El CUPA robla actuaciones en política llingüística na Universidá d'Uviéu

El CUPA firma con Gotor y Andrés un programa d’actuaciones en política llingüística na Universidá d'Uviéu.

Les propuestes firmaes colos dos candidatos incluyen la rotulación n’asturianu de los edificios universitarios y el cambiu del logotipu de la institución, que sedrá billingüe.

Representantes del Conceyu Universitariu pol Asturianu (CUPA) aconceyaron estes selmanes atrás colos dos candidatos a ocupar la Rectoría de la Universidá d’Uviéu, Vicente Gotor y Paz Andrés pa estudiar la situación de la política llingüística nos últimos años, conocer el programa nesta cuestión de dambes candidatures y propone-yos la firma d’un documentu nel que se planteguen dalgunos puntos esenciales pendientes y un calendariu pa llevalos alantre.

La respuesta de dambos candidatos foi positiva y los dos roblaron l’Alcuerdu Programáticu pa la Política Llingüística na Universidá d’Uviéu (2012-2016), lo que garantiza que nos próximos años sigan dándose pasos pola normalización del asturianu na Universidá d’Uviéu, seya quien seya’l candidatu que resulte escoyíu nes elecciones al Rectoráu del xueves que vien, 15 de marzu de 2012.

Los conteníos del Alcuerdu
L’alcuerdu inclúi 5 puntos que’l CUPA considera esenciales pal futuru del asturianu na Universidá d’Uviéu: en 6 meses aprobar un reglamentu de rotulación pa la Universidá d’Uviéu nel que se recueya la rotulación billingüe (asturianu/castellán) de tolos cartelos que seyan renovaos y reclamar con firmeza énte’l Gobiernu d’Asturies y el Gobiernu d’España’l reconocimientu de les categoríes profesionales de los mayestros y profesores d’asturianu.

Amás nel plazu d’un añu, reforzar les competencies de la Comisión de Normalización Llingüística de la Universidá d’Uviéu, encargándo-y la redaición d’un Plan de Normalización Llingüística pal periodu del mandatu rectoral, coles midíes que se consideren necesaries pa completar el procesu de normalización del idioma asturianu na institución. Nel plazu d’un añu y mediu, diseñar y oficializar un logotipu billingüe (asturianuy/castellán) de la Universidá d’Uviéu / Universidad de Oviedo, nel que dambos nomes apaezan siempres y ensin diferencies gráfiques ente les dos llingües.

Amás los candidatos comprométense a siguir impulsando la presencia del asturianu nes cuestiones yá llevaes alantre nel mandatu anterior, con especial esfuerciu na puesta en valor de la investigación realizada n’asturianu, creando un repositoriu nel que s’axunten trabayos, tesis, etc. redactaos nesta llingua.

El CUPA celebra’l consensu xeneráu alredor de les polítiques llingüístiques na Universidá d’Uviéu, dempués de los pasos daos alantre n’estos años, anque recuerda qu’entá queden munches coses por facer pa garantizar la igualdá de dambes llingües na institución.

Amás el CUPA felicita a los candidatos por usar l’asturianu a lo llargo la campaña, anque fuera de forma llimitada y anímalos a facer medrar esi usu.

Fonte: Aruelu.com