Los medios lleven tiempu falando de la necesidá de meyorar la imaxe internacional de la sidra d’Asturies, yá que la so presencia ye mui pequeña en comparanza cola de la vasca. Sobre l’asuntu fala Marcos Abel Fernandi nel númberu 83 de La Sidra: “El problema nun ta en que la sidra vasco algamare una referencialidá internacional que podemos considerar más o menos sobredimensionada. Non, el problema ta en cómo ye posible que la sidra asturiano y la so cultura, cola so vitalidá única nel mundu, nun llograre superar les fronteres del desconocimientu internacional, cuanto menos el necesariu lideralgu que-y correspondería a esi nivel”.
Nel númberu apaecen artículos sobre la cuestón de José María Osoro (presidente de l’Asociación de Llagareros d’Asturies) con «Les grandes referencies históriques sobre la tradición sidrera n’Asturies»; y David Rivas (profesor titular d’Estructura Económica de la Universidá Autónoma de Madrid y autor del llibru La Sidra Asturiana. Bebida, ritual y símbolo) con «La sidra, algo más que la honrilla herida».
Nes más de cien páxines hai espaciu tamién pal Sidrocole’10 (programa de visites a llagares pa que los escolinos conozan cómo se fai la sidra), sobre’l Master Class DOP Sidra d’Asturies (entamáu pol Conseyu Regulador d’esa denomación d’orixe), la segunda edición del Xixón de Sidra, o la sidra más esotérico que s’ellaboraba antaño nel Palaciu Casona de Los Fueyos (ente los conceyos de L.lena y Quirós).
Fonte: Asturnews
La verdá ye incomprensible que con tolo que representa la sidra n'Asturies y la calidá que güey tien, la so gran calidá comparada cola vasca por exemplu -ensin despreciala- y munches circunstancies más que non fai falta nomar, temos perdiendo la batalla económico-comercial nel resto d'España y la oportunidá comercial de exportación na península y onde residen asturianos nel mundiu mundial. Pue ser que la endogamia particular que se vive llagar-sidreríes-chigres-Asturies... que practícase na tierrina sin que se haya contemplao durante muchos años la salida de la sidra pa fuera les fronteres autonómiques como una riqueza más a esplotar como empiecen a facer los vascos con muncho sentido comercial, quiciabis sedría muncho meyor pensae en formar grandes consorcios o cooperatives pa esti fin o seya trabayar el tema en plan grande, de cooperatives o con alcuerdos de amplies sociedades sidreres? Non podemos dexar pasar esti tren y dexalu solo en manos de sidreros vascos que tán trabayando a estaya p'acaparar tol mercau sidreru fuera d'Asturies ensin la competencia de la meyor sidra que ye la de los llagares asturianos tanto artesanales como industriales.
ResponderEliminarVivimos les tradiciones y costumes como por casu nuesa exelente producción (y consumu) de sidra de manera casi endogámica, d'alguna d'elles vultables, ensín tener en cuenta a vegaes que puede y debe constituyir una manera de riqueza y d'espansión económicu-social fora d'Asturies como tán faciendo yá (y xintándonos el terrén) los vascos cola so sidra en toles feries n'a península y más lexos. Entá ye tiempu pal asociacionismo y les grandes cooperatives pa la esportación, trátase de non perder esti apetitosu tren.
ResponderEliminar