IX plantega l’asturianu como prioridá nel presupuestu

IX plantega les sos prioridaes al executivu asturianu pa la ellaboración del presupuestu y esixe una xunta tripartita pa garantizar que’l presupuestu tenga mayoría de votos na cámara asturiana.  

IX solicitó esti llunes una xunta tripartita, na que tea presente Podemos, pa ver el proyeutu enantes de la so presentación na Xunta Xeneral. Les prioridaes d’IX, como yá manifestó la coalición, tán centraes nel salariu social y el rescate social, la educación de 0 a 3 años y el contratu programa cola Universidá, y na salú pública y la salú mental, el mediu ambiente, la igualdá de xéneru, l’asturianu y la cooperación al desenvolvimientu.

Nesta xunta, de daqué más de dos hores que sirvió pa oldear posiciones, IX volvió amosar la so disponibilidá a solucionar l’erru de saltu y a ameyorar l’impuestu de patrimoniu, la llucha anti fraude y establecer impuestos ambientales, de manera que la recaldación calténgase y ameyórese la xusticia fiscal. Nesti sentíu, IX espera que se materialice una xunta de los trés partíos y si nesta produz un acercamientu, y namái si hai certidume de mayoría, el  grupu parllamentariu d’IX va poner en manos de la dirección de la coalición la decisión final.
Fonte: Asturnews

Iniciativa pol Asturianu denuncia que’l procesu participativu del presupuestu de Xixón nun ufre la documentación n’asturianu

   Un ciudadanu denunció esti xueves nel Centru Municipal de L’Arena, en Xixón, la falta de la documentación precisa pa participar nel procesu de presupuestu participativu abiertu pol Conceyu de Xixón.

  Darréu d’esta denuncia, Iniciativa pol Asturianu vieno acabante denunciar esta situación que supón una novedá nel enfotu que davezu amosaba’l Conceyu de Xixón na normalización llingüística.                                                                      Fonte: asturnews.com

L’ALLA llama a los partíos favoratibles al asturianu a presentar enmiendes al presupuestu, que considera insuficiente

1.570.664 euros ye la cantidá destinada a la política llingüística pal 2016, esto ye, 1,5 euros por asturianu. “Plantegar que se pue facer dalgo con esi presupuestu ye daqué ofensible”, afirmen dende la institución académica.

L’Academia de la Llingua Asturiana (ALLA) amuesa la so deceición llueu de conocer pelos medios de comunicación la propuesta presupuestaria destinada al asturianu. “Les espeutatives yeren otres darréu del pautu d’investidura algamáu ente la FSA-PSOE ya IX, tamién tres la proposición non de llei aprobada –a mediaos d’ochobre pasáu– mayoritariamente nel Parllamentu asturianu colos votos favoratibles d’IX, PSOE, Foro y Podemos, asina como dempués del alcuerdu presupuestariu pal exerciciu viniente ente’l Gobiernu d’Asturies y el grupu parllamentariu d’IX”, señalen dende la institución, qu’asegura que “plantegar que se pue facer política llingüística con un presupuestu de 1.500.000 d’euros, esto ye, 1,5 euros por asturianu, ye daqué ofensible pa toles persones con una mínima sensibilidá llingüística y cultural asturiana”.

En comparanza coles llingües d’otres zones del Estáu, la situación del asturianu ye llaceriosa. Según los datos apurríos pola ALLA, Galicia y la Comunitat Valenciana tripliquen por persona’l presupuestu asturianu; Illes Balears, pela so parte, cuadriplícalu. Mentes, l’aranés multiplica la cantidá d’euros por persona invertíes por 10. Nel casu navarru, territoriu cola metá de población qu’Asturies y con una proporción d’usuarios de la llingua autóctona que nun sobrepasa’l 10 por cientu de la población, el Gobiernu dedica a política llingüística 4.000.000 d’euros.

Soluciones a una situación “que nos avergoña como asturianos”

“Na nuesa comunidá, llueu de lo anterior, faise dafechu imposible falar de recuperación llingüística – y mesmamente de política llingüística favoratible– cuando se cunta con unos recursos tan escandalosamente insuficientes. Ye verdá qu’hai midíes que dependen esclusivamente de la voluntá política de los xestores institucionales y que puen facese a coste cero – por exemplu, les rotulaciones de nueves instancies y servicios públicos cuesten tanto n’asturianu como en castellanu; espublizar un anunciu institucional nos medios de comunicación cuesta lo mesmo n’asturianu qu’en castellanu; etc. –, pero ye verdá qu’hai otres munches midíes que nun se puen llevar alantre, nin n’Asturies nin en dengún otru sitiu, si nun van acompañaes del encontu económicu que les faiga creyibles”, entienden dende l’ALLA.

Por esti motivu, la insititución presidida por Ana María Cano quier llamar l’atención sobre’l problema pa que “de nengún mou se puea repitir situación asemeyada n’años venideros”, al empar que llama a los partíos políticos que llevaron nos sos programes midíes concretes de política llingüística “la necesidá de plantegar enmiendes parciales a los presupuestos del 2015 que meyoren les partíes económiques destinaes a la llingua y cultura d’Asturies”.

“Ye obligación de l’Academia de la Llingua Asturiana denunciar una situación oxetivamente inxusta y fondamente discriminatoria, una vegada más, pa la llingua asturiana y pidir a los partíos políticos con representación na Xunta Xeneral del Principáu d’Asturies qu’igüen una situación que nos avergoña como asturianos”, añede.                             Fonte: Asturies.com

El presupuestu pal asturianu plantega un gastu y aiciones asemeyaes a 2015

El presupuestu pasa de los 1.552.684 € en 2015 a 1.570.664 €, un 1'2% d'aumentu - Les aiciones propuestes son les mesmes qu'en 2015, anque s'amiesten dos oxetivos rellacioaos cola RTPA y el Plan de Dignificación

La descripción de la política llingüística que se va llevar alantre y les aiciones que se van poner en marcha (9 puntos) son les mesmes qu'en 2016, según el testu presentáu pol gobiernu que sigue al pie de la lletra nestos apartaos el de 2015.

No que toca a los oxetivos, a los cinco puntos qu'incluyía'l presupuestu de 2015 améstense dos: ún que fala de "iniciar la elaboración del plan de Dignificación Lingüística" y otru referíu al incrementu del usu del asturianu de forma normalizada na RTPA.

El presupuestu ye mui asemeyáu al de 2015, pasando de los 1.552.684 € en 2015 a los 1.570.664 € que conseña'l proyectu presentáu, ye dicir un aumentu d'alredor del 1'2%.

Fonte: Asturies.com

El Gobiernu destinará más perres pal asturianu

La financiación de l’ALLA duplicaríase. Educación y Cultura quier dar visibilidá al idioma al traviés d’espectáculos deportivos.

Según una información espublizada na edición del diariu 'La Nueva España', el Gobiernu de la FSA-PSOE destinará más perres pal asturianu nel 2016 tres años de recortes continuos. Sería la manera de cumplir les midíes alcordaes con Izquierda Xunida (IX) nel pautu algamáu cola coalición pa la investidura de Javier Fernández como presidente del país.

L'aumentu de les partíes tendría como destinatariu principal a l'Academia de la Llingua Asturiana (ALLA), que tres años afogada polos retayos, ensin la posibilidá de llevar a imprenta munchos trabayos, vería duplicada la partida actual. La Conseyería d'Educación y Cultura, dirixida nesta llexislatura por Genaro Alonso, tamién pretende acelerar el procesu de recuperación toponímicu, asina como trabayar pol usu de los mesmos por parte de toles alministraciones.

No que respeuta a les subvenciones, éstes tendríen delles modificaciones pa que foran más efeutives, adaptándoles a la realidá d'Asturies y a les necesidaes de los sos solicitantes. Por último, la conseyería pretende aprovechar el tirón de los espectáculos deportivos nel país pa dar mayor visibilidá al idioma.

Fonte: Asturies.com

Pola llingua asturiana

Juan José Porta Tajadura (Xixón)

   Dada la urxencia de que la llingua reciba por parte del gobiernu asturianu la oficialidá que tanto necesita y de pasu poder beneficiase de les ventaxes culturales y económiques que reportaría a la población y al erariu públicu, apurro dalguna consideración que bien podría tenese en cuenta por parte de los nuesos rexidores.

   La oficialidá de la llingua asturiana, ye dicir, el so reconocimientu oficial, fai años que tendría qu'habese llevao a cabu polos gobiernos democráticos asturianos, tanto dende la izquierda como dende la derecha. Muncho falaron unos y otros del asuntu pero que nun s'avinieron a consideralu apurriendo argumentos y desplicaciones nada reales nin convincentes, bien porque nun tocaba, nun convenía, o cenciellamente porque nun interesaba. Na actualidá dalgún partíu que sustenta al gobiernu y que paez, sobremanera en dalgunos foros y en dalgunas ocasiones tan solo, tar convencíu d'esta necesidá d'oficializar la llingua asturiana, fala, diz, comenta, paez que sí apoya la idega, pero paez ser de conveniencia namás, porque ante'l temor de nun salir na semeya callen, acaten y secunden al partíu que-yos permite tocar dalgo de poder, anque en ciertes ocasiones, nel Congresu de los Diputaos por exemplu, da la impresión de que s'escaecen de la so llingua con fechos bien bultables.

   Otru tema nel entornu de la enseñanza y n'otros foros culturales ye'l que se refier al complicáu y escasu apoyu económicu por parte del gobiernu asturianu a la enseñanza de la llingua en colexos ya institutos pues cada aniciu de cursu escolar, debátese sobre la falta de profesoráu d'asturianu asina como la conveniencia o non d'apurrir profesoráu d'asturianu enforma a los centros concertaos.

   Esperamos llegar ceo al reconocimientu oficial de la llingua asturiana por parte del nuesu gobiernu autonómicu, que fadría mui bien n'escuchar, non solo oyír, al pueblu que lo reclama por activa y por pasiva.
 
Fonte: La Nueva España dixital

Pola llingua asturiana

Juan José Porta Tajadura (Xixón)

Dada la urxencia de que la llingua reciba por parte del gobiernu asturianu la oficialidá que tanto necesita y de pasu poder beneficiase de les ventaxes culturales y económiques y económiques que reportaría a la población y al erariu públicu, apurro dalguna consideración que bien podría tenese en cuenta por parte de los nuesos rexidores.

La oficialidá de la llingua asturiana, ye dicir, el so reconocimientu oficial, fai años que tendría qu’habese llevao a cabu polos gobiernos democráticos asturianos, tanto dende la izquierda como dende la derecha. Muncho falaron unos y otros del asuntu pero que nun s’avinieron a consideralu apurriendo argumentos y desplicaciones nada reales nin convincentes bien porque nun tocaba, nun convenía, o cenciellamente porque nun interesaba. Na actualidá dalgún partíu que sustenta al Gobiernu y que paez, sobremanera en dalgunos foros y en dalgunes ocasiones tan sólo, tar convencíu d’esta necesidá d’oficializar la llingua asturiana, fala, diz, comenta, paez que sí apoya la idega, pero paez ser de conveniencia namás, porque ante’l temor de nun salir na semeya callen, acaten y secunden al partíu que-yos permite tocar dalgo de poder, anque en ciertes ocasiones, nel Congresu de los Diputaos por exemplu, da la impresión de que s’escaecen de la so llingua con fechos bien bultables.

Otru tema nel entornu de la enseñanza y n’otros foros culturales ye’l que se refier al complicáu y escasu apoyu económicu por parte del Gobiernu asturianu a la enseñanza de la llingua en colexos y institutos, pues cada aniciu de cursu escolar, debátese sobre la falta de profesoráu d’asturianu asina como la conveniencia o non d’apurrir profesoráu enforma a los centros concertaos.

Esperamos llegar ceo al reconocimientu oficial de la llingua asturiana por parte del nuesu Gobiernu asturianu autonómicu, que fadría mui bien n’escuchar, non sólo oyer, al pueblu que lo reclama por activa y por pasiva.

Fonte: La Nueva España

El PP vota en contra de la propuesta d’igua de la definición del términu ‘asturiano’ nel DRAE

por Pablo R. Guardado

Una proposición non de llei d’Izquierda Xunida (IX) sobre’l cambiu de definición del términu ‘asturiano’, ente otros, nel diccionariu de la RAE pa que s’axuste a la realidá, foi valtada pol Partido Popular (PP). El diputáu de Foro Enrique Álvarez Sostres votó a favor d’iguar la situación.

Esta demanda vieya, que movió nel 2012 Iniciativa pol Asturianu ensin ésitu pese a que la Real Academia Española (RAE) se comprometiera a estudiar la propuesta, recuperóla IX col rexistru d’una proposición non de llei firmada por Gaspar Llamazares na qu’encamentaba al Gobiernu estatal a que, “en cumplimientu del mandatu constitucional de respetu y protección de les llingües españoles, solicite a l'Academia qu'estudie cuatro modificaciones nes entraes del diccionariu, referíes a la llingua asturiana”. Estos términos son ‘asturiano’, ‘bable’, ‘asturleonés’ y ‘leonés’.

La votación de la mesma fíxose’l miércoles na Comisión de Cultura del Congresu y contó col votu favoratible de Foro, pero la negativa del PP impidió que saliera alantre. Álvarez Sostres fixo una defensa de la llingua asturiana na so intervención y apuntó que “bable y asturianu funcionen yá como sinónimos. Llingüísticamente ye absurdo siguir calteniendo que’l bable, esto ye, l’asturianu, ye un dialeutu. Lo ye del llatín, nidio, como toles llingües romances, pero non del castellanu como se dexa ver na acepción del DRAE”.

Perres asturianes pa la RAE

Iniciativa pol Asturianu llamenta “fondamente que'l Partíu Popular volviera a torgar l'aprobación d'una propuesta positiva pal asturianu nel Congresu, como yá fizo dos años siguíos cola nuesa propuesta pa dotar a l'Academia de la Llingua Asturiana de presupuestu estatal”, y recuerda que los pequeños cambios que realizó la RAE na edición última del so diccionariu nun iguaron la situación. “‘Bable’ pasó de definise como ‘Dialecto de los asturianos’ a ‘Perteneciente o relativo al asturiano o a los bables’ y como ‘Variedad actual del asturleonés’, ensin dexar nidia la so categoría de llingua. Na entrada ‘asturiano’ qu'enantes nun tenía nenguna aceición dedicada a la cuestión llingüística, agora la cuarta recueye ‘Variedad actual del asturleonés que se habla en Asturias’. El casu más grave dase na definición del términu ‘asturleonés’ que da por muerta a la llingua, al definila como ‘Dialecto romance que se hablaba en Asturias y en el antiguo reino de León’, casu asemeyáu al de la definición de ‘leonés’”, esplica.

Dada la situación, esti coleutivu demanda a la Xunta Xeneral “que tome midíes contra esti agraviu provocáu pola Real Academia Española”. Asina, pide que se retiren de los Presupuestos la partida destinada pa la Fundación Pro Real Academia Española, una aportación económica que namái da, amás d’Asturies, Murcia y Cantabria. “Somos la única comunidá con academia que nun recibe perres y la única de toes elles que dedica parte del so presupuestu a financiar a la RAE. A la vista de la falta de respetu y reconocencia de la RAE pa col asturianu, paezmos que ye'l momentu de retirar esta partida en favor de la infrafinanciada Academia de la Llingua Asturiana”, esixe Iniciativa pol Asturianu.

Fonte: Asturies.com

Iniciativa pol Asturianu recuerda que la RAE recibe una partida del presupuestu autonómicu mientres marxina a la llingua asturiana

Iniciativa pol Asturianu asoleyaba esti vienres una nota de prensa na que recuerda que la RAE recibe una partida del presupuestu autonómicu mientres marxina a la llingua asturiana nel so diccionariu. La organización pidiere yá en 2012, con un informe avaláu por profesores de diez universidaes del mundu enteru, que la RAE camudara la definición del asturianu na nueva edición. Dende Iniciativa pol Asturianu siguen con interés la propuesta presentada nel Congresu los Diputaos por Gaspar Llamazares pa solicitar a la Real Academia Española'l cambiu na definición de los términos "asturiano", "bable", "asturleonés" y "leonés" nel so Diccionario, que ta acabante estrenar edición. La entidá presentó yá en 2012 un informe que foi entregáu en mano nel llar de la institución en Madrid. L'informe, nel que se daben razones esclusivamente ciéntifiques, taba avaláu por un llistáu de prestixosos filólogos de diez universidaes alredor del mundu enteru, y recibió como respuesta de la RAE'l compromisu de tenelu en cuenta a la hora de realizar esta nueva edición qu'entós taba en preparación". La intención d'Iniciativa "foi entós tratar el tema como una cuestión ciéntifica y dientro del campu del rigor filolóxicu, pero dicen na nota de prensa que vieron "como la RAE nun taba dispuesta a reconocer al asturianu como la llingua que ye nel so diccionariu y namás llevó alantre tímides reformes nes entraes del so diccionariu, que nun iguaron la situación". Na asociación. feliciten al diputáu por Asturies, Gaspar Llamazares pola so propuesta nel parllamentu español, asina como a les fuercies polítiques que votaron a favor, llamentando fondamente que'l Partíu Popular volviera a torgar l'aprobación d'una propuesta positiva pal asturianu nel Congresu, como yá fizo dos años siguíos cola nuesa propuesta pa dotar a l'Academia de la Llingua Asturiana de presupuestu estatal. Na nota asoleyada esti día despliquen tamién delles otres cuestiones alrodiu de la propuesta que recoyemos darréu. ¿Cómo quedaron les coses nel Diccionario de la RAE? Asina "bable" pasó de definise como "Dialecto de los asturianos" a "Perteneciente o relativo al asturiano o a los bables" y como "Variedad actual del asturleonés", ensin dexar nidia la so categoría de llingua. Na entrada "asturiano" qu'enantes nun tenía nenguna aceición dedicada a la cuestión llingüística, agora la cuarta recueye "Variedad actual del asturleonés que se habla en Asturias". El casu más grave dase na definición del términu "asturleonés" que da por muerta a la llingua, al definila como "Dialecto romance que se hablaba en Asturias y en el antiguo reino de León", casu asemeyáu al de la definición de "leonés" "¿Qué pidimos agora?" Agotada la vía filóloxica, la nuesa solicitú pasa agora por pidir al parllamentu asturianu que tome midíes contra esti agraviu provocáu pola Real Academia Española. Pa ello, solicitamos a los partíos presentes na Xunta Xeneral que retiren de los presupuestos autonómicos la partida dirixida a la Fundación Pro Real Academia Española, que la nuesa comunidá vien pagando dende va años, en solitariu, xunto a Murcia y Cantabria, mientres l'Academia de la Llingua Asturiana nun recibe nin un euru de los Presupuestos Xenerales del Estáu, como sí reciben les academies española, gallega, vasca y catalana. Somos la única comunidá con academia que nun recibe perres y la única de toes elles que dedica parte del so presupuestu a financiar a la RAE. A la vista de la falta de respetu y reconocencia de la RAE pa col asturianu, paezmos que ye'l momentu de retirar esta partida en favor de la infrafinanciada Academia de la Llingua Asturiana. Fonte: Asturnews

El proyeutu presupuestariu contempla una baxada pa Política Llingüística de cerca'l 5%

IVÁN LLERA Xuben les partíes pa servicios de normalización y Academia de la llingua y baxen les sovenciones a medios de comunicación, música y llibros n'asturianu. Sanidá consume'l 39% del presupuestu El proyeutu de presupuestos pa 2014 presentáu pol Gobiernu d'Asturies y pendiente d'alderique na Xunta Xeneral contempla una baxada del 4,9% pa los fondos de Política Llingüística. D'aprobase, la direición xeneral d'Ana Fueyo vería amenorgada la so partida en 106.735 euros , pasando de 1.706.735 euros d'anguaño a los 1.623.624 previstos pal 2014. La propuesta de cuentes de la FSA-PSOE pal próximu añu ameyora la partida pa l'Academia de la Llingua Asturiana en casi 3.000 euros, hasta los 170.000 euros, y caltién el presupuestu de los premios lliterarios nos 15.000 euros. Amás, amonta les sovenciones a los conceyos pal caltenimientu de los servicios de normalización llingüística, que pasa de los 157.000 a los 176.400 euros pola incorporación de los nuevos servicios de Castrillón y Llanes. Les ayudes a la normalización repártense ente: Mancomunidá de la Sidra (15.840), Mancomunidá del Cabu Peñes (14.400), Avilés (12.960), Siero (14.400), Mieres (9.360), Llangréu (14.400), Llena (14.400), Cangas del Narcea (14.400), Samartín del Rei Aurelio (9.360), Corvera (12.960), Llaviana (9.360), Mancomunidá Oscos-Eo (15.840), Castrillón (9.360) y Llanes (9.360). Les que sí que caen son les ayudes a la normalización del asturianu nos medios de comunicación, que pasen de 168.000 euros anguaño a 127.000; la música n'asturianu pierde 16.000 euros y pasa de los 40.000 de 2013 a 24.000 pal próximu añu; mientres que les publicaciones n'asturianu caen hasta los 90.000 euros (-10.000). "Falta de compromisu" Pa la Xunta pola Defensa de la Llingua Asturiana el proyeutu de cuentes "nun vien más que a sumase a más brutales recortes que vien sufriendo la supuesta 'política llingüística' gubernamental nos últimos años" y añeden que los recorte fain ver que "les verdaderes intenciones de la clase dirixente asturiana son facer desaparecer la llingua de la nuestra memoria y el nuesu futuru". Pa Inaciu Galán, presidente d'Iniciativa pol Asturianu, estes cifres amuesen la "falta de compromisu cola normalización del asturianu" y rescampla que "lo más grave nun ye la baxada de la cantidá, sinón que les partíes nun tán diseñaes pensando en normalizar l'asturianu". Galan propón un nuevu modelu nes que les sovenciones a los medios de comunicación dexen de llimitase a páxines concretes "en llugar de sovencionar un usu por porcentaxes, qu'equilibre l'usu del asturianu ente les distintes seiciones del periódicu o la programación d'un mediu audiovisual". Fonte: Queyeho.com

Día de les Llibreríes

En 2014 habrá un fondu pa mercar llibros n'Asturianu sigún adelantó'l vicenseyeru na presentación del Día de les Llibreríes En 2013 destináronse 300.000 euros a la compra de llibros per parte del Principáu L'Asociación de Llibreríes del Principáu d'Asturies presentó ayeri les actividaes enmarcaes nel Día de les Llibreríes, que se va celebrar a lo llargo d'esti vienres 29, nun actu nel que participaron el viceconseyeru de cultura, Alejandro Calvo, y el presidente de l'Asociación, Luis Martín. Martín incidió en que'l sector ta viviendo una crisis "bien dura, pero reversible" debíu en gran midida al descensu de les vientes, la piratería de llibros electrónicos, el zarru de llibreríes y la falta de compra institucional. Y Calvo adelantó que'l Principáu destino 300 mil euros a mercar llibros nesti añu 2013 y que nel 2014 incluyirá una partía pa llibros n'asturianu. Martín tamién llamó a les instituciones a "salir de la babayada na que tamos metíos" y pidió qu'animen a lleer "percima de too" porque "nos llibros tán toles respuestes". Per tercera vegada celebrase'l Día de les Llibreríes a nivel nacional, lo que sirvió pa que'l presidente d'a Asociación asturiana asegurara que toles llibreríes del Principáu (unes 200 de les que 80 tan acomuñaes) van participar na xornada. Mientres el día va haber distintes actividaes como un descuentu del 5% nos llibros, paseos lliterarios per ciudaes, creación de marcapáxines, llectures programaes y cuentacuentos ente otres. Alejandro Calvo, pela so parte afondó na situación del sector llibreru. Aseguró qu'anque'l sector ta en crisis, dende'l Principáu son optimistes col futuru del llibru en papel. El viceconseyeru dixo qu'en 2013 destináronse 300.000 euros a la compra de llibros per parte del Principáu. Nos Presupuestos de 2014, adelantró que se va incluyir tamién un fondu pa la compra de llibros n'asturianu. Lleer más: El sector del llibru ta viviendo una crisis "bien dura pero reversible" pol descensu de vientes y la piratería. Fonte: Asturnews

ERC reconoz que s'enquivocaron y afita la so defensa de la llingua asturiana

Joan Tardà reconoz dafechu qu'ERC nun votó la enmienda de FORO porque s'enquivocaron y afita la so defensa de la Llingua En rempuesta a les xestiones rializaes por Andecha Astur pa conocer cuala yera la causa pola qu'ERC votare a la escontra de la emienda de Sostres pal financiamientu de l'ALLA, el diputáu d'ERC nel Concresu español respuende con un mensaxe que p'Andecha confirma la denuncia d'inresponsabilidá y oportunismu de Foro al presentar esta emienda ensin facer dengún llabor col restu de los diputaos que podríen sofitala, pero que lo que fai ye cenciellamente reconocer la equivocación d'ERC. Pola claridá de les declaraciones de Joan Tardà, Andecha Astur camentaba interesante espublizales íntegramente na so web y nós reproducímosles darréu: "Compañeros de Andecha Astur, Lo vivido estos últimos días me ha parecido francamente lamentable. He recibido todo tipo de insultos y todavía ahora no me los acabo de creer. Que la gente de Esquerra, después de toda nuestra trayectoria en el Congreso de defensa de todas las lenguas "minoritarias" tengamos que presenciar lo que ha ocurrido estos días es, repito, lamentable. Ya lo dije, no votamos la enmienda de Foro Asturiano porque nos equivocamos. Casi 4000 enmiendas, miles de votaciones y nos equivocamos en una! Por cierto votamos a favor de la que defendió IU en apoyo de la lengua asturiana. Y la del Foro, se nos pasó. Lo dije ya en las redes sociales. Lo más cínico e impresentable es que se nos acuse a nosotros. ¿Acaso el PP votó a favor de las enmienda? Quien se cargó la enmienda fue el PP. Resulta que Foro no consigue el apoyo del PP y nos hace responsables a nosotros? ¿Acaso si hubiéramos votado a favor se hubiera ganado? Repito, lamentamos habernos equivocado, pero también digo que estamos hablando de miles de enmiendas y horas de votaciones. Nos parece muy, muy injusto el trato recibido. En todo caso, nuestra manera de pensar y concebir la lucha por la normalización y oficialización de las lenguas perseguidas sigue intacto. Y con ello, nuestra solidaridad con los asturianos y su lengua propia." Fonte: Asturnews

Iniciativa pol Asturianu llamenta’l vetu del PP a una partida pa l’ALLA nos Presupuestos Xenerales pa 2014

Tolos diputaos asturianos menos los del PP apoyen les enmiendes presentaes nel Congresu. La votación de les dos enmiendes a los Presupuestos Xenerales del Estáu pa 2014 pa llograr financiación estatal pa l'Academia de la Llingua Asturiana (ALLA) presentaes por Foro ya Izquierda Xunida nel Congresu de los Diputaos fueron refugaes col votu en contra de la mayoría del PP. L'asociación llamenta que los diputaos asturianos populares votaren en contra d'estes enmiedes dempués de, dicen, les pallabres positives que-yos espresaren les diputaes populares Ángeles Ahuja y Carmen Maniega na visita que-yos fizo'l presidente de la organización, Inaciu Galán, nel mes de febreru na sede parllamentaria, en Madrid. La organización aguarda que'l PP apoye a la fin estes enmiendes nel trámite que van pasar pel Senáu nestos díes, yá qu'ensin los votos del PP, que tien mayoría absoluta nes dos cámares, ye imposible aprobar esta partida pa l'ALLA, la única de les academies de llingües d'España que nun tien financiación estatal. Iniciativa pol Asturianu felicita a Foro ya Izquierda Xunida por presentar estes enmiendes y a les formaciones que les votaron, toes menos el PP y UPyD y nel casu de la de la formación casquista, tamién el diputáu d'IX por Asturies, Gaspar Llamazares, y Esquerra Republicana de Catalunya, dambos por cuenta d'un "erru procedimental". Fonte. Quéyeho!

N'Ast critica la perda 145.000 € al nun ser l’asturianu llingua oficial

Nun comunicáu fechu públicu esti día, l'asociación N’AST llamenta "la ocasión perdía de consiguir financiamientu estatal pa l’Academia de la Llingua Asturiana (ALLA)". Nos caberos díes el Congresu los Diputaos acoyó la votación de delles enmiendes presentaes polos estremaos grupos parllamentarios a los Presupuestos Xenerales del Estáu pal añu 2014 y una d’elles, presentada por Enrique Álvarez Sostres, diputáu de Foro Asturias, pidía apurrir 145.000 € a la institución asturiana, que nun tien fondos públicos estatales al nun ser l’asturianu llingua oficial. La enmienda foi refugada colos votos de PP, UPyD y ERC, polo que l’ALLA va siguir ensin recibir nin un céntimu d’un presupuestu al que contribuyimos tolos asturianos. En N’AST llama-yos especialmente l’atención "el votu a la escontra d’Esquerra Republicana de Catalunya, formación que supuestamente ye sensible al fechu diferencial asturianu (nel pasáu incluso foi socia de la organización política Andecha Astur na coalición Europa de los Pueblos), pero ye bona preba de que, a la hora la verdá, caún mira namás que polo suyo". Yá nun-yos sorpriende tanto la postura de los diputaos asturianos, "especialmente de Gaspar Llamazares, que s’abstuvo na votación, ello ye, nun votó a favor de la midida. Izquierda Xunida, igual que pasare apocayá col casu de les multes de Mieres, tornó a quitar la mázcara cola que s’antroxa de defensora de la llingua asturiana pa dexar bien nidio qu’una cosa ye lo que dicen defeder y otra lo que realmente defenden". En resume, pa N’AST nun sólo l’ALLA vieno acabante de perder 145.000 €, "ye Asturies la que los pierde, y esti fechu vuelve a poner bien a les clares la situación d’anormalidá democrática que tamos viviendo n’Asturies, derivada de la falta d’oficialidá de la llingua asturiana, y la necesidá de la mesma –la oficialidá– qu’ampare los drechos llingüísticos del pueblu asturianu y que, en casos como esti, favoreza la llegada de perres de los Presupuestos Xenerales del Estáu a Asturies, que nunca nun tan de más". Fonte: Asturnews

El Congresu español refuga dotar de presupuestu estatal a l'Academia de la Llingua Asturiana

PP, UPyD y ERC votaron a la escontra, destacando tamién l'abstención de Gaspar Llamazares.

El Congresu de los Diputaos trató durante los caberos díes distintes enmiendes presentaes polos grupos parllamentarios en rellación colos Presupuestos Xenerales del Estáu del añu viniente. Una de les enmiendes a tratar yera la rellacionada cola dotación d'un presupuestu estatal d'unos 145.000 a l'Academia de la Llingua Asturiana, privada de dineru públicu estatal al nun ser l'asturianu una llingua cooficial.

Na votación de la enmienda presentada pol diputáu de Foro Enrique Álvarez Sostres, los representantes políticos nel congresu español votaron mayoritariamente a la escontra de la propuesta, colos votos negativos de PP, UPyD y ERC. La formación catalana refugó de forma surpriendente la propuesta, votada a la escontra polos sos 3 diputaos.

Tamién ye destacable l'abstención de Gaspar Llamazares, diputáu d'Izquierda Unida pola circunscripción asturiana, y únicu representante del grupu parllamentariu "Izquierda Plural" que nun votó a favor de la midida. Poro, l'Academia de la Llingua siguirá ensin recibir un solu céntimu por parte del estáu español nos sos PXE.

Fonte: Infoasturies

Tamién IX demanda presupuestu pa l'ALLA nuna enmienda nos PXE

Foro y IX demanden una partida pa l'ALLA nes sos enmiendes a los Presupuestos Xenerales del Estáu

   143.000 y 75.000 euros. Éstes son les cantidaes que demanden Foro y IX, de manera respeutiva, pa l’ALLA nes sos enmiendes a los Presupuestos Xenerales del Estáu. Iniciativa pol Asturianu felicita a les dos formaciones por dar esti pasu.

   Ésti ye’l primer añu nel que Foro presenta enmiendes a los Presupuestos Xenerales ellaboraos pol Gobiernu de Mariano Rajoy –n’años anteriores, astúvose na votación– y nella inclúi un pidimientu de 143.000 euros pa l’Academia de la Llingua Asturiana (ALLA) pa “abrir una llinia de financiación” pa la institución al entender que “la Constitución garantiza la proteición de toles llingües y modalidaes llingüístiques, dedicándose esta institución al estudiu y normalización d’ún d’elles”. En total, la formación liderada por Francisco Álvarez-Cascos rexistró 33 enmiendes “que sumen 652 millones d’euros colos que pretendemos correxir el brutal recorte de Rajoy nos PXE del 2014”, esplicaron el diputáu Enrique Álvarez Sostres y el senador Isidro Martínez Oblanca.

   Pela so parte, Izquierda Xunida (IX) rexistró más de 40 enmiendes nes que reclama dalgo más de 300 millones más p’Asturies nos Presupuestos. Una d’elles, al igual que fixo l’añu pasáu nel Senáu, reclama pa l’ALLA una partida, en total de 75.000 euros, baxo una demanda d’igualdá pa col restu de les llingües que tienen carauter cooficial nos sos territorios. L’otru partíu con representación por Asturies, el PSOE, nun da importancia a esti asuntu y dexa pasar la oportunidá de pidir financiación estatal pa la única academia que nun la recibe: l’Insitut d’Estudis Catalans y la Real Academia Galega lleven 273.000 euros, y la Euskaltzandia, 143.000.

   Les cifes de los Presupuestos Xenerales del Estáu pal 2014 dexen malparada a Asturies al disponer d un total de 291 millones, un 31,6 por cientu menos que nel 2013. D’esta forma, el país ye’l territoriu onde más baxa la inversión, siguíu de Murcia, con un 27 por cientu, siendo la mengua media estatal del 7 por cientu. Estes perres van destinase, de manera principal, pa la variante de Payares (189,79 millones), un dineru que se considera insuficiente pa ver avances reales nesta obra, y pa l’autovía del Cantábricu (75,1 millones pal Unquera-Pendueles y 24 pal Otur-Viḷḷapedre).

Felicitación d’Iniciativa pol Asturianu

   El coleutivu Iniciativa pol Asturianu caltuvo reuniones en febreru colos representantes asturianos nel Congresucol oxetivu de llevar el tema llingüísticu a la Cámara Baxa. Una de les cuestiones nes que más incidió Inaciu Galán, presidente de l’asociación, foi la posibilidá de buscar víes de financiación pa l’ALLA al traviés de los Presupuestos Xenerales del Estáu, demanda que namái sofiten d’una manera real Foro y IX. De salir alantre les enmiendes permitiría que l'ALLA cuntara “per primer vegada na historia con un presupuestu del Gobiernu central pa la so financiación”. Pa Iniciativa pol Asturianu, “como se-yos espresó a les fuercies polítiques a lo llargo de les conversaciones, la cantidá agora ye lo de menos, lo importante ye introducir esta partida, que puede dir asemeyándose a les de les otres academies del Estáu nos siguientes años".

   La organización quier felicitar a les dos formaciones polítiques “por llevar al Congresu esta reinvidicación, que ye de xusticia”, porque “nun dar nengún presupuestu pa l'academia asturiana, entidá oficial del Gobiernu d'Asturies, anque de funcionamientu autónomu, cuando'l restu de les entidaes sí tienen presupuestu, ye una clara marxinación del asturianu que va contra los principios afitaos pola Constitución y la Carta Europea de les Llingües Minoritaries o Rexonales”. No que respeuta a la postura del PP y del PSOE, Iniciativa pol Asturianu señala que va trabayar “pa que dambes fuercies apoyen nes votaciones estes dos enmiendes”. Nel casu del partíu del Gobiernu, esto ye fundamental, al contar con mayoría absoluta.           Fonte: Asturies.com   

Les sovenciones al asturianu mengüen un 3,88 por cientu y pierden trés llinies d’ayudes

Pablo R. Guardado

La Conseyería d’Educación, Cultura y Deporte concede nesti 2013 un total de 308.000 euros de subvención pa la normalización del idioma. Ello supón una mengua del 3,88 por cientu con respeuto a les ayudes del añu pasáu.

Como s’esperaba, nesta convocatoria desapaecen trés llinies d’ayudes al asturianu y al gallego-asturiano: a les d’actividaes d’asociaciones y otres entidaes ensin ánimu d’arriquecimientu, a les d’empreses privaes y a la promoción d’actividaes cinematográfiques y de videu. Por contra, caltiénense les subvenciones a la producción editorial, a la discográfica y a los medios de comunicación. El montante total de l’ayuda ye de 308.000 euros, 12.248,63 euros menos que l’añu pasáu (320.428,63 euros), lo que supón una mengua total del 3,88 por cientu.

El recorte de llinies de subvención provoca que, pese a esa reducción de 12.248,63 euros, xuban les perres destinaes a les trés estayes que sí mantienen les ayudes. Asina, el dineru destináu pa la producción editorial pasa de 84.480 euros a 100.000; la discográfica, de 24.000 euros a 40.000; y a los medios de comunicación, de 127.759,63 euros a 168.000 euros.

Hai que recordar que les cantidaes del 2012 sufrieron una mengua de 60.771,37 euros, tres la entrada del Gobiernu del PSOE nes eleiciones de mayu, con respeuto a les ayudes convocaes pol Executivu de Foro, qu’ascendíen a 381.200 euros. Estes cifres iniciales yá suponíen una reducción de más de la metá con respeuto a a les ayudes del añu anterior.

Fonte: Asturies.com

N'ast denuncia que'l Gobiernu va desaniciar l'aidanza pa la normalización del asturianu nos conceyos

Los Servicios de Normalización finánciense con estes ayudes L'asociación N'ast emitió un comunicáu nel que denuncia qu'esti llunes pasáu, 8 d’abril, el Boletín Oficial del Principáu d’Asturies asoleyó'l “Plan Estratéxicu de Subvenciones pa 2013” de la Conseyería d’Educación, Cultura y Deporte y que nel mesmu pudieron confirmar lo que califiquen como "un fechu pergrave", la desapaición de les ayudes económiques que, dende va años, el Gobiernu venía apurriendo a los Conceyos pa la normalización social del asturianu. Recuerde que "si bien ye cierto que puxar pola normalización social del asturianu nun ye competencia municipal, sinón de la institución cimera que tien la obligación de mirar por esta llingua y de facela oficial", espliquen que "sí ye verdá que valoramos positivamente too aquello que se faiga pol asturianu dende los Conceyos por ser l’alministración más averada al pueblu". Daqué que con estes nuevu recorte que denuncien sedrá más difícil. Camienten que "ensin sovenciones la mayoría de les entidaes llocales van dexar d’entamar actividaes de normalización, porque pa munches d’elles sí ye verdá que faen falta unes perres que yá nun van recibir". Sicasí, recalcaquen "que la responsabilidá última de normalizar socialmente l’asturianu nun ye de los Conceyos y que nun se los pue cargar con una competencia que nun-yos correspuende". Dende N'ast llamenten que'l PSOE, partíu que gobierna Asturies col sofitu d’Izquierda Xunida y UPyD, "vuelve a amosar qu’esta dómina de crisis económica viéno-y perbién pa siguir col procesu de dexar morrer al asturianu baxo la escusa d’un “nun hai perres” que suena abondo mal, más nestes selmanes nes que tamos comprobando que sí les hubo, sí les hai, pa marafundiar llibremente polos xestores de los sos “proyeutos estrella”, casu del Centru Niemeyer", denuncien. Fonte: Asturnews

Mortera comprométese con Iniciativa pol Asturianu n’asuntos de toponimia, educación y presupuestos

Pablo R. Guardado

El xefe de Gabinete de la Delegación de Gobiernu n’Asturies, Alberto Mortera, aconceyó per dos hores conIniciativa pol Asturianu. Comprometióse con esti coleutivu n’asuntos de toponimia, educación y presupuestos.

Inaciu Galán y Vítor Suárez acudieron en representación del coleutivu que trabaya pola normalización del idioma al conceyu, que se xestó con rapidez, yá qu’Iniciativa pol Asturianu solicitólu’l martes. La imposibilidá de reunise con Gabino de Lorenzo por motivos d’axenda –el delegáu nun podría recibilos hasta dientro d’unos meses– llevó a l’asociación a conformase con Mortera, manu derecha del ex alcalde nel Conceyu d’Uviéu y agora na Delegación, pola necesidá de solucionar con urxencia dalgunos de los problemes qu’atopa anguaño l’asturianu.

“La reunión foi mui positiva, con compromisos reales por parte de Mortera”, destacó Galán, que, sicasí, apunto que “vamos facer un siguimientu a tolos asuntos que tratamos pa ver si se cumple lo dicho, yá que, nestos casos, munchos van quedando escaecíos al nun los considerar urxentes”. Asina, en materia de toponimia, mostróse favoratible a dir incorporando la toponimia oficial nos cartelos de les carreteres, inclusive aquella que tovía nun se oficializó, casu de la d’Uviéu, y faló de facilitar una reunión d’Iniciativa pol Asturianu col direutor d’Infraestructures del Ministeriu de Fomentu n’Asturies. D’igual forma, señaló que va falar col grupu municipal del PP n’Uviéu pa ver qué pasa col procesu d’oficialización de la toponimia del conceyu, que lleva 5 años paráu.

No que respeuta a la educación, Galán y Suárez repasaron col xefe de Gabinete tolo acontecío cola asignatura de Llingua Asturiana y Gallego-asturiano colos borradores de la Llei Orgánica pa la Meyora de la Calidá Educativa (LOMCE) y treslladaron-y el so esmolecimientu pol fechu de que nun s’acabe de tramitar la especialidá d’asturianu. “Velo dalgo inesplicable, polo que nos dixo que diba ponenos en contautu col subdelegáu n’Asturies del Ministeriu d’Educación”, afirmó Galán. Tamién señaló la so intención de comunicase col grupu parllamentariu popular pa tratar el tema.

Por último, Mortera mostróse favoratible en que los presupuestos del Estáu incluyan una partida pa l’Academia de la Llingua Asturiana y nel usu del idioma na Delegación de Gobiernu, tanto na rotulación interna como en campañes del calter estatal que nes comunidaes con llingua propia suelen dir nel idioma llariegu. La intención d’Iniciativa pol Asturianu ye reunise con De Lorenzo nunos meses con toos estes temes iguaos o, al menos, avanzaos.

Fonte: Asturies.com

El presupuestu va desaniciar delles llinies de sovenciones pol usu del asturianu

DAMIÁN BARREIRO . UVIÉU - 
La conseyera d'Educación y Cultura, Ana González, anunció esti 11 d'avientu na Xunta Xeneral que'l presupuestu que va dedicar el Gobiernu d'Asturies nel 2013 pa la promoción del asturianu ye de 1.706.735 euros, una cifra que supón un 14% menos de lo que se destinó anguaño. Esto supón que van desapaecer les llinies de subvenciones en concurrencia competitiva p'asociaciones, empreses y p'actividaes cinematográfiques. Sicasí, la conseyera afirmó que diba medrar la destinada a medios de comunicación y música, proyectos que consideró como de más visibilidá social.

Ana González comparez nel Parllamentu autonómicu pa falar sobre'l proyectu de los presupuestos pal 2013 xunto al so equipu, ente ellos Ana Fueyo, directora xeneral de Política Llingüística. La conseyera destacó qu'a pesar de la eliminación d'estes partíes de subvenciones, va medrar el presupuestu de l'Academia de la Llingua Asturiana pal gastu corriente, amás de que van mantenese les otres llinies de subvenciones y les actividaes de la Selmana de les Lletres, Premiu al Meyor Cantar, Axenda Didáctica Escolar o Día de les Ciencies, ente otres eventos.

El gastu corriente de la Dirección Xeneral va amenorgase en 110.000 euros, «el principal axuste», mentes que se van mantener les subvenciones pal gastu de personal a los Conceyos que cuenten con un Serviciu de Normalización Llingüística

Fonte: Les Noticies