Cuando una colonización se fai militarmente, con presencia física y bélica, tol mundu la presencia. Ye posible entós que surda una resistencia ante ella.
Cuando una colonización se fai sele, ocultando o camudando la historia, convenciendo a los falantes de que la so llingua ye inferior y una torga p’avanzar na vida, la so presencia marutada pue consiguir que nun guañe resistencia dala.
Ye, a fin de cuentes, esti últimu casu’l que resulta más efeutivu y eficaz p’algamar el propósitu de xuncir a los anexionaos al xugu de los colonizadores. Y resulta una erbía perutilizada dayures mesmamente nestes dómines.
L’orpín cala adulces. De mano pue paecer un afalagu pal peyellu. Pero, al final, acabes caláu hasta la caña’l güesu.
Porque cuando nun te das cuenta de que te tan cambiando la historia, la cultura, la llingua y, en definitiva, la identidá de la tierra a la que perteneces, al final acabes siendo otru ser distintu al que yeres y perteneciendo a otru pueblu estremáu al que pertenecieres.
Lluis Muñiz Antuña
Fonte: Aruelu.com
