'Fálame' va emitise de mañana y de tarde (TPA)

• . La estrena definitiva de ‘Fálame’ en TPA va ser el domingu 21

Escolinos del C. P. Ríu Sella de Les Arriondes

 La TPA programa'l primer capítulu pa esti domingu a les 9.15 y a les 17.25 hores.

 'Fálame', el programa infantil en llingua asturiana que va percorrer les escueles del país, yá tien horarios confirmaos. Como taba anunciao, va estrenase a les 9.15 hores, anque, como novedá, va repetise pela tarde, nun horariu más familiar, como reclamaba la productora, Médula.

Colexu Públicu Ríu Sella, Les Arriondes

 El Colegio Público Río Sella protagoniza'l primer episodiu, nel que los neños y neñes de Llingua Asturiana van falar asturianu al traviés de xuegos, cantares o actividaes propuestes pol profesoráu. Pop Piquiñín va participar tamién en 'Fálame' cola interpretación d'un cantar en caún de los 26 episodios previstos nesta primer temporada.                Fonte: asturies.com

La estrena definitiva de ‘Fálame’ en TPA va ser el domingu 21

• . ‘Fálame’ va llevar les cámares de TPA a colexos pa que los escolinos s'espresen n’asturianu

 La RTPA anunció que la estrena del programa infantil en llingua asturiana ‘Fálame’ va ser el domingu 21, en principio a les 9.15 hores. El deséu de la productora, Médula, ye que s’emita nun horariu más familiar pa que lo vean grandes y pequeños.

 Yá hai fecha pa la estrena definitiva de ‘Fálame’, el programa col que la direición xeneral de la RTPA quier tapecer el vieyu déficit de la TPA de programación infantil col que cuenta la canal pública. ‘Fálame’, que va ser dafechu en llingua asturiana, va emitir el so primer episodiu’l domingu 21, nun horariu por confirmar, anque nun principio va ser alredor de les 9.15 hores.

 Esta hora tan temprana nun acaba de prestar a la productora Médula Producciones, que pretende que ‘Fálame’ s’emita a nun horariu más familiar “yá que ye un programa mui prestosu pa vulu xuntos neños, padres y güelos”. La redifusión, prevista pal sábadu siguiente, sería tamién a la mesma hora.

De colexu en colexu

 La primer temporada de ‘Fálame’, la única prevista de momento, va contar con 26 capítulos de 30 minutos de llargor caún nes que se visiten a otros tantos centros del país pa que los neños y neñes canten y falen sobre dellos temes propuestos y cosadielles, baxo la supervisión de los sos maestros, siempre n’asturianu. En cada episodiu va haber tamién llugar p’actuaciones musicales, cola participación de Pop Piquiñín.          Fonte: asturies.com

RPA va radiar n'asturianu l'Uviéu-Alcorcón

El Lealtad-Somozas tamién va poder sentise na radio asturiana y vese pela TPA dientro de la programación especial pola Selmana de les Lletres del ente públicu de comunicación.

Miguel Fernandi va ser l'encargáu de radiar pa la RPA'l partíu que va enfrentar el vienres 5, Día de les Lletres Asturianes, nel Carlos Tartiere Nuevu al Uviéu col Alcorcón, correspondiente a la xornada 37 de Segunda División. L'aniciu del partíu ta previstu pa les 20 hores y el comentarista va tener, como ye vezu, l'apoyu na retresmisión d'Armando.

El domingu 7 al meudía, mentes, Fernandi va tener como compañeru a Nacio González en TPA nel choque de Les Caleyes que va enfrentar al Lealtad y al Somozas na penúltima xornada del grupu 1 de Segunda División B. Nesti casu, Fernando García de Dios va comentar el choque ente asturianos y gallegos en RPA en llingua asturiana.
Fonte: asturies.com

‘Fálame’ va llevar les cámares de TPA a colexos pa que los escolinos s'espresen n’asturianu

La primer temporada de ‘Fálame’ va consistir en 26 visites a centros educativos del país pa que los escolinos y escolines s’espresen en llingua asturiana o gallego-asturiano. Pese a que’l conseyu d’alministración de RTPA tenía avisu del estrenu d’esti programa infantil pal domingu, la so primer emisión va retrasase finalmente.

Médula Producciones, responsable de ‘Fálame’, ta nestos momentos grabando los episodios previstos nesta primer entrega, que se van poder ver en TPA a partir de mayu, según preve’l so xerente Carlos Navarro, qu’afirma que la direición del ente nun punxo fecha llende d’entrega de los primeros programes. De momento, yá se finó cola grabación de cinco de los 26 capítulos y en dos selmanes van tar pa emitise, anque s’espera un periodu de promoción previu per parte de la canal.

L’oxetivu del programa, de 30 minutos de llargor, ye’l de divulgar conocimientos llingüísticos d’asturianu, “pero nun va ser una clase de llingua asturiana”, apunta Navarro. “Va tener un componente teóricu, con un apunte de gramática y otru de vocabulariu, pero lo que se busca ye que los escolinos s’espresen na so llingua patrimonial”, afirma’l responsable de Médula Producciones.

Asina, baxo la supervisión de los sos maestros y maestres, van tomar la pallabra pa falar sobre dellos temes propuestos y cosadielles, asina como pa cantar. La música ye, precisamente, otru de los pegoyos de ‘Fálame’, con interpretaciones de cantares en direutu de Pop Piquiñín, grupu d’ésitu ente la reciella.

“En principio va ser una temporada, pero nos prestaría que s’allargara más”, apunta Navarro, que recuerda que Médula foi la empresa que s’encargó de ‘Presta asgaya’, hasta la fecha única programación infantil realizada dafechu pa TPA, de la que s’emitieron 300 capítulos tanto en castellanu como n’asturianu nos primeros años de TPA. Sicasí, nos últimos tiempos los espacios pa los más pequeños de la casa foron nulos, quitando la esperiencia de la serie gallega doblada al asturianu 'Los Bolechas', de la que s'emitieron dos temporaes.

Entovía ensin horariu confirmáu, la emisión de 'Fálame' va producise na mañana de los domingos, mientres que'l sábadu siguiente va repetise l'episodiu de la selmana anterior.

Fonte: asturies.com

‘Fálame’ va estrenase en TPA’l día 23

• 
  
• 
  
• por Pablo R. Guardado

El programa infantil en llingua asturiana de TPA, ‘Fálame’, tien previstu’l so estrenu’l día 23. Esti espaciu pa la reciella que va emitise nes mañanes del domingu, con redifusión el sábadu siguiente.

Médula Producciones encárgase d’esti programa que tien como oxetivu divulgar conocimientos llingüísticos d’asturianu, tanto gramaticales como de vocabulariu. Asina, tán previstos 26 capítulos de ‘Fálame’ con un llargor de 30 minutos caún, nos que la popular cantante de tonada va servir como conductora.

El primer episodiu, salvo novedá d’última hora, va emitise na mañana del domingu 23 nun horariu por confirmar y var poder vese repetíu’l sábadu 29. Con esta iniciativa RTPA cumple con una demanda vieya de los coleutivos de defensa del idioma, que consideren la programación infantil nel ente públicu de comunicación como un preséu básicu pa la normalización de la llingua asturiana.

Fonte: Asturies.com

Iniciativa denuncia’l tratamientu de TPA al procesu toponímicu de Salas

Iniciativa pol Asturianu denuncia’l tratamientu informativu de TPA al procesu d’oficialización de la toponimia de Salas y reclama a la televisión pública d’Asturies que trate de da-y un enfoque positivu a esti drechu de los asturfalantes.

El domingu 5 de marzu TPA Noticias emitió un reportaxe nel que se suxería que los vecinos de Salas tan “en pie de guerra” pola propuesta de la Xunta de Toponimia del Principáu d’Asturies d’oficializar el topónimu ‘Corniana’ a la so variante tradicional ‘Curniana’, nel procesu entamáu pol Conceyu Salas de recuperación de los nomes tradicionales de les llocalidaes del conceyu cumpliendo, asina, cola llei autonómica 1/1998 d’Usu y Promoción del Asturianu.

Dende Iniciativa pol Asturianu quieren amosar “el nuestru malestar ante lo que paez un intentu per parte d’un mediu de comunicación públicu de desprestixar la llingua asturiana y el trabayu meticulosu fechu por toos aquellos involucraos nes investigaciones toponímiques, cuando ente los oxetivos de la RTPA ta xusto’l llabor contrariu”.

Nel reportaxe emitíu por TPA “puen vese les opiniones a la escontra de trés persones, asina como del alcalde, pero nun se recueye nenguna voz favoratible o d’espertos qu’esplicasen l’orixe o’l porqué del topónimu Corniana, asina como la propia inicitiva del Conceyu de Salas a la hora de poner esti procesu en marcha, faltando a los principios d’imparcialidá y pluralidá que deben ser la base d’un mediu de comunicación públicu”.

Amás, TPA paez escaecer nel reportaxe, sigún Iniciativa pol Asturianu “que les propuestas feches pola Xunta de Toponimia son precisamente propuestes y, que tres procesos d’información pública y allegaciones, ye’l propiu conceyu’l quien toma les decisiones. Nel reportaxe dase una visión desenfocada na que se paez insinuar dalgún tipu d’imposición nun procesu que ye dafechu democráticu, entamáu voluntariamente pol Conceyu de Salas y fechu dende la investigación de la forma de llamar a los llugares de los propios habitantes que meyor conserven la variedá del asturianu de Salas”.

Iniciativa pol Asturianu quier recordar a Radiotelevisión Pública d’Asturies que, como ente públicu que ye, ha velar pol cumplimientu del respetu, promoción y defensa del asturianu y gallego-asturianu, ensin prexuicios ideolóxicos, llinguísticos, sociales o de cualesquier otra mena, faciendo precisamente tolo contrario, formar a la población pa evitar estos prexuicios.

Asimismo, Iniciativa pol Asturianu quier amosar el so sofitu a esti procesu de recuperación de la toponimia tradicional ante los ataques ensin base llegal, hestórica nin filolóxica que carez de contino per parte de dellos coleutivos, incluyíos organismos públicos autonómicos. Nesti sen, faen un llamáu “a les organizaciones polítiques y sociales del conceyu de Salas pa que trabayen pa da-y difusión a los valores positivos que tien esti procesu, que permite recuperar y caltener pal futuru les formes tradicionales de llamar a los llugares del conceyu, evitando que se pierda una parte importante del nuesu patrimoniu inmaterial. Esperamos que la propuesta cunte col sofitu de toles fuercies polítiques como vien pasando nos más de mediu centenar de conceyos asturianos qu’aprobaron yá la so toponimia tradicional como oficial”.

Fonte: Asturnews

El derbi de Segunda B emitíu n'asturianu en TPA supera la cuota de pantalla media de la canal

• . TPA va empezar a emitir partíos de fútbol n’asturianu de forma periódica
• . El derbi asturianu de Segunda B, en llingua asturiana en RTPA

Semeya propiedá del Club Deportivo Lealtad de Villaviciosa. Encuentru Lealtad-Caudal n'asturianu pola TPA

  El Lealtad-Caudal retresmitíu en llingua asturiana en TPA na mañana del domingu algamó un 6 por cientu de cuota de pantalla. D’esta forma, la emisión supera la media mensual de la canal de televisión pública, asitiada anguaño nun 4,8 por cientu, y confirma l’interés por ver retresmisiones deportives n’asturianu.

  Miguel Fernandi y Nacio González punxeron voz a la retresmisión del derbi asturianu de la Segunda División B nel nuesu idioma na TPA, mentes que Fernando García de Dios fixo lo propio na RPA. El siguimientu del choque pela televisión foi destacáu, superando la media mensual de la canal, asitiáu nel 4,8 por cientu. Asina, mientres la emisión del partíu algamóse una cuota de pantalla o share del 6 por cientu.

   L’alcuentru de Les Caleyes ye’l segundu n’asturianu que se pue ver en TPA dientro d’una iniciativa de la direición xeneral del ente de facer emisiones periódiques en llingua asturiana de partíos de fútbol. De momento, emitióse un Lealtad-Coruxo y el nomáu Lealtad-Caudal, dambos de Segunda División B, anque nun se descarta que se sume dalgún partíu de Tercera División, realización que cuerre a cargu d’otra productora.

Empate a un gol

  El derbi ente los de Villaviciosa y Mieres finó con un empate a un gol que sirve más a los llocales qu’a los visitantes. Adelantóse’l Caudal a los dos minutos de comenzar la segunda parte con un tantu de Cristian tres un llanzamientu de corner, pero a la espulsión de Noel Alonso nel minutu 76 por segunda mariella siguió-y el tantu del empate maliayu, obra d’Adrián Llano al rematar la falta fecha pol ex sportinguista.

  Al final repartu de puntos que permite al Lealtad enganchar ocho partíos ensin conocer la derrota, ocupando asina una cómoda octava posición, con 30 puntos, y que nun sirve a los d’Iván Ania pa salir de la zona peligrosa de la tabla. Asina, el Caudal, tres la victoria del Multivera n’A Malata por 0-1, ocupa la plaza de play-off de promoción del equipu navarru con 23 puntos, ún menos que’l Boiro y el Burgos.                                             Fonte: asturies.com

La XDLA dulda si tien sentíu caltener la TPA y la so xeneración de deuda

Na semeya d'arquivu, Antonio Virgili 

  “¿Tien sentíu que paguemos una radio que ta pa poner lo mesmo que pue sonar en Cadena Dial o Los 40?” Con esta entruga retórica la Xunta pola Defensa de la Llingua (XDLA) asoleyaba esti llunes día 2 un comunicáu nel que se plantegaba si ye’l momentu de reflexonar alrodiu la utilidá de caltener la TPA y los costos económicos que supón.

  El movimientu de reivindicación llingüística siempre defendió la existencia d’una canal autonómica, pero nun comunicáu asoleyáu ayeri llunes, la XDLA , pidía reflexonar si  “nestes condiciones, onde RTPA namás ta al serviciu de los caprichinos d’Antonio Virgili y pa incumplir la llexislación vixente, ye’l momentu de facer un llamáu a la sociedá asturiana pa que reflexone sobre si tien sentíu mantenelos”.

  El comunicáu entamaba faciendo alcordanza de qu’acabamos l’añu nel que RTPA tuvo celebrando una década d’existencia y plantegando que “no que tien que ver col compromisu que marca la llei cola difusión de la llingua propia, foron diez años con munches sombres y mui poques lluces. Con too, nun vamos dir tan p’atrás; vamos quedar nos últimos 365 díes. Y ye qu’hai poco más d’un añu viemos a un conseyeru d’Educación y Cultura afirmando que RTPA diba dexar d’usar l’asturianu pa facer chancia. Tamién viemos a un director xeneral de RTPA asegurando que yera partidariu del usu del nuestru idioma nos medios públicos. Y viemos a una mayoría de la Xunta Xeneral aprobando’l proyectu d’un plan de dignificación que falaba d’usar la radio y la televisión públiques como ferramienta de normalización llingüística”.

  

  Sicasí, pasaron 365 díes y “a pesar de los reportaxes trunfalistes sobre tolo bono que supuestamente fixeron en TPA nestos últimos años, col usu del nuestru idioma too sigue igual. L’asturianu namás val pa les pingarates, pa da-y un toque de color y d’humor a una emisora que bien podría emitir dende Madrid -por muncho que nos echen en cara que de vez en cuando van peles caleyes, como si eso yá valiera pa xustificar la so existencia-. Asina, l’usu de la toponimia oficial va p’atrás, nun aparecen programes d’entretenimientos nuevos con un tratamientu dignu pa la cultura asturiana, l’idioma sigue arrequexáu nos usos diglósicos ensin nengún procuru cola corrección y calidá, la programación infantil n’asturianu emítese ensin promoción nos fines de selmana -nuna canal onde l’espectador mediu tien más de 50 años-… “

  Nestes condiciones, la RTPA funciona “como’l güertu priváu d’Antonio Virgili y amigos, los que diseñen una programación con pocu o nengún interés, amás de mui baxa calidá. A pesar de too esto, la oposición calla gracies a unos puestos directivos nuevos a repartir a deu ente PSOE, PP y IX. ¿De qué valen les promeses electorales énte la posibilidá de colocar a ún de los nuestros nel conventu? Eso sí, pa llavar la cara echamos dalgún partíu o película n’asturianu de manera residual y con muncha improvisación. Sicasí, parez qu’a los asturianos esto nun-yos val”.

  Y ye que la TPA vuelve zarrar añu rexistrando mínimos históricos, mentes que RPA parez nun existir pa la mayor parte de la ciudadanía: “los asturianos -los pocos que vemos y sentimos RTPA- asistimos plasmaos a una televisión onde l’usu del idioma ye, amás de marxinal, diglósicu, vulgar y centráu no folclórico. Nel casu de la radio, l’asturianu aparez como pingarates a lo llargo de la programación, mentes que la música nesti idioma parez nun existir. ¿Tien sentíu que paguemos una radio que ta pa poner lo mesmo que pue sonar en Cadena Dial o Los 40?”

  El Comunicáu fina con una dura crítica al papel d’aculturación de la TPA: “Estos medios nun son más qu’una ferramienta de sustitución llingüística y d’aculturación. El movimientu de reivindicación llingüística siempre defendió la so existencia, pero nestes condiciones, onde RTPA namás ta al serviciu de los caprichinos d’Antonio Virgili y pa incumplir la llexislación vixente, ye’l momentu de facer un llamáu a la sociedá asturiana pa que reflexone sobre si tien sentíu mantenelos, amás de pagar la deuda xenerada polos sos xestores”.                                                Fonte: asturnews.com

TPA va entamar a emitir partíos de fútbol n’asturianu de forma periódica

Esti domingu va producise la primer emisión d’un partíu de fútbol n’asturianu en TPA. Va ser el Lealtad-Coruxo de Segunda División B, choque que van comentar Miguel Fernandi y Nacio González y que va ser el primeru de munchos, yá que la intención de la direición xeneral del ente ye la de retresmitir al menos un alcuentru al mes.

El partíu programáu al meudía en Les Caleyes va pasar a la historia por ser el primeru que la televisión pública va emitir en llingua asturiana nos sos diez años de vida. Fernandi va ser l’encargáu de llevar el pesu de la retresmisión col acompañamientu nos comentarios de González, col que yá coincidiera en Radio Sele nos partíos del Uviéu.

“Ye un acontecimientu más que simbólicu, yá que la idea ye la de facer al menos un partíu al mes del Lealtad y del Caudal”, esto ye, los dos equipos del país que militen en Segunda División B, esplica Fernandi, que nun descarta que tamién se pudiera emitir n’asturianu dalgún de Tercera División, dependiente d’otra productora. Nesi sen, nun se pueden sumar a esta iniciativa los alcuentros del Sporting y l’Uviéu pol fechu de que RTPA nun tien los derechos de retresmisión de la LFP.

40 años de retrasu

La direición xeneral de RTPA y la Direición Xeneral de Planificación Llingüística y Normalización son les impulsores d’esta iniciativa, pa lo que confiaron nel llabor de Fernandi, trabayador de la radio pública, que debuta asina nuna retresmisión televisiva. “Toi mui contentu por tener esta oportunidá histórica”, destaca’l lluanquín, qu’afirma que’l fechu de que se pueda ver na TPA un partíu de fútbol n’asturianu “ye un pasu mui importante pa la normalización del idioma, como sería tamién informativu”, anque apunta “que vien con 40 años de retrasu”, comparándolo coles emisiones en llingua propia de les otres autonómiques.

El partíu ente’l Lealtad y el Coruxo va disputase a les 12 hores del domingu. El conxuntu maliayu vien cargáu de moral tres la victoria por 2-3 col Somozas, partíu que-y valió p’asentase nuna cómoda décima posición, a cinco puntos de los puestos de peligru. Un trunfu énte’l conxuntu gallegu en Les Caleyes serviría a los de Roberto Aguirre p’alcanzar na tabla al Coruxo, que suma 25 puntos, y roblar asina una gran primer vuelta.

Fonte: asturies.com

La TPA fai una estrena "clandestina" de Los Bolechas

• 
  

La XDLA denuncia que la TPA emitió n'agostu una temporada nueva de "Los Bolechas" ensin nenguna promoción

TPA emitió a primeros d'agostu la segunda temporada de la serie infantil Los Bolechas ensin nenguna promoción, polo que la mayoría de neños asturianos nun s'enteraron y nun pudieron ver esta producción tan importante pa la normalización llingüística.

Según la Xunta "ai que reseñar la espectación que llevantó la emisión de la primer tanda de capítulos nel 2014, y más teniendo en cuenta les poques esperiencies de programación infantil nel nuestru idioma qu'hubo hasta la fecha".

Sicasí, depués d'acabar la primer temporada hubo qu'esperar dos años pa ver capítulos nuevos, lo que acordies cola organización de defensa de derechos llingüísticos "dexa a les clares el desinterés de Virgili y compañía por esti productu, pol públicu infantil y pol futuru del nuestru idioma" y convierte a la TPA "nuna televisión que nun promociona los sos propios espacios, ensin dulda, un casu únicu nel mundu".

La Xunta apunta 3 razones: "primero, que los directivos de la cadena nun conocen el mediu que dirixen y nun saben cómo funcionen les audiencies; segundo, que quieren que la serie sía un fracasu, porque nun quieren emitir más conteníos n'asturianu; o tercero, que nun-yos da más l'audiencia: ellos tán ehí pa cobrar el sueldu y poco-yos importa l'audiovisual, los neños y l'idioma".

Por llei, recuerda la organización "la TPA ta obligada a protexer l'asturianu y a los neños. Vese nos últimos tiempos cómo hai un desinterés en promocionar dellos productos que, chocantemente, siempre son n'asturianu. Parez que s'emiten con desgana, ensin facer ruíu. Otra manera, TPA sigue ensin involucrase n'iniciatives que surden del mesmu Gobiernu asturianu col enfotu de normalizar l'idioma y la so producción cultural".

Como contrapuntu "la cadena sí que patrocina, promociona y retresmite'l Concursu Internacional de Saltos de Xixón con un costu estimáu de 20.000€, una iniciativa privada que muestra qué ye lo qu'interesa a los actuales directivos de RTPA. Pa eso, y pa ellos, sí qu'hai perres".                       Fonte: Asturies.com 

XDLA presenta un llibru sobre televisión y reivindicación llingüística

• 
  

El xueves 21 preséntase en Xixón el llibru "La tele que queremos; televisión pública y reivindicación llingüística n'Asturies".

La  Xunta pola Defensa de la Llingua Asturiana (XDLA) presenta esti xueves 21 el llibru "La tele que queremos; televisión pública y reivindicación llingüística n'Asturies", editáu por Trabe, y que recueye los documentos ellaboraos nos últimos años pola Xunta pola Defensa de la Llingua Asturiana (XDLA) sobre la presencia del nuestru idioma nes emisiones de la RTPA. Documentos que van dende los años noventa, cola reivindicación pola puesta en marcha d’una televisión autonómica 100 % n’asturianu, hasta l’actualidá, col nacimientu de la RTPA y la necesidá, cada día más evidente, de convertila nuna ferramienta al serviciu de la normalización del asturianu.

Nel actu  va presentase esti llibru y habrá un alderique sobre medios de comunicación cola participación d'Esther Prieto, Xosé Ambás, Pablo Quiroga, Carlos Suari  y el músicu gallegu Antón Reixa.

La cita ye'l xueves 21 de xunetu nel Toma 3 (cai Marqués de Casa Valdés 27, Xixón), a partir de les 17:30h. Fonte: Asturies.com

Antón Reixa va acudir a la presentación d'un llibru sobre la TPA

La XDLA edita esti trabayu entituláu 'La tele que queremos; televisión pública y reivindicación llingüística n'Asturies' que se va dar a conocer el día 21.

El músicu, escritor y realizador gallegu, con dellos trabayos na TVG, Antón Reixa va participar nun alderique xunto Esther Prieto, Xosé Antón Fernández 'Ambás', Pablo Quiroga y Carlos Suari sobre los medios de comunicación. Esta mesa redonda siguirá a la presentación del llibru que recueye los documentos ellaboraos nos últimos años polaXunta pola Defensa de la Llingua Asturiana (XDLA) sobre la presencia del nuestru idioma nes emisiones de la RTPA.

Estos conteníos empiecen nos años noventa, cola reivindicación pola puesta en marcha d’una televisión autonómica n’asturianu dafechu, y finen anguaño, col nacimientu de la RTPA y la necesidá, "cada día más evidente, de convertila nuna ferramienta al serviciu de la normalización del asturianu". L'actu va celebrase'l xueves 21, de magar les 17.30 hores, nel xixonés Toma 3 (Marqués de Casa Valdés, 27).

Fonte: Asturies.com

Critiquen qu'en TPA corríxase «fabas» por «habitas» a un neñu nuna conexón en direuto

Inaciu Galán cosidera que «correxir al falante qu'usa una pallabra n'asturianu ye un despropósitu que namás pue dase na TPA»

Europa Press

El presidente de l'asociación Iniciativa Pol Asturianu, Inaciu Galán, criticó esti miércoles la corrección nuna conexón en direuto d'un programa de la Televisión del Principáu d'Asturies a un neñu que pronunció la palabra «fabas», posteriormente matizada pol reporteru: «las habitas».

Foi concretamente nel espaciu De viaje por los coles, emitíu dientro del programa De hoy no pasa. El reporteru pregúnta-y a ún de los neños qué ye lo que ta recoyendo y el neñu respuende: fabas. Esto son las habitas, comenta entós el reporteru.

Galán considera que «correxir al falante qu'usa una pallabra n'asturianu na TPA ye un despropósitu que namás pue dase na TPA». Al so xuiciu, «esti fechu, que nun ye más qu'otru exemplu de lo que ye cada día la TPA, con delles poques esceiciones, nun fai más que confirmar lo que venimos denunciando dende Iniciativa pol Asturianu».

N'opinión de Galán, «fai falta cambiar el modelu de la RTPA d'arriba a abaxo, facer una televisión que valga de ferramienta pa la normalización llingüística y que nun seya xusto lo contrario, un instrumentu de castellanización y afondamientu na diglosia y los prexuicios llingüísticos». «Va pocos meses presentamos un documentu con propuestes pal Mandatu Marcu de la RTPA con idees nesi sen qu'esperamos que se tenga en cuenta pa que coses como estes dexen de pasar», recordó.

Fonte: La voz de Asturias

'Oregón TV' lleva'l I Premiu Pello Sarasola

  'Pieces' taba ente los nominaos al programa de la FORTA más relevante del añu.

  El programa de humor d'Aragón TV llevó'l I Premiu Pello Sarasola, entamáu pola Federación d'Organismos o Entidaes de Radio y Televisión Autonómicos (FORTA) pa gallardonar los meyores programes de les televisiones autonómiques, por un solu votu. Pa esta primer edición taben nominaos, amás de 'Oregón TV', el programa de TPA 'Pieces', amás de 'El foraster' (TV3), 'Aixó es mel' (IB3), 'El punto sobre la historia' (Telemadrid), 'Luar' (TVG), 'Todos los apellidos vascos' (ETB) y 'El legado de...' (Canal Sur).

  El premiu entregóse ayeri en Zaragoza mientres unes xornaes de trabayu que, de manera añal, reúne a los responsables de Programes y Conteníos de les cadenes autonómiques pa intercambiar esperiencies y analizar los programes que meyor furrulen.   Fonte: asturies.com

'Pieces' opta al I Premiu Pello Sarasola

Trátase d'un gallardón creáu pola FORTA pa distinguir al programa más relevante del añu nes televisiones autonómiques.

El programa dirixíu por Ramón Lluís Bande y conducíu anguaño por Tito Montero en TPA va competir por esti premiu con 'El foraster' (TV3), 'Aixó es mel' (IB3), 'El punto sobre la historia' (Telemadrid), 'Luar' (TVG), 'Todos los apellidos vascos' (ETB), 'Oregón TV' (Aragón TV) y 'El legado de...' (Canal Sur). "El Premio Pello Sarasola naz pa premiar la producción autonómica de programes de televisión en xéneros y formatos diferentes, dende los concursos a los docu-reality, los musicales o les series, que promuevan los valores propios de les televisiones autonómiques de FORTA: proximidá, identidad autonómica, incidencia o notoriedá pal territoriu de cobertoria", apunten dende l'organismu qu'agrupa a toes estes canales.

El fallu del gallardón, que lleva'l nome del profesional fináu l'añu pasáu qu'ocupó dellos cargos n'ETB y la FORTA, va dase a conocer güei en Zaragoza.        Fonte: asturies.com