Los autores dramáticos n'asturianu alderiquen sobre l'estáu del sector

• . El sector del llibru n'asturianu participa nuna xornada nel Campoamor
• . "Hai que llograr que la lliteratura n’asturianu tea de moda”

Cartelu del I Alcuentru d'autores dramáticos n'asturianu

 Cultura entama esti alcuentru al rodiu de la creación teatral tres el celebráu a primeros de mes col llibru como protagonista.

 Fernando Padilla, direutor xeneral de Planificación Llingüística y Normalización, va presidir el I Alcuentru d'Autores Dramáticos n'Asturianu, que va comenzar a les 17 hores hores d'esta tarde nel Salón de Té del uvieín Teatru Campoamor. Ésti va consistir en dos meses redondes, siendo la primera 'Escribir teatru n’asturianu anguaño', cola participación de Sergio Buelga, José Ramón Oliva, Dolfo Camilo Díaz y Cristina Muñiz.

 Darréu, va ser el turnu d'Antón Caamaño, Roberto Corte, Xosé Ramón Martín Ardines, Marga Llano y Laura Iglesia, que van aldericar sobre 'El camín a les tables n’asturianu'. Con esta iniciativa, la Conseyería d'Educación y Cultura pretende axuntar a creadores en llingua asturiana pa que traten sobre la situación del so sector, siguiendo la mesma idea que se punxo en práutica'l pasáu día 1 con editores, llibreros, distribuidores y bibliotecarios sobre'l mundu del llibru n'asturianu.                                                                     Fonte: asturies.com

Alonso respuende al PP que nun va frenar el plan esperimental pa facer l’asturianu llingua vehicular en Primaria

por Pablo R. Guardado

El PP entrugó esti xueves na Xunta Xeneral pol plan esperimental pa facer l’asturianu llingua vehicular en Primaria, que pretende llevar a los tribunales. El conseyeru Genaro Alonso respondió a los populares que va ponese en marcha’l cursu viniente “sí o sí”.

El responsable d’Educación y Cultura fixo referencia al artículu 9 de la Llei de Promoción y Usu del Bable/Asturianu, qu’afita que “el Principáu d’Asturies, nel exerciciu de les sos competencies, asegurará l’enseñu del bable/asturianu y promoverá’l so usu dientro del sistema educativu, nos términos previstos nel Estatutu d’Autonomía d’Asturies”, calcando no que se refier al fomentu del so usu na Enseñanza y refugando, como denuncia’l Partido Popular (PP), que’l plan esperimental tenga dalgo que ver cola oficialidá. Asina, fundaméntalu en dicha normativa, aprobada baxo’l Gobiernu de Sergio Marques baxó les sigles populares.

Alonso tamién recordó que los escolinos y escolines qu’escueyan la opción de contar con materies en llingua asturiana van facelo de forma voluntaria, echando en cara al PP la so doble vara de midir con respuetu a la llibertá de les familes. D’igual forma, na so intervención confirmó que les árees nes que se van dar los conteníos en llingua asturiana van ser Ciencies Sociales, Educación Física, Plástica y finalmente Ciencies Naturales.

“El centru va escoyer una de les árees y la llingua castellana va ser la llingua d’una de les sos sesiones selmanales”, apuntó Alonso, qu’incidició que’l plan, “pilotu, esperimental y voluntariu”, va tener como oxetivu fundamental “la meyora de la competencia comunicativa d’aquellos alumnos que formen parte del mesmu, asina como la promoción del usu del asturianu dientro del sistema educativu nos términos previstos nel Estatutu y na Llei d’Usu”.

Fonte: Asturies.com

Alonso va acudir el llunes a Madrid pa retomar la negociación de la creación de la especialidá docente

• 
  
• 
  
• por Pablo R. Guardado

Tres casi un añu paralizada cola escusa dada pol Gobiernu estatal de tar en funciones, Genaro Alonso va retomar esti llunes en Madrid la negociación pa la creación de la especialidá docente. El conseyeru abrió les comparecencies de la Comisión Especial d’Estudiu sobre'l Réxime de Proteición y Promoción del Asturianu.

El secretariu d'Estáu d'Educación, Formación Profesional y Universidaes, Marcial Marín, comunicara n’abril al Gobiernu que la única vía posible pa la reconocencia de la especialidá docente de Llingua Asturiana y Gallego-asturiano yera’l cambiu del real decretu 1834/2008, d'especialidaes, un trámite que xulgara como “imposible” de facer naquel momentu por tar l’Executivu estatal en funciones. Agora, 10 meses depués, Alonso va siguir cola so intención d’aprobar la creación de la especialidá dende Asturies y asina cumplir con esti compromisu vieyu col sector educativu que permitiría dignificar l’enseñu del asturianu y igualaría los derechos de los maestros y maestres del idioma con respeuto al restu de profesionales del sector.

Ésti foi ún de los munchos puntos que tocó’l conseyeru d’Educación y Cultura na apertura na Sala Xovellanos de la Xunta Xeneral de les comparecencies informatives de la Comisión Especial d’Estudiu sobre'l Réxime de Proteición y Promoción del Asturianu, na que tamién participaron Fernando Padilla, direutor xeneral de Planificación Llingüística y Normalización; María Cristina Valdés, direutora xeneral d’Universidaes y Investigación; Ana María Cano, presidenta de l’Academia de la Llingua Asturiana (ALLA); Anxo Manuel Lorenzo, direutor xeneral de Cultura de la Xunta de Galicia; y Carles Martí, senador pol Partit dels Socialistes de Catalunya (PSC). Alonso rellató les midíes que tien el Gobiernu en marcha “col propósitu de fomentar, promover y difundir l’usu del asturianu y del gallego-asturiano en todos los ámbitos sociales”.

Asina, destacó l’adaptación del asturianu al Marcu Común Européu de Referencia de les Llingües, na que lleven más d’un añu trabayandu un grupu d’espertos de Primaria, Secundaria y Universidá d’Uviéu y un representante de l’ALLA, “regularizando los niveles de referencia, del A1 al C1”. Hasta’l momentu, esti llabor yá afitó “los distintos niveles de competencia llingüística, los conteníos lexícos, gramaticales, ortográficos, sociollingüísticos y d’usu”, a lo que va siguir la ellaboración d’un decretu.

Na so intervención posterior, Valdés apuntó qu’esta incorporación del idioma al marcu común “va ser importante pal minor d’asturianu”, yá que fadrá ésti más atractivu pal alumnáu.

Currículu d’Infantil y el proyeutu pilotu

Ente los planes que tien en marcha l’Executivu siguen la modificación del currículu del segundu ciclu d’Educación Infantil pa impartir la asignatura de Llingua Asturiana y Gallego-asturiano nesta etapa y el plan esperimental que permitiría usar l’idioma como llingua vehicular en determinaes materies y cursos de Primaria. En cuanto a los medios de comunicación, el conseyeru indicó que’l so departamentu va incrementar la collaboración cola RTPA p’aumentar la emisión de programas n’asturianu.

L’Institutu Asturiano d’Alministración Pública Adolfo Posada y otres instituciones capaciteas van poner cursos de formación continua para personal del Gobiernu, que va procurar la espublización nel BOPA d’una versión n’asturianu de las distintes lleis, disposiciones o asunciones, indicó Alonso, qu’avanzó que 8 conceyos cuente col espediente d’oficialización toponímica avanzáu y que 13 tienlu en diferentes fases del procesu. Mentes, 4 entovía nun lo solicitaron.

Xunta d’Escritores en Llingua Asturiana

El conseyeru tamién anunció qu’Educación fixo un análisis detalláu sobre’l tratamientu de la llingua asturiana nos llibros de testu y reclamó cambios a aquelles editoriales qu’asoleyaba conteníu con errores, asina como l’unvíu d’una circular a tolos centros educativos recordando l’estatus llegal de la llingua asturiana y la necesidá de que los manuales s’axusten a lo establecío na Llei d’Usu y Promoción del Bable/Asturianu y a los decretos de currículu. D’igual forma apuntó que la Xunta d’Escritores en Llingua Asturiana va convocase una década depués pa favorecer una alderique sobre la creación lliteraria nel país.

Fonte: Asturies.com

“La situación de l’Academia de la Llingua Asturiana ye crítica”, asegura Cano

• 
  

por Pablo R. Guardado

Ana María Cano, presidenta de l’Academia de la Llingua Asturiana (ALLA), afirmó na so comparecencia énte la Comisión Especial d’Estudiu sobre Réxime de Proteición y Promoción del Asturianu de la Xunta Xeneral que la situación de la institución “ye crítica”. Intervención del Gobiernu pon torgues a la tresferencia corriente a la entidá que vien recibiendo dende la so creación al considerala privada.

Cola normativa actual que s'aplica nos presupuestos, l’ALLA ve cambiada la so categoría y obliga-y a recibir una subvención como si fora una entidá privada, dalgo que denunciara Izquierda Xunida (IX) n’avientu y que ta llevando a la institución una situación que fai peligrar la so continuidá tres 37 años de vida. L'ALLA niégase a aceptar esta subvención que conlleva un cambiu d'estatus xurídicu, al igual que refuga renovar l’alquiler de la sede nel Monesteriu de San Pelayo, como anunció Cano esta mañana énte la comisión, y demanda una solución a Educación y Cultura.

El conseyeru Genaro Alonso, mentes, apuntó que’l so departamentu ta trabayando nella y qu'ésta podría llegar con una Llei de l’Academia de la Llingua Asturiana qu’afite’l so usu públicu. Tamién señaló que ta tratando d’atopar un llocal de propiedá nacional pa la institución académica.

Fonte: Asturies.com

El sector del llibru n'asturianu participa nuna xornada nel Campoamor

   Celébrase la I Xornada d'Edición n'Asturianu, que va acoyer dos meses redondes.

  El Salón de Té del uvieín Teatru Campoamor va acoyer esta tarde, de magar les 17 hores, esta iniciativa de la Conseyería d'Educación y Cultura, na que van participar representantes de los distintos sectores venceyaos al mundu del llibru: editores, llibreros, distribuidores, bibliotecarios, etc. El direutor xeneral de Planificación Llingüística y Normalización, Fernando Padilla, va abrir les sesiones de trabayu con una intervención na que va dar datos sobre la edición n'asturianu nos últimos años.

  De siguío van comenzar dos meses redondes, moderaes pola escritora y periodista Ana Vanessa Gutiérrez, 'Los caminos de la edición. ¿Qué pasa col llibru n’asturianu?' y 'L’arte d’editar n’asturianu en 2017. Perspectives', que van contar con representantes de delles editoriales asturianes, l'Asociación de Llibreríes del Principáu d'Asturies, la Rede de Biblioteques Públiques d'Asturies, les empreses de distribución y los medios de comunicación.                                                                                             Fonte: Asturies.com

Asturies va celebrar en Mieres y La Pola el Día de la Llingua Materna

    

La UNESCO celebra’l 21 de febreru’l día de la Llingua Materna y como vieno faciendo dende hai dellos años, Asturies celebralo nesti mes de Febreru en Mieres y Siero.

La Conseyería d’Educación y Cultura va celebralo esti añu nel Auditoriu Teodoro Cuesta de Mieres el 20 de febreru, y el martes 21 nel Auditoriu de La Pola Siero. Amás, nos díes próximos vas disponer n’Educastur d’unos manifiestos pa lleer y comentar nos centros educativos.

Nel añu 2016, y acordies colos oxetivos establecíos na Axenda de Desenvolvimientu Sostenible pal 2030, la UNESCO escoyó un llema nuevu pal Día de la Llingua Materna: Educación de calidá, llingua (llingües) d’enseñanza y resultaos de deprendizaxe. La intención que tien la UNESCO ye dexar bien a les clares la importancia de tolos idiomes, y n’especial les llingües maternes, p’algamar una educación de calidá. L’usu de les llingües minoritaries, asegura l’organismu internacional, aumenta la calidá de la educación, meyorando les capacidaes de comprensión y creatividá; y favorez, nes interaiciones del aula, un arriquecimientu de les rellaciones sociales y de les estratexes comunicatives.

Y asina, “el dominiu y l’usu de toles llingües ameyora la competencia nesti ámbitu y en tolos aspectos onde’l llinguaxe ye una ferramienta necesaria pa entender, compartir, rellacionase y deprender.

Fonte:  Asturnews

Alonso anuncia la creación del Premiu de Teatru Profesional n’Asturianu

 por Pablo R. Guardado

El conseyeru d’Educación y Cultura, Genaro Alonso, anunció na Xunta Xeneral la creación del Premiu de Teatru Profesional n’Asturianu. La Direición Xeneral de Planificación Llingüística y Normalización ta trabayando na so convocatoria próxima.

En respuesta a una entruga plantegada nel Plenu pol diputáu popular Pedro de Rueda sobre qué midíes piensa adoptar el Gobiernu pa impulsar el teatru en xeneral y la industria teatral, en particular, Alonso afirmó que’l compromisu del Executivu col teatru “ye indiscutible”, pa lo que citó les ayudes económiques direutes al Circuitu de les Artes Escéniques, la preocupación por renovalu y reforzalu, y el plantegamientu a iniciatives nueves en torno al sector. Asina, cuantificó en 588.109 euros les ayudes al teatru asturianu al traviés d’un programa que implica a 25 conceyos, 45 compañíes y cerca de 300 representaciones.

“L’impulsu económicu al circuitu nun ye l’únicu que recibe’l teatru asturianu dende’l Gobiernu”, añadió citando los 223.420 euros recibíos pol sector nel 2016 al traviés de les llinies de concurrencia competitiva pa producción, movilidá y proyeutos d’interés nacional, l’Axenda Didáutica, les ayudes a la producción en residencia o la contratación d’espectáculos dientro del programa ‘Vamos’ de la Llaboral Ciudá de la Cultura. Una llista a la que pronto va sumase’l Premiu de Teatru Profesional n’Asturianu, nel que ta trabayando la Direición Xeneral de Planificación Llingüística y Normalización.

No que respeuta a la llingua asturiana, el conseyeru tamién se refirió a l’Axenda Escolar 2017, anguaño en tramitación, qu’inclúi la programación de representaciones teatrales y cuentacuentos nos centros educativos pa los escolinos y escolines de Llingua Asturiana y Gallego-Asturiano.

Semeya obra d'Armando Álvarez.

Fonte: Asturies.com

Adolfo Camilo Díaz gana'l Premiu "María Xosefa Canellada" col rellatu "La mar"

El xuráu, axuntáu en Santolaya de Cabranes, valora "el tratamientu d'una tema social d'actualidá" na obra del escritor de Caborana

Adolfo Camilo Díaz,  IX Premiu María Xosefa Canellada

    L'escritor Adolfo Camilo Díaz foi'l ganador de la novena edición del Premiu María Josefa Canellada de lliteratura infantil y xuvenil en llingua asturiana, que concede la Conseyería d'Educación y Cultura. El xuráu tuvo formáu polos escritores y especialistes nestos xéneros Lourdes Álvarez García, Paz Fonticiella y Vicente García Oliva; l'alcalde de Cabranes, Gerardo Fabián, y el fíu de la escritora María Josefa Canellada (finada en 1995) que da nome al certame, Alonso Zamora. Toos ellos axuntaron ayeri na casa de cultura de Santolaya de Cabranes, so la presidencia del director xeneral de Planificación Llingüística y Normalización, Fernando Padilla, y fixeron públicu'l fallu.

  L'escritor presentar al concursu sol seudónimu Bahir, col relatu "La Mar". El xuráu decidió premiar esta obra por mayoría. Y en la so valoración destacó "el tratamientu d'una tema social d'actualidá, la emigración africana, que se presenta al traviés del protagonista, un adolescente que narra la so esperiencia como si fuera un viaxe iniciático escontra la mar, real y metafórica".

  P'Adolfo Camilo Díaz, escritor, dramaturgu y xestor cultural nacíu en Caborana (Ayer) en 1963, ganar un premiu prestixosu en llingua asturiana nun ye nuevu, yá que foi galardonáu col premiu Xosefa Xovellanos de Novela en dos causes, el de novela curtia de l'Academia de la Llingua Asturiana o'l Premiu Montesín de lliteratura xuvenil. Tien publicaos más de veinte libro de narrativa y d'ensayu, lo mesmo que de testos dramáticos.

   El premiu María Josefa Canellada esta dotáu con 3.000 euros, y esta abiertu a obres de lliteratura infantil o xuvenil, que non necesariamente tienen que ser noveles sinón tamién compilaciones de cuentos, obres de teatros o poemarios.                              Fonte: lne.es

Vanessa Gutiérrez gana’l XXII Premiu Máximo Fuertes Acevedo d’ensayu

El trabayu ‘El paisaxe nuestru’, de Vanessa Gutiérrez, resultó merecedor del XXII Premiu Máximo Fuertes Acevedo d’ensayu qu’entrega la Conseyería d’Educación y Cultura dientro de los sos Premios Lliterarios 2016. Ésti ye’l segundu gallardón que se falla, tres l’Alfonso Iglesias de cómic, de los cinco convocaos.

El xuráu aconceyáu ayeri decidióse por mayoría pol ensayu de la escritora y anguaño presentadora del espaciu ‘Ente toos’ que s’emite na RPA los sábados ente les 16 y 17 hores, al reconocer “el pulsu lliterariu del testu y la modernidá d'una estructura na que se fai dialogar a testos escritos y orales de distintes dómines alredor d'un mesmu paisaxe”, según destaca'l fallu. Fernando Padilla, direutor xeneral de Planificación Llingüística y Normalización, presidió’l mesmu, que tuvo formáu polos escritores y investigadores Luis Casteleiro, José Ángel Gayol –ganador l’añu pasáu con ‘Vértigu. L’atracción del abismu na sociedá contemporánea’–, Marta López Fernández, Elena de Lorenzo y Xosé Miguel Suárez Fernández ‘Tapia’.  

Gutiérrez presentó ‘El paisaxe nuestru’ baxo’l nomatu de Recusa Paigona y lleva una recompensa de 3.000 euros pol gallardón. Nacida n’Urbiés nel 1980, foi redactora del selmanariu ‘Les Noticies’ y presentadora de programes de televisión como ‘Pieces’, amás de collaborar davezu como articulista en ‘El Comercio’.

Autora con Beatriz Redondo Viado del ensayu ‘El país del silenciu’ (2007), la escritora destaca como poeta colos poemarios ‘Onde seca l’agua’ (2003) y ‘La danza de la yedra’ (2004), col que llogró'l Premiu Teodoro Cuesta. Como narradora espublizó ‘Les palabres que te mando’ (2006) y ‘La cama’ (2008). Ye importante destacar que parte de la so obra ta traducida al catalán, al gallegu, al inglés, al checu, al francés y al húngaru, y recoyida en diverses antoloxíes y revistes.

Fonte: Asturies.com

Les subvenciones a medios de comunicación n'asturianu aumenten en 10.000 euros

• . Cultura reduz les subvenciones a medios de comunicación n’asturianu nun 37 por cientu
• . Les ayudes a la producción editorial n’asturianu aumenten en 8.500 euros

Conseyería d'Educación y Cultura, n'Uviéu

La Conseyería d'Educación y Cultura espublizó nel BOPA les ayudes al asturianu y gallego-asturiano. Caltiénense les trés llinies de subvención, siendo'l presupuestu'l mesmu que nel 2015 pa la producción editorial y discográfica, y aumentando en 10.000 euros pa los medios de comunicación.

Con esta convocatoria frénase la tendencia de recortes de los últimos años, con descensos continuos superiores al 50 por cientu nes ayudes al asturianu. Nesta ocasión la medra ye del 5,26 por cientu gracies a los 10.000 euros más que la conseyería dedica a les ayudes a los medios de comunicación qu'empleguen l'asturianu, pasando de 80.000 a 90.000, pero hai que recordar que la cifra del presupuestu dedicada a esta estaya nel 2013 foi de 168.000 euros.

No que respeuta a les subvenciones a la producción editorial, ésta caltiense en 90.000 euros, y la que correspuende a la discográfica, en 20.000.                    Fonte: asturies.com

Adxuntu	Tamañu
convocatoria_subvenciones_llibros.pdf	143.11 KB
convocatoria_subvenciones_medios_de_comunicacion.pdf	143.52 KB
convocatoria_subvenciones_discos.pdf	135.82 KB

El IX Premiu al Meyor Cantar va tener en cuenta los temes del 2014 y 2015

• Cultura recupera'l Premiu al Meyor Cantar

  L'ausencia del Premiu al Meyor Cantar l'añu pasáu lleva a la Conseyería d'Educación y Cultura a tener en cuenta los temes del 2014 pa la novena edición del gallardón. El plazu pa presentar creaciones fina'l día 15 d'esti mes.

  El Premiu al Meyor Cantar pretende visibilizar el talentu de los ceadores musicales qu'usen la llingua asturiana o'l gallego-asturianu en composiciones que sían orixinales y nueves dafechu. Dende la so creación, nel 2007, vieno premiando'l meyor tema del añu anterior, pero dao'l parón qu'hebo nesti gallardón l'añu pasáu, nesta novena edición la conseyería va tener tamién en cuenta los del 2014.

  El plazu pa presentar creaciones fina'l vienres 15. Éstes han de ser obres musicales de creación orixinal, tanto na lletra como na música, quedando escluyíes, poro, les pieces tradicionales, les versiones o adaptaciones d'obres de creación publicaes orixinalmente n'otra llingua y los cantares que nun foran editaos y grabaos por primer vez nel 2014 o nel 2015.

  Un xuráu presidíu por Fernando Padilla, direutor xeneral de Planificación Llingüística y Normalización, va escoyer, ente tolos aspirantes, al menos cinco finalistes que van participar na Gala del Premiu al Meyor Cantar, prevista pa finales de setiembre. La recompensa del ganador va ser una escultura orixinal y esclusiva d'un artista del país amás de la promoción y difusión del tema y grupu o artista vencedor.                                              Fonte: asturies.com

Adxuntu	Tamañu
convocatoria_del_ix_premiu_al_meyor_cantar.pdf	315.52 KB