Dia de les Lletres Asturianes en Madrid
El sábadu pasáu celebróse nel Centru Asturianu de Madrid el Día de les Lletres Asturianes, actu que contó con munchu públicu y collaboraciones de xente emigrao. Tres años ensin celebrase, Iniciativa pol Asturianu recuperó l'eventu, que tendrá continuidá.
L’actu entamó coles pallabres de Valentín Martínez-Otero, presidente del centru, que recordó’l sofitu de la entidá asturiana en Madrid a la cultura y la llingua asturiana y qu'agradeció a Iniciativa pol Asturianu la convocatoria de la celebración. Darréu, Marissa Bordallo, miembru d'esta organización, presentó l’actu y emponderó la disposición de Martínez-Otero pa entamar actividaes alredor de la llingua asturiana.
Tres la presentación del númberu 14 de la revista de lliteratura mozo 'Formientu', entamó una llectura de testos lliterarios n'homenaxe a la nuesa llingua y a los escritores qu'escriben nella por parte d’asturianos y asturianes residentes en Madrid. Asina, pudieron sentise versos y microrellatos d’autores como Rosa Cunqueira, Vanessa Gutiérrez, Iris Díaz Trancho, Xosé B. Álvarez, Héctor Pérez Iglesias, Antón García, Rubén García, Xurde Fernández, Henrique Facuriella y hasta un fragmentu de la traducción d’Asterix fecha por María Xosé Rodriguez.
L’actu finó con un alderique sobre’l presente y el futuru de la llingua asturiana, nel que se fixo por romper con dellos de los prexuicios sobre l’idioma instalaos en munches persones, asina como con unes pallabres d’Inaciu Galán, presidente d’Iniciativa pol Asturianu, nes que fixo un llamáu a “recuperar l’autoestima de los falantes, garantizar les midíes pa que la tresmisión xeneracional se produza”, recordando lo importante que ye cuntar con “respetu al idioma y reconocencia de los Drechos amparaos pola Constitución y la Declaración Universal de los Drechos Humanos”, lo qu’esplicó “pasa nel marcu actual pola declaración d’oficialidá pal idioma”. Fonte: asturies.com
