Piden el cambéu de nome de “Panorama Regional” y qu’esista un informativu públicu en llingua asturiana

La organización moza del Partíu Asturianista esixe a la Corporación Radio Televisión Española'l cambéu de nome del so informativu territorial n'Asturies.Xuventu Asturianista esplica nes distintes comunidaes autónomes los Informativos de TVE reciben nomes como Noticias de Castilla y León, Informativo de Madrid, Telexornal-Galicia, Informatiu-Balears… "nengún tien un informativu “rexonal”" que consideren un términu "anticuáu" que lo que busca "ye minusvalorar el calter d’Asturies".

Dende Xuventú Asturianista piensen que se trata de faer "esconder el nome d'Asturies, de la mesma forma na que s'escuende la nuesa llingua, qu'anque nel pasáu tuvo espacios nes emisiones del Centru Territorial de TVE n'Asturies, agora nun cunta con nenguna".

"Anguaño, los asturianos, tamos pagando dos equipos d'información pa ufiertar el mesmu productu: un informativu sobro Asturies fechu pola TPA y otru por TVE, y los dos en castellán" espliquen los asturinistes, Amás, pa ellis, sedría "interesante" que se diversificara la ufierta "respondiendo a la realidá billingüe d'Asturies, emitiendo caún nún de los dos idiomes".
A la fin, Xuventú Asturianista reclama'l cambéu de nome del informativu d’Asturies de RTVE y que ésti, o'l de la TPA, seya emitíu en llingua asturiana.

Fonte: Infoasturies