El vinu y Cangas protagonicen el númberu 35 de la revista “Asturies”

Esti sábadu 31 d’ochobre presentábase’l númberu 35 de la revista “Asturies, memoria encesa d’un país”, qu’edita la fundación Belenos, en Cangas del Narcea, nel Muséu del Vinu de Santiso.

‘La vide yá’l vinu en Cangas’ ye unu de los artículos qu’inclúi l’últimu númberu de la revista ‘Asturies, memoria encesa d´un país’, y vién firmáu pola direutora del muséu, Carolina Pelaz. L’autora del artículu, traducíu al asturianu occidental,  repasa la influencia de la vide y el vinu na cultura canguesa.

Pelaz nun fala solo del patrimoniu material, del qu’hai una bona amuesa nel Muséu del Vinu y nes bodegues del barriu de Santiso, sinón tamién del llegáu inmaterial que pudo recoyer al traviés de testimonios. Usos, espresiones, conocencies y téuniques que se fueron tresmitiendo por tradición oral.

L’autora afitase nos topónimos de la zona, como Entreviñas; términos específicos como ‘vinar’ o ‘recebar'; refranes y pequenes coples o fiestes tradicionales.

La Fundación Belenos, organizadora del actu, tien por oxetivu espublizar y dar a conocer el patrimoniu etnográfico y cultural asturianu, y escoyó’l Muséu del Vinu de Cangas esta vegada pa presentar  la edición númberu 35 d’esta publicación.

Fonte: Asturnews

Primer vinu etiquetáu n'asturianu dafechu

Bodegas Obanca apostó pol etiquetáu n'asturianu como novedá y refugó la forma billingüe que-y desixó'l Principáu.
Bodegas Oubanca, la bodega que presentará güei'l so nuevu vinu de Cangas etiquetáu nel asturianu que se fala nesta fastera, apostó por esta forma como dalgo novedoso dende'l puntu de vista comercial, y refugó la forma billingüe que-y desixó l'Alministración Autonómica dende la Conseyería de Mediu Rural pa dar el preste a la iniciativa.

Asina lo esplicó en declaraciones a Europa Press David Marcos, viticultor y responsable d'esta firma familiar de vinos cangueses, que’l xueves, día 10 de xunu, presentará en Cangas el nuevu productu. Trátase del L.lumés nome col que se comercializará'l 'verdejo tinto', una "variedá desconocida, como la llingua asturiana que ye desconocida y naide apuesta por ella, menos nosotros", señaló.
La etiqueta va íntegramente n'asturianu de Cangas, y per detrás lleva la siguiente inscripción: 'Na noite de San Xuan, las l.lárimas d'un cangués fixeron que naciera este vino'. Trátase d'una dedicación "a una persona del conceyu qu'ama la llingua asturiana", y de quien nun quiso revelar el nome.
La idega surdió, según esplicó, porque "somos una bodega inquieta que siempres busca coses nueves y, amás, llevamos años detrás d'esti proyeutu". Asina, esplicó que na nueche de San Xuan del añu pasáu foi cuando tomaron la decisión definitiva d'entamalu.
Refugó que l'etiquetáu n'asturianu puea ser una torga pa la comercialización. "La única torga", añedió, "foi la Conseyería, porque nun l'aprobaba en bable, quería que fuere billingüe". "Si pones la etiqueta billingüe va ser una llocura", consideró'l viticultor, qu'esplicó que decidió "sacalu n'asturianu total". "El vinu yá ta etiquetáu y mañana saldrá yá a la venta", confirmó.
Aseguró que la etiqueta ye "bien guapa" y qu'esti vinu ta "mui ricu", y animó a tola xente qu'ama la llingua asturiana, y tolos aficionaos a esta bébora en xeneral, a prebalo.

Fonte: Europa Press