L’asturianu llega a iOS

Aplicaciones de iOS n’asturianu con Apple

  Disponer de delles aplicaciones de iOS n’asturianu yá ye posible cola última actualización del sistema operativu d’Apple , que dexa escoyer la llingua asturiana como idioma predetermináu pa los sos dispositivos.

  D’esta manera, los usuarios qu’asina lo deseyen podríen disponer de forma automática de dellos servicios de iPhone y iPad, como’l calendariu o la fecha de les fotografíes y los vídeos na galería, en llingua asturiana.

  iOS nun ye’l primer sistema operativu que dexa utilizar la llingua asturiana. El teléfonu d’Ubuntu ta totalmente disponible n’asturianu, anque la so presencia nel mercáu ye escasa  por cuenta que’l so sistema operativu nun ye, pol momentu, compatible con aplicaciones como WhatsApp.                                                          Fonte: asturnews.com

L'Academia de la Llingua Asturiana col software llibre

Según acaba de dar anuncia la institución, les sos instalaciones acueyen yá pal so sistema informáticu, el sistema de software llibre UBUNTU, qu’ufre la posibilidá d’usase n’asturianu. P’asoleyar esta decisión, la Presidenta de l’Academia de la Llingua Asturiana desplicó les posibilidaes d’emplegu informáticu d’UBUNTU n’asturianu y les sides de la decisión d’acoyer esta ferramienta informática nel Hotel Principado, n’Uviéu.

Nel actu tuvieron presentes representantes de Softastur y de l'Academia de la Llingua Asturiana, acompañaos por David Planellas, coordinador de les traducciones d'Ubuntu a nivel internacional, que cifró nun 80% los conteníos que yá tienen torna al asturianu, porcentaxe a partir del cual vien considerándose completa una versión. Íñigo Varela, de Softastur, desplicó tamién nel actu'l funcionamientu del software llibre Ubuntu, semeyante y perfectamente compatible con cualesquier aplicación de Windows, el sistema operativu de Microsoft, señalando qu'Ubuntu permite la llectura de cualquier tipu de ficheru musical o de videu, el procesu de cualquier documentu de testu en cualquier archivu, la xestión de fueyes de cálculu, o la busca de conteníos per internet col programa Firefox.

L’actu finó con una demostración práutica del funcionamientu n’asturianu d’UBUNTU que ficieron miembros del coleutivu Softastur.

Fonte: Asturnews