La revista esTandoriu, dirixida por José Ángel Gayol y espublizada por Editorial Universos, apuesta nel so tercer númberu pola traducción. Tal y como diz el direutor na Carta d’Axuste que pieslla la revista y que sirve de guión de contenidos, una lliteratura que quiera selo con mayúscules tien qu'abrise al mundu, charrar con él y que’l mundu escuche lo que tien que dicir. L'asturiana hai tiempu que ye una lliteratura que cunta con bones traducciones y que se descubre a sí mesma nelles, y qu'a los llectores apúrre-yos otres posibilidaes espresives.
Ye la primer vegada que se traducen unos poemes del occitanu al asturianu, una llingua que guarda munches semeyances cola nuesa y que nun esfrutaba d'una versión nin siquiera en castellanu. Javier Martínez Concheso ufierta esta primicia que quier ser un avance de futures traducciones y llábana d’entamu pa una conocencia fonda de la lliteratura occitana. Marcèu Esquieu ye l’autor propuestu en prosa, y Bernard Manciet l’escritor occitanu qu'alluma la revista cola so poesía. Amás, espublícense traducciones de Gianni Rodari a cargu de José Junquera Peña, de Yeats por Hector Fernández, y Maria Luise Weissmann y Wulf Kirsten por Xabiero Cayarga. esTandoriu tamién recueye nesti tercer númberu les estayes habituales de prosa con cuentos de Nicolás V. Bardio, Xavier Frías Conde y Costante Álvarez, y poemes de Darío Aceba, Carlos X. Blanco, Hector Fernández y Xabiero Cayarga. El volume complétase con un pequeñu ensayu lliterariu y el capítulu de crítica. Amás, nesta ocasión, la revista ta dedicada al conceyu de Villaviciosa, con semeyes antigües y actuales qu’illustren el testu y arriquécenlu con un valir visual de calter etnográficu.
Fonte: Les Noticies
