La conseyera d’Educación comprometióse “a regularizar" la situación del profesoráu d'asturianu

González comprométese “a regularizar" la situación del profesoráu d'asturianu


La conseyera d’Educación, Ana González, comprometióse a “regularizar al profesoráu d’asturianu, tanto de Primaria como de Secundaria”. Foi na inauguración oficial de la Universidá Asturiana de Branu (UABRA) que se celebra en Cangas.

En concreto, la tamién responsable de Cultura y Deporte, dixo apostar nesta llexislatura por “regularizar, dar carta d’identidá dientro del ámbitu educativu al profesoráu d’asturianu, y neso tien el mio compromiso”, comentó la conseyera faciendo referencia al discursu previu d’Ana María Cano, presidenta de l’Academia de la Llingua Asturiana (ALLA), nel que volvió a reclamar la especialidá. “Toi convencida que l’añu qu’entra, que voi tar equí, taremos falando d’eso, porque igual tovía nun ta finao, pero podremos dicir que tamos dando los pasos necesarios pa regularizar al profesoráu d’asturianu, tanto de Primaria como de Secundaria”, añadió.

Na so intervención, refirióse al asturianu como "un idioma que "yá tien consolidada abondo la so importancia como vehículu d'espresión y de creación artística dientro de la comunidá autónoma". Coles mesmes, añadió que’l nuesu idioma ye "una llingua conocida y reconocida que pue presentar como credenciales una gramática normalizada, una toponimia que se va afitando añu tres añu y una lliteratura que garró un puxu nuevu cola primer xeneración del Surdimientu, y que sigue concretándose nestos últimos tiempos en voces nueves que, en dellos casos, surdieron precisamente d'estos cursos", en referencia a las clases que l’ALLA imparte en Cangas del Narcea. González tuvo acompañada na inauguración celebrada nel Palaciu d’Omaña por Cano;el direutor de los cursos de la UABRA, Xosé Antón González Riaño; el vicerrector d’Estención Universitaria, Vicente Domínguez García; y l’alcalde de Cangas del Narcea, José Luis Fontaniella Fernández.

Fonte: Asturies.com

Maxisteriu apreba la especialidá de Llingua Asturiana

La Escuela de Maxisteriu de la Universidá d'Uviéu cuntará cola especialidá de Llingua Asturiana nos planes resultantes de la prósima reforma de les sos enseñances. La Xunta d'Escuela aprebó ayeri por mayoría absoluta de 58 votos a favor, 26 a la escontra y 13 astenciones, creyar la mención d'asturianu.
La propuesta, votóse en solitariu, al marxe del restu de menciones plantegaes, nuna sesión monográfica convocada a tal efeutu. Cuatro profesores y el direutor de Departamentu de Filoloxía realizaron intervenciones a favor de l'aprobación de la mención. Nadie a la escontra. Amás, una representante estudiantil na Xunta d'Escuela presentó una recoyida de 340 firmes de profesores y estudiantes de Maxisteriu favoratible a la creyación de la mención.
Cola aprobación de la mención de Llingua Asturiana, Maxisteriu ye'l segundu centru educativu de la Universidá d'Uviéu qu'acepta creyar una especialidá d'asturianu. Enantes, dio'l pasu la Facultá de Filoloxía, onde la Xunta tamién dio'l so vistu bonu a la creyación d'un minor de Llingua Asturiana. Con esti determín los estudios d’asturianu qu’esisten anguaño na Universidá d’Uviéu queden inxeríos nel Sistema Européu d’Enseñu Universitariu.
A les puertes de la escuela, mediu centenar de persones, ente los qu'había representantes de tolos sindicatos d'enseñanza, y de dellos partíos políticos, concentráronse convocaos pola Xunta pola Defensa de la Llingua Asturiana, en defensa de la mención.
Tamién, profesores del Seminariu de Filoloxía Asturiana de la Facultá de Filoloxía unviaron una carta a Maxisteriu, defendiendo la creyación de la mención. Amás, tanto'l reutor de la Universidá d'Uviéu, como'l conseyeru d'Educación, comunicaron al centru'l so interés en que se creyare la especialidá de Llingua Asturiana