Tropela Elkartea inclui l'asturianu nel Tour de Francia

La web de porres ciclistes ufre dende l'entamu d'esti Tour de Francia 2014 la posibilidá d'escoyer l'asturianu como llingua na so web

   Tropela Elkartea ye una asociación, ñacida en 2005, creada pa reforzar la presencia del euskera nes nueves tecnoloxíes, escoyendo el ciclismu pola gran afición qu'esiste na sociedá vasca. L'actividá más importante de Tropela.net ye la organización de competiciones relacionaes col ciclismu, entamando col Tour de Francia 2005 y teniendo l'euskera como única opción d'idioma.

   Esto nun foi problema pa que la web medrara en númberu d'usuarios, fueren euskaldunes o non, lo que fizo que se fueren sumando nueves cites del calendariu ciclista internacional como la Euskal Herriko Itzulia, Giro d'Italia, Vuelta a España o el Mundial, y añadiendo nuevos idiomes, catalán al entamu, castellanu y inglés que siguen en fase Beta a la que se incorpora agora l'asturianu.

   Amás de les porres, Tropela fai un siguimientu especial a los ciclistas vascos y caltién un blog onde los usuarios pueden participar, amás d'organizar eventos fuera de la rede como fiestes de repartu de premios o salides en bicicleta.

   Dientro de Tropela.net yá hai comunidaes d'usarios asturianos como la del Tropeltxo (pelotón) Xeneración CLAS, al que cualquier nuevu usuariu se puede sumar pa competir en grupu.                               Fonte: Asturnews

El ciclista Samuel Sánchez espresa la necesidá de que l'asturianu seya llingua oficial

El programa Iniciativa pol Asturianu nes ondes ta acabante publicar la entrevista col deportista asturianu internacional Samuel Sánchez La organización Iniciativa pol Asturianu, que tien un programa radiofónicu dirixíu pol periodista Samuel Gradín, ta acabante asoleyar n'internet y na so rede d'emisores una entrevista col ciclista Samuel Sánchez, ciclista ganador d'etapes de La Vuelta y el Tour, y d'una medaya d'oru nes olimpiaes de Pequín. Na entrevista, na que Sánchez s'espresa n'asturianu, espresa la so opinión sobre l'asturianu, recordando que "la llingua asturiana ye dalgo mui de nueso y nun hai que dexar que muerra", amás dexó bien clara la so postura sobre l'estatus que necesita l'idioma d'Asturies "l'asturianu tendría de ser oficial". Dende Iniciativa pol Asturianu feliciten al ciclista asturianu "pol so compromisu abiertu cola llingua asturiana". La so entrevista, espliquen, "ye bona amuesa de la opinión de la mayor parte de los asturianos, que nun quieren que muerra la llingua de so, pero tien un especial valir pola so posición como figura pública". Nun ye la primer vegada que personalidaes públiques amuesen el so sofitu al asturianu nel programa y nes actividaes d'Iniciativa pol Asturianu. Actores como María Cotiello y William Miller o'l músicu Mario Fueyo "Dark la eMe" son dellos exemplos, nun trabayu que según comenten dende la organización "busca concienciar a los asturianos de la importancia d'implicase na recuperación y futuru del asturianu". Na entrevista con Samuel Sánchez tamién hai tiempu pa un repás a la so carrera como ciclista. Na mesma esplica como pa facer esti deporte "n'Asturies hai que ponese'l chubasqueru y salir a moyase peles carreteres", lo qu'esplica pue ser una ventaya "los ciclistes asturianos tenemos ventaya con otros por tar avezaos a les abegoses condiciones climatolóxiques pel iviernu del nuesu país". Sobre los sos planes de futuru esplicó qu'esti añu va correr nel Giro d'Italia "pa tentar ganar una etapa nes tres grandes". Sobre lo negativo de la profesión destacó "prespáreste a tope y nes primeres etapes d'una gran carrera caes, ruempes unos güesos y tienes de dir pa casa". Iniciativa pol Asturianu emítese en radios llocales per toa Asturies y en Bruseles pa la emigración asturiana. Amás, pue sentise na canal de la plataforma Ivoox. Fonte: Asturnews