3000 años. De mou que ye muncho más antigua que les sos naciones. La so xunión caltendría la fuercia del continente y la so diversidá. Europa, amás exerció del so orixe un focu universalizante empobináu al xéneru humanu. Tampoco nun ye un aparatu modernu, económicu o políticu, sinón que ye un idegal milenariu dende l’antigua Grecia. Atoparemos a Europa faciendo por ella, non nel sen del mercáu sinón nel de los sos xenios universales.

El primeru que punxo’l nome a Europa foi’l griegu Hesíodu nel añu 900 enantes de la nuesa era. Afitó que yera una diosa oceánida. Y el primer argumentu como xunidá y sentíu d’europeos que la defenden foi na dómina del Imperiu carolinxu, col que’l Reinu d’Asturies caltuvo rellaciones.

La llingua asturiana ye milenaria. Surdida del estáu más antiguu de la Península Ibérica. La xunidá na diversidá europea de la que somos parte entá nun se respeta nesti llau del continente. Entá nun se cumplen  los drechos llingüísticos que puxen pola oficialidá del nuesu idioma, nuna nidia discriminación coles otres autonomíes con llingües propies.

Europa apúrremos ferramientes como la Carta Europea de les Llingües Rexonales o Minoritaries. N’Europa hai 40 millones de falantes de les 30 llingües minorizaes na Xunión Europea según la UNESCO. Nesta carta nel so artículo 7, reconozse’l drechu “d’una aición resuelta pal fomentu de les llingües minoritaries col envís de salvaguardales”, asina como “la facilitación y fomentu del emplegu oral y escritu na vida pública y privada”, “la provisión de formes y medios afayadizos d’enseñu  y estudiu de les llingües minoritaries en tolos niveles”.

La Declaración Universal de los Drechos Humanos o la Declaración Universal de los Drechos Llingüísticos tamién protexen a les llingües minorizaes. Asina la primera diz nel so artículu 19 que “tou individuu tien drechu a la llibertá d’opinión y espresión” mentes que la segunda reconoz en detalle’l significáu de falar na llingua propia de les comunidaes minorizaes.

Europa encamienta al gobiernu asturianu dende múltiples instancies (como la de recién d’ELEN), a la Declaración d’oficialidá del asturianu, preséu fundamental pa la so sobrevivencia. La Xunta Xeneral cumpliría meyor la so función si nun se prohibiera l’usu de la nuesa llingua na so sé y atendiera al llema: seyamos más europeos respetando los nuesos drechos como asturianos, cultural y llingüísticamente.

Xuntemos d’esti mou, en mayu,  la cellebración del Día d’Europa col Día de les Lletres Asturianes, qu’estrena Premiu Nacional de Lliteratura Asturiana, nuna pallabra: Oficialidá.

Fonte: La Voz de Asturias

Iniciativa pol Asturianu va participar un añu más na Manifestación pola Oficialidá col llema "Oficialidá pal asturianu ye futuru"

Esti vienres 5 de mayu los asturianos y asturianes vamos volver a salir a la cai pa reivindicar la reconocencia del estatus llegal d'oficialidá pal idioma nel Día de les Lletres Asturianes. Dende Iniciativa pol Asturianu sofitamos un añu más esta manifestación, participando de la marcha y animando a tolos nuesos socios, simpatizantes y en xeneral, a la sociedá asturiana, a llevantar la voz pola so llingua, que carez tanta necesidá d'acción per partes de les alministraciones, asina como polos falantes, que siguen ensin ver los sos drechos civiles básicos reconocíos.

Iniciativa pol Asturianu ye una organización que ñació pa implicar a tola sociedá asturiana nel procesu de recuperación y normalización del asturianu, y polo tanto camienta imprescindible que la sociedá s’implique y faiga oyer la so voz, que ye mayoritariamente favoratible a que l’asturianu se convierta nuna llingua normal, que pueda usase en tolos ámbitos y que tenga garantizáu’l so futuru, lo que solo ye posible si esta llingua ye oficial. Ye por ellos qu'esti añu vamos ufrir dellos materiales pa usar na rede, nos perfiles o como difusión, asina como pa imprimir y usar en cualesquier ámbitu, col llema "Oficialidá pal asturianu ye futuru".

Con esti llema van vendese camisetes per encargu a lo llargo d'estos díes, entregándose na propia manifestación.

La Manifestación pola Oficialidá va salir el vienres 5 de mayu a les 19:30 hores de la Estación del Norte d'Uviéu. Animamos a toles persones enfotaes nel futuru del idioma a participar con nós na manifestación organizada pola Xunta pola Defensa de la Llingua Asturiana.

Iniciativa pol Asturianu recuerda dempués de la manifestación va celebrase nel Teatru Campoamor la Xunta Estraordinaria de l’Academia de la Llingua Asturiana y que la entrada ye llibre y de baldre. Animamos a la xente a participar d'esti actu de sofitu a la institución, qu'esti añu va entregar nel actu la primer edición del Premiu Nacional de Lliteratura Asturiana.

Fonte: Iniciativa pol Asturianu

TPA va estrenar el doblaxe n’asturianu de ‘Ocean’s eleven’ nel Día de les Lletres Asturianes

por Pablo R. Guardado

La RTPA va ufrir una programación especial dende’l martes con motivu de la XXXVIII Selmana de les Lletres Asturianes. El vienres 5, Día de les Lletres Asturianes, la TPA va estrenar la versión n’asturianu del ‘remake’ de la película estauxunidense d’aición ‘Ocean’s eleven’, doblada por Gonzali Producciones.

Dirixida nel 2001 por Steven Soderbergh, cuenta con un repartu de primer nivel formáu por George Clooney, Matt Damon, Andy García, Brad Pitt y Julia Roberts. ‘Ocean’s eleven’ rellata la historia d’un ladrón, Danny Ocean (Clooney), que pretende entamar el mayor atracu fechu dende siempre a casinos, pa lo que va formar un equipu d’once persones, los meyores nel so campu.

La película, que dao l’ésitu en cines tuvo dos continuaciones, va estrenase’l vienres 5 a les 22.15 hores. Nun va ser l’únicu filme que va poder vese en TPA esos díes, yá que’l sábadu va emitise en redifusión ‘Greystoke’ (15.30 hores) y ‘Orixe (Inception)’ (00.30 hores), ésta última doblada tamién por Gonzali Producciones.

Otra manera, con motivu de la Selmana de les Lletres la canal pública va cubrir les informaciones de la mesma en llingua asturiana en ‘TPA Noticias’ y va ufrir espacios pa la llectura de testos escritos por muyeres, mentes que la RPA tamién tien previsto una progamación na que l’asturianu va tener más pesu.

‘Sherlock Holmes: A game of shadows’

‘Ocean’s eleven’ nun va ser la única película que va poder vese en TPA n’asturianu próximamente, yá que tamién tien encargáu a Gonzali Producciones el doblaxe de ‘Sherlock Holmes: A game of shadows’. El 82 por cientu del repartu de voces d’esti filme, dirixíu nel 2011 por Guy Ritchie y protagonizáu por Robert Downey Jr., procede de la Escuela de Doblaxe d’Asturies, de la productora xixonesa.

Fonte: Asturies.com

Madrid celebra'l so Día de les Lletres con una llectura coleutiva

   Esti sábadu'l Centru Asturianu de Madrid va acoyer la celebración del Día de les Lletres Asturianes na capital castellana, actividá qu'entama Iniciativa pol Asturianu. Va consistir nuna llectura de testos lliterarios pa la que se convida a los miles d'asturianos emigraos cola fin d'homenaxar a los nuesa lliteratura.

   L'actu va abrise cola presentación del númberu 14 de la revista de lliteratura moza 'Formientu, pa siguir depués cola llectura de testos lliterarios "n'homenaxe a la nuesa llingua y a los escritores qu'escriben nella".

   Esta actividá pretende tamién ser "una forma de reivindicar la visibilidá del asturianu nel ámbitu estatal, onde la falta d'oficialidá fai que la llingua asturiana nun apaeza xunto al restu de les llingües del Estáu", espliquen dende Iniciativa pol Asturianu.

   Esta organización convida a participar nel Día de les Lletres Asturianes en Madrid "a tolos asturianos y asturianes" que residen na ciudá y na comunidá madrilana, a los que-yos solicita la confirmación nel corréu electrónicu info@iniciativapolasturianu.org de la so presencia'l sábadu, a les 20 hores, na sede del Centru Asturianu de Madrid, asitiada na céntrica cai Farmacia númberu 2, esquina cola transitada Fuencarral. D'esta forma preténdese una meyor organización del eventu.                                        Fonte: asturies.com

Somos Avilés encolinga una pancarta na Casa Conceyu reclamando la oficialidá

Pancarta nel Ayuntamientu d'Avilés

  A les 10.30 hores d'esti vienres, Día de les Lletres Asturianes, Somos Avilés encolingó una pancarta na fachada de la Casa Conceyu de la villa reclamando la oficialidá. Alcaldía ordenó retirala y, al nun contar con permisu, los conceyales zarraos nel despachu del grupu municipal decidieron retirala sobre'l meudía una vegada algamáu l'oxetivu.

  La pancarta, bien visible dende too El Parche, reza 'Oficialidá. Pa que nun muerra la nuestra llingua', y con ella Somos Avilés pretende reivindicar los derechos llingüísticos de tolos asturianos y asturianes nesta xornada tan especial pa les nueses lletres. A la media hora de colocase nes ventanes del despachu del grupu municipal, Alcaldía yá llamó pa retirala, pero los trés ediles enzarraos pretenden negociar pa qu'ésta permanezca tola xornada hasta la hora de marchar a Uviéu a participar na manifestación de la Xunta pola Defensa de la Llingua Asturiana (XDLA), con salida a les 19.30 hores de la Estación del Norte (Renfe).

  "Na Casa Conceyu yá se colgaron munches pancartes reclamando derechos xustos, pero ye poner una reclamando los nuesos derechos llingüísticos y rápidamente yá la quieren quitar", apuntaba a Asturies.com l'edil Xune Elipe dende'l despachu del grupu municipal na Casa Conceyu. Elipe permanez enzarráu nel mesmu xunto con Yolanda Suárez Castro y Eva Fernández Alonso. Primi Abella y David Salcines nun pudieron participar de l'aición por motivos llaborales.

Hora y media colgada     Al pocu d'encolingala, la Policía Llocal yá acudiera a la zona a comprobar de qué se trataba y treslladaba'l fechu a Alcaldía. La propia alcaldesa Mariví Montserín llamó a Salcines pa pidi-y que la retiraren y responsables municipales acudieren al despachu pa solicitar lo mesmo. "Teniendo mieu que nos la confiscaren y nun poder llevala a la manifestación, y una vez algamáu l'oxetivu d'esta aición propagándística que pretendía visibilizar el conflicu llingüísticu esistente n'Asturies nes instituciones, quitámosla", esplicó Elipe, qu'insistía que la mesma "pretendía reclamar un derechu básicu como ye'l de poder utilizar una de les llingües del país".

  L'edil reconcía que nun solicitaren permisu pa ponela, contando con que nun diben recibir el preste, y anunciaba que pal añu qu'entra sí teníen previsto facelo "a ver qué pasa". Otra manera, Elipe destacó'l bon recibimientu de l'aición ente la ciudadanía, "que paraba a falar con nós", y confirmó l'enfotu de Somos Avilés de siguir "col so trabayu normalizador nel día a día, pa tomar un papel más reivindicativu cuando s'avere la Selmana de les Lletres Asturianes.                                                                                                 Fonte: asturies.com

Los conceyos van axuntase tres una pancarta na manifestación del vienres pola oficialidá

   L'Ayuntamientu de Bimenes y la Xunta pola Defensa de la Llingua Asturiana (XDLA)entamen la iniciativa ‘Conceyos pola Oficialidá’. Representantes de los conceyos van acudir a la manifestación del vienres pol Día de les Lletres tres una pancarta baxo esi nome.

  Ésti ye’l primer pasu, tres los primeros alcuentros con coleutivos y grupos políticos, que l’equipu de gobiernu de Bimenes da nel so intentu d’involucrar a la mayor cantidá de xente posible con vistes a la declaración d’oficialidá nel conceyu prevista pal 2 de xunetu y, al empar, crear un movimientu de reivindicación d’esti derechu dende les entidaes llocales. Los primeros contautos tán dando lo sos frutos y al menos confirmaron la so participación na manifestación al menos venti conceyos.

  “Pensamos qu’esta primavera ye un bon momentu pa que los representantes municipales-y dean un emburrión al espíritu de protección del patrimoniu llingüísticu d’Asturies y de defensa de los derechos llingüísticos de los y les falantes d’asturianu de gallego-asturiano”, reza la carta unviada a los conceyos énte “los intentos de represión” acontecíos nos meses últimos. “Pensamos qu’hai que salir a defendese d’estes agresiones con una reacción decidida y colectiva, y esa respuesta pueden encabezala les persones depositaries del enfotu de la ciudadanía, quier dicise, los cargos escoyíos nes últimes elecciones locales”, espliquen.

   Los ediles que confirmen la so asistencia participarán na manifestación ‘L’asturianu, llingua oficial’ qu’entama’l vienres n’Uviéu la XDLA por mor del Día de les Lletres Asturianes tres una pancarta que va llevar el testu ‘Conceyos pola Oficialidá’. La marcha va salir a les 19.30 de la Estación del Norte (Renfe) y final nel Teatru Campoamor, onde a les 20.30 hores va tener llugar l’actu de l’Academia de la Llingua Asturiana.                                     Fonte: asturies.com

Adxuntu	Tamañu
carta_conceyos_pola_oficialida.jpg	86.1 KB

Pablo Suárez García sedrá nuevu académicu correspondiente de l’ALLA

Retratu del nuevu académicu de l'ALLA, Pablo Suárez García

  L'Academia de la Llingua Asturiana (ALLA) vieno acabante d’apautar na so cabera xunta d’ayeri xueves el nomamientu como miembru correspondiente del doctor en Filoloxía y traductor al asturianu del Quixote de Cervantes, Pablo Suárez García.

  El nuevu miembru correspondiente recoyera’l so nomamientu na Xunta estraordinaciar que l’ALLA cellebrará como tolos años nel Día de les Lletres Asturianes, el primer vienres de mayu nel Teatru Campoamor d’Uviéu.

  Pablo Suárez ye l’autor d’una versión íntegra d’El Quixote en llingua asturiana, traducida en 2010 y que tres de ser depositada nel «Museo Cervantino de El Toboso» en xunu de 2014, asoleyábase’l 21 d’abril de 2015 pola editorial Laria.

  Los llectores asturianos disfruten de les aventures del Quixote na so llingua gracies a la iniciativa d’Ediciones Laria d’espublizar el trabayu de Pablo Suárez García dende hai un añu, pese a que la primer torna del Quixote depositóla l’investigador y filólogu d’Udrión nel llar de l’ALLA nel 2010.

  El trabayu pa esta cabera versión editada del Quixote de Suárez García supunxo incorporar 3.000 notes a pie de páxina a les 500 de la primer edición previa a la entrega al muséu y dos o trés revisiones nueves pa sumar otres 500 más.      Fonte: asturnews.com

Cano plantega a les fuercies polítiques un procesu d’oficialización “axustáu a les necesidaes d’Asturies" nel que l’ALLA actuaría de moderador

por Pablo R. Guardado

“¿Daquién con xacíu pue dexar pasar esta oportunidá y refugar esta ufierta?” entrugóse Ana María Cano, presidenta de l’ALLA, nel actu académicu del XXXVI Día de les Lletres Asturianes depués d’ufrir a los partíos moderar un procesu d’oficialización de l’asturianu “axustáu a les necesidaes d’Asturies”. Enantes, alredor de 3.000 persones pidieron la oficialidá peles cais d’Uviéu.

La coincidencia de la xornada col entamu de la campaña eleutoral pa les Nacionales y municipales del 24 de mayu condicionó’l discursu institucional de Cano que, tres emponderar el llabor de la Xunta pola Defensa de la Llingua Asturiana (XDLA) –coleutivu que recibió un reconocimientu por parte de l’Academia de la LlinguaAsturiana (ALLA)– y facer un repás al llabor académicu nestos doce meses últimos, refirióse a esta cita coles urnes como “una oportunidá pa la llingua asturiana”. “En 15 díes, el 24 de mayu, celébrense les eleiciones pa escoyer la composición de la Xunta Xeneral del Principáu y, darréu d’ello, el Gobiernu d’Asturies. Y ye equí onde se xuega’l futuru del asturianu porque, a lo cabero y práuticamente, ye’l parllamentu asturianu, y non otres instancies europees o estatales, el que decide qué facer cola llingua hestórica d’Asturies”, señaló.

Tres recordar la “más inequívoca neutralidá política” de la institución que preside, calcó en que “la llingua asturiana nun pertenez a nengún partíu, nin a nenguna ideoloxía concreta, sinón que ye patrimoniu común de tol pueblu asturianu”, arracando los aplausos de los presentes. Darréu, afaló a los partíos polítiques a que dexaren nidio “qué política llingüística proponen” y apuntó “que la oficialidá ye absolutamente necesaria pa tener dalguna oportunidá de salvar al idioma”, amás de la “única solución constitucional posible”. La falta d’esi status xurídicu lleva “a que’l Ministeriu d’Educación nun considere la necesidá de reconocer la especialidá docente de llingua asturiana al profesoráu, o que la presencia del área d’asturianu nel currículu d’Asturies seya llamentable, o que nun sintamos programes informativos n’asturianu na Televisión del Principáu o que l’asturianu malpenes tenga valir na vida cultural, institucional y política d’Asturies”, enumeró Cano pa esplicar les consecuencies de la non reconocencia del idioma. “Por eso ye importante conocer y entender qué propuestes de política llingüística nos planteguen pa les próximes eleiciones les fuercies polítiques que s’asitien n’Asturies, les nueves y les vieyes. En tou casu y como viemos, refugar un futuru xurídicu d’oficialización pal asturianu siempres será ‘vieya política’, la política que vien faciéndose n’Asturies dende va 40 años”, continuó.

Sobre la situación depués del 24 de mayu, la presidenta de l’ALLA, entrugóse “¿queremos dignificar una cultura asturiana que seya una aportación orixinal a la cultura universal, sí o non?, ¿queremos que l’asturianu sobreviva ente les nueves xeneraciones d’asturianes y asturianos, sí o non?, ¿queremos qu’Asturies tenga les mesmes oportunidaes que’l restu de comunidaes billingües del Estáu, sí o non?”. Nel casu de la que respuesta sía afirmativa, “sedría inconcebible lo contrario”, añadió, “la consecuencia lóxica ye la necesidá del algame d’un gran consensu social y políticu al rodiu de la co-oficialidá de la llingua asturiana”. Pa ello, Cano ufrió a les fuercies polítiques l’Academia “p’actuar como moderadora nel procesu d’oficialización, dende les primeres fases (concretar la formulación espresa) hasta les caberes (llei de desarrollu y puesta en práutica gradual). ¿Daquién con xacíu pue dexar pasar esta oportunidá y refugar esta ufierta?, ¿por qué diba facelo y actuar contra Asturies?, ¿cómo xustificar un despreciu asemeyáu al espíritu del nuesu pueblu?”.

Nesi sen, puntualizó que la institución “sabe cómo se pue facer esti procesu; sabemos que la oficialidá del asturianu nun tien por qué reproducir miméticamente les soluciones que se dieron n’otres comunidaes, sinón qu’ha afayase a la nuesa y concreta especificidá: la nuesa situación sociollingüística y los niveles de pervivencia de la llingua; les actitúes, demandes y espeutatives sociales; la rellación ente llingua y cultura asturianes; fases d’una puesta en práutica prudente y aceutable; y hasta la necesidá d’una contención económica y presupuestaria. Ye dicir, tien que dase una oficialidá axustada a les necesidaes y posibilidaes d’Asturies, pero oficialidá”.

Reconocimientu a la XDLA

L’actu académicu dio entamó pasaes les 20.30 hores cola presencia de muncho públicu y representantes de tolos partíos parllamentarios a esceición d’UPyD. Destacó l’asistencia de Cristina Coto, cabeza de llista de Foro a la Xunta Xeneral, acompañada pol senador Isidro Martínez Oblanca, l’edil uviedín Juan Pérez Zaldívar, el candidatu al Conceyu d’Uviéu Godofredo Andrés Rodríguez y Inaciu Iglesias, ente otres persones d’esta formación. Por Izquierda Xunida tamién tuvo’l so candidatu  a la presidencia del país y diputáu nel Congresu Gaspar Llamazares, amás del coordinadora xeneral Manuel González Orviz y dellos parllamentarios, protagonizando la coalición la representación más amplia.

Del partíu del Gobiernu acudió la diputada Pilar Alonso, ente otros, y representando a la Conseyería d’Educación, Cultura y Deporte, la direutora xeneral de Política Llingüística, Ana María Fueyo, mentes que pol PP asistió la parllamentaria Susana López Ares y Inmaculada González, teniente alcalde d’Uvieú. De les formaciones ensin representación na Xunta Xeneral destacó la presencia del cabeza de llista de Ciudadanos, Nicanor García, y de la eurodiputada de Podemos Estefanía Torres y de Xune Elipe, miembru del Conseyu Ciudadanu de Podemos Asturies. Tamién se dexaron ver los alcaldes de Nava y Bimenes, Emilio Ballesteros (Asturianistes por Nava) y Alejandro Canteli (Bloque Independiente de Bimenes). El rector de la Universidá d’Uviéu, Vicente Gotor, y dellos vicerrectores y profesores nun quixeron perdese l’actu académicou, amás de munchos representantes del mundu sindical. De fuera d’Asturies, participaron Francisco Venâncio, de la Camâra Municipal de Miranda de l Douro y Alfredo Cameirão, vicepresidente de l’Associaçion de la Lhengua i Cultura Mirandesa.

La puesta n’escena estrenada l’añu pasáu modificóse en dellos aspeutos, principiando l’actu con un entamu musica protagonizada pola gaitera Andrea Joglar dende un palcu del Campoamor. Darréu, los presentadores Sonia Avellaneda y Próspero Morán dieron pasu a los académicos, qu’entraron pela puerta central del teatru ente los aplausos del públicu pa llueu ocupar les silles instalaes nel escenariu. El siguiente en xubir al mesmu foi Carlos Pulgar, voceru nacional de la XDLA, que recibió un presente conmemorativu de manes de Cano. Na so intervención, Pulgar señaló que “ye un honor bien emocionante pa la Xunta recibir esti reconocimientu de la máxima institución llingüística d’Asturies y ye una obligación compartilu con tola xente que sofita les nuestres acciones y actividaes. Pero ta claro que pa nós tamién ye una responsabilidá y un compromisu pa siguir nel llabor y na llucha. Responsabilidá y compromisu qu'acoyemos y aceptamos ensin duldar”.

Darréu, apuntó que “el fin y oxetivu de la Xunta pola Defensa de la Llingua Asturiana namás ye ún: asegurar la sobrevivencia del asturianu. Y p'asegurar un futuru al nuestru idioma son imprescindibles y necesaries una riestra de ferramientes. Ente elles dalgunes son xurídiques. La oficialidá ye una d'eses ferramientes llegales: el reconocimientu esplícitu de la igualdá de la ciudadanía a tolos niveles use la llingua qu'use. Esos derechos de les persones que falen asturianu nun puen ser negociables porque son derechos humanos básicos. Nun hai horizonte de futuru viable ensin aplicar lo que les disposiciones constitucionales estatales y internacionales afirmen. Les llingües, y l'asturianu ye una d'elles, tienen que ser oficiales pa poder sobrevivir. Nun hai espaciu pa interpretaciones, sides o estratexes electorales: ye la manera inequívoca d'asegurar los derechos dientro del ordenamientu xurídicu nel que tamos”. Sicasí, recordó que la oficidalidá “nun ye la solución a too. Ye'l primer pasu. Ye'l pasu inescusable pa entamar un plan de normalización qu'intente salvar la nuestra llingua pa les xeneraciones futures d'asturianos y asturianes”.

El representante de la XDLA llamentó’l dañu yá fechu pol frayíu de la cadena de tresmisión xeneracional pola situación del sistema educativu y la falta d’enfotu puestu dende los medios de comunicación públicos, “ferramientes más eficaces al serviciu de l'aceleración brutal de la sustitución llingüística”, por mor de que los que teníen nes sos manes tornar “esi procesu de sustitución llingüística, pasaron de la negación del fechu llingüísticu asturianu a la corrección política más pegañosa y mentirosa: la de la difusión, la protección, la promoción... Eses sí que son palabres baleres. Son cada añu menos de lo mesmo, como pudimos ver nesta llexislatura llamentabe qu'agora acaba. Ye aprobar topónimos que depués l'Alministración nun usa. Ye xestionar una enseñanza que dexen morrer añu a añu. Ye subvencionar llibros pa una población que desconoz la so existencia. Ye querer muncho l'asturianu una selmana al añu y depués nun volver a alcordase d'ello”, criticó.

“Revélase asina, nos más de los dirixentes que sufrimos estos años, la concepción museística y folclórica que tienen del idioma, que ye calcada, tan progres ellos, de la concepción tardofranquista, que munchos nin saben nin quieren superar”, continuó, pa depués confirmar que la XDLA va siguir siendo l’altavoz de la “otra Asturies”. “El llabor académicu ye un exemplu d'esa Asturies que trabaya pol asturianu, que lo estudia y lo investiga, que lo prestixa y visibiliza, que nos da ferramientes pa proyectalo al futuru. Nós, na Xunta pola Defensa de la Llingua Asturiana, tamién quiximos dar voz a esa otra Asturies, sacar l'apreciu y l'arguyu de falar n'asturianu a les cais, esparder el convencimientu de qu'una Asturies que reconoza derechos, que respete la so llingua, va ser una Asturies meyor con un futuru meyor”, prosiguió, y nesi llabor “vamos tar siempre hasta que s'asegure la sobrevivencia del asturianu. Nesi llabor vamos tar impulsando la revolución democrática y de derechos que supón la oficialidá y el futuru pol que naguamos”.

El tramu final del actu académicu, tres estes pallabres de Pulgar y el discursu de Cano, consistió na llectura d’una esbilla de poemes de de ‘Lliteratura 31’, a cargu d’Avellaneda y Morán, y l’actuación d’Al Son d’Amieva. El grupu lideráu por Xuacu Amieva y formáu por Flavia, Vérbal y Paula Amieva, interpretó ‘El pastor’, ‘Xunci les vaques Ramona’, ‘Nalón’, ‘El besu’, ‘Muñeira d’El Reboḷḷal’ y ‘Xota de Tinéu/Muñeira de Xixón’. Pa finar, Amieva y Joglar tocaron a la gaita l’himnu d’Asturies.

Manifestación multitudinaria

Una hora enantes del actu académicu salía de la Estación del Norte d’Uviéu la manifestación ‘L’asturianu, llingua oficial’ entamada pola XDLA, que cifró en 3.000 los participantes. Muchos partíos políticos, sindicatos y coleutivos sofitaron la manifestación, llevando pancarta tres la banderona d’Asturies, la Bandona pola Oficialidá y el baberu principal de la XDLA, ‘Reciella. Families pol Asturianu’; Xunta Moza; CC OO Enseñanza; Izquierda  Xunida; un grupu de falantes de gallego-asturiano; Andecha Astur; SUATEA; Iniciativa pol Asturianu; MAS Corvera; el bloque soberanista promocionáu dende l’Espaciu La Llegra; FETE-UGT Asturias; CSI; Juventudes Comunistas; Marches de la Dignidá; y Ganemos Avilés. Pese a la coincidencia col mítin d’aniciu de campaña de Podemos Asturies en Xixón, acudieron a la manifestación la eurodiputada Torres; el secretaríu xeneral Daniel Ripa; la númberu dos na llista a la Xunta Xeneral pela circunscripción central Lucía Montejo; Andrés Ron, númberu ún na occidental; y Elipe, ente otros. Na marcha pudieron vese, amás de decenes de banderes asturianes, otres de países como Lleón, Canarias o Portugal.

Na puerta del Campoamor, María Xosé Martínez encargóse de lleer un discursu nel que criticó a los políticos asturianos por “mirar a otru llau, dar llarges” nel tema de la llingua. “Nun entendemos que lo que val en Galicia, País Vascu, Cataluña, Valencia, Baleares y Navarra nun val n’Asturies. Los derechos llingüísticos, los derechos culturales, los derechos humanos, parez que dependen del sitiu onde se naz; namás val con cruciar la ría del Eo pa velo”. La situación de precariedá de los trabayadores de los servicios de normalización llingüística o los maestros d’asturianu foi denunciada pola representante de la XDLA, que fixo referencia darréu pa la esperanza les pallabres de Nico y Enol, alumnos del institutu de Los Barredos, pidiendo proteición pal idioma nel actu institucional del martes na Xunta Xeneral y entrugándose qué-yos tendría que pasar pela cabeza de los sos güelos que piensen que ye dalgo malo tresmitir a los sos nietos la llingua propia. Y pal esmolecimientu les del socialista Pedro Sanjurjo, presidente del Parllamentu asturianu. “Contestó-yos que la oficialidá yera una imposición, que les llingües tienen qu’usase y fluir de xeitu natural, pero que la oficialidá xeneraba una confrontación. Parez qu’a los nuestros políticos nun-yos importa lo que pasa pela cabeza de los güelos de Nico y Enol, que representen lo que-y pasa a bona parte de la sociedá asturiana. Nun quieren una Asturies arguyosa de lo que ye; nun quieren una Asturies que nun agache la cabeza; nun quieren una Asturies con alma; nun quieren una Asturies con identidá; nun quieren una Asturies con llingua asturiana. Nun quieren a esti pueblu”.

Xugando col lema de la XXXVI Selmana de les Lletres Asturianes, ‘Semar palabres, texer futuru’, la XDLA entrúgase cómo quieren facelo con una presencia marxinal na escuela, ensin programación infantil n’asturianu y ensin oficialidá nin “una política llingüística amañosa”. Tamién hubo pallabres pa la situación de la toponimia y un mensaxe pa les fuercies polítiques que se presenten a les eleiciones pa que tengan en cuenta l’idioma y qu’ésti nun siga condenáu al desaniciu. Por último, Martínez confirmó que la xente del movimientu de reivindicación llingüística va siguir “plantando cara a los que nos nieguen derechos y lluchando polo que creemos y queremos”.

Fonte: Asturies.com