TPA diz que'l 'Fueru d'Avilés' ta en provenzal.. y depués corríxese

19xunu2015.  Polémica nes redes sociales por esti error.

 Una información de 'TPA Noticias' emitida na so primer edición apuntó que'l documentu conserváu más antiguu en llingua asturiana, el Fueru d'Avilés (1155), ta en provenzal, lo que ta xenerando importantes crítiques peles redes sociales. Inclusive, la Xunta pola Defensa de la Llingua Asturiana ta amosando'l so malestar.

 Nel testu de la noticia espublizada na web de la RTPA col correspondiente videu espónse que'l Fueru d'Avilés "está escrito en lengua romance, en una mezcla de asturiano y provenzal" y nel vídeu fálase únicamente del provenzal.

 En realidá esti documentu ta escritu n'asturianu medieval con abondos rasgos del provenzal.

 Ampliación: Na segunda edición 'TPA Noticias' rectificó la información y fixo namás referencia al asturianu.                                                                                                Fonte: asturies.com

FICX: Guillermo G. Peydró gana'l premiu Universu vídeu

 

Guillermo G. Peydró gana'l premiu Universu vídeu del FICX
Guillermo G. Peydró vieno acabante ganar el premiu Universu vídeu, concedíu pol Festival Internacional de Cine de Xixón y Llaboral, como parte de les actividaes que formen parte de FICXLAB, nueva sección que s'incorporó a la presente edición del Festival y que'l so oxetivu ye diseñar y producir una serie de proyecciones y actividaes que rellacionen el cine coles artes visuales. Ello ye que supon la introducción del vídeu-arte y del cine de corte esperimental nel marcu d'un certame de cine como'l de Xixón.    Como parte del programa, Llaboral y la Sala Astragal de Xixón acueyen la esposición Universu vídeu_l'otru audiovisual español, comisariada por Alfredo Aracil, qu'inclúi obres de Samuel Alarcón, Albert Alcoz, Velasco Broca, Chus Domínguez, Guillermo G. Peydró, Kikol Grau, Verónica Ibarra, Alberte Pagán. Los ocho autores españoles, escoyíos a partir del arquivu online PLAT, competíen por una residencia de producción de dos semanes en Llaboral Centru d'Arte nos primeros meses de 2014.    El xuráu escoyó a Guilllermo G Peyró, quien demientres los dos selmanes de residencia artística en Llaboral va producir una obra que se va estrenar nel FICX de 2014 y va pasar a formar parte del Arquivu del Festival Internacional de Cine de Xixón que se curia en Llaboral Centru d'Arte, con fines promocionales, didácticos y d'investigación, comprometiéndose siempres a citar al autor de la mesma. Los honorarios pola residencia van xubir a 600 € brutos y el cineasta va disponer d'agospiamientu, espaciu, medios y asesoramientu técnicu pa trabayar en Llaboral.    La so propuesta de curtiu en Xixón, al igual que los sos anteriores trabayos sobre ciudaes (París, Nueva York, Montreal) va consistir, en principiu, n'entrar en relación cola ciudá al traviés del so cámara, partiendo de la so mirada d'historiador del arte y cineasta. Según diz, “nos dos selmanes que tengo, l'acercamientu va ser necesariamente más epidérmicu que nesos trabayos onde tuvi de dos a cuatro meses, pero creo que puedo faer daqué interesante”.    Guillermo G. Peydró ye cineasta ya historiador del arte, foi programador del Greenpoint Filme Festival (Brooklyn, Nueva York) en 2011. Anguaño termina'l Doctoráu del Muséu Nacional Centru d'Arte Reina Sofía con una tesis centrada nel filme-ensayo sobre arte, onde estudia les formes de diálogu críticu ente'l cine y les artes visuales dende entamos del sieglu XX, según les sos aplicaciones estétiques, académiques, polítiques.                 Fonte:  Asturnews

PINGARATES LLITERARIES: EL TERCER HOME (Gonzali Producciones, 2011)

El Tercer Home nun lu escribiera Graham Green pa lleelu sinón pa velu. Y si amás, podemos sentilu n’asturianu, muncho meyor. La empresa asturiana Gonzali Producciones www.gonzaliproducciones.com tien editada una colleición de cine clásicu n’asturianu, que nel intre axunta tres títulos: un clásicu de les pelis de zombis La nueche de los muertos vivientes (2010); El tercer home (2011); y un afamáu western que protagoniza John Wayne, McLintock (2011). Podemos echa-y un güeyu na so páxina web onde podemos esfrutar de fragmentos d’estes películes n’asturianu. Amás, apúntanos dellos puntos de venta n’Asturies onde poder mercales, mui afayadizu pal Nadal.

El Tercer Home ye una película británica del añu 1949, dirixía por Carol Reed. El guión, que foi la novela d’encargu, foi escritu por Graham Green. El film tuviera dellos premios y nominaciones al Oscar, algamando el merecíu premiu a la meyor fotografía en blancu y prietu por Robert Krasker. Ye una peli d’intriga nuna Viena ocupada nel añu 1948, que taba separtiada en cuatro potencies: norteamericana, rusa, francesa y británica. Lo que encadarma un documental en blancu y prietu con perbonos esteriores que describen les distintes facetes de la ciudá de Viena naquella época de posguerra.
Amás, ye mui prestosu escuchar a Orson Welles falando n’asturianu, nel personaxe de Harry Lime, el malu de la película. Demientres sentimos la cítara de Anton Karas, nuna melodía perafamada qu’acompanga la película d’un forma esceicional.

El Tercer Home asitió la lliteratura de Graham Green nuna estaya mundial. Y danos la oportunidá d’escoyer: lleer el llibru o esfrutar de la película. De xuru, que les dos coses merecen la pena. Porque los clásicos nunca pasen de moda, y como amuesa d’ello finamos coles pallabres de Harry Lime nun diálogu de la película:

“Alcúerdate de lo que dixo nun sé quien: n’Italia, en trenta años de dominación de los Borgia, hubo guerres, matances, asesinatos,…Pero tamién Miguel Angel, Leonardo y el Renacimientu. En Suiza, a la escontra, tuvieron quinientos años d’amor, democracia y paz. ¿Y cuálu fuera’l resultáu? ¡El reló de cucu!”

A ver lo que resulta anguaño d’estos tiempos de crisis y cambeos políticos. ¿Taremos a la gueta d’un tercer home que daquién viera pero que nun aparez nos informes oficiales?