L'Academia

L'Academia

     El funcionalismu llingüísticu enseñónos que l’artículu, amás de ser un morfema, yera un actualizador. Actualmente l’Academia de la Lligua Asturiana, l’Academia, tien el futuru colingando d’un filu delgáu y burocráticu, d’un enguedeyu llegal que, como suel ocurrir, paga siempre la víctima.

     Al dicir l’Academia, asina, col artículu, cuento actualizar lo que foi’l meyor llogru alministrativu ya institucional pa la llingua asturiana nos sos sieglos d’historia, el suañu de Xovellanos, de los erúditos del XIX, de los escritores del Rexonalismu…

     L’Academia de la Llingua Asturiana vien faciendo un trabayu científicu axeitáu y amañosu, como diz con sanu arguyu la so presidenta, Ana Cano. Nos sos pocos años d’historia sacó alantre les tres ferramientes del estándar normativu (Normes, Gramática y Diccionariu), amás d’echar andar publicaciones, xornaes, Universidá de Branu y asitiar, col so bonfacer nes universidaes europees el reconocimientu pa una llingua románica a la que sistemáticamente la clas política asturiana ignora, desprecia y marxina; de la que, convién facer autocrítica, parte del so pueblu, parte de los sos falantes faen chancia y s’avergüencen a cuentu d’una diglosia que los medios de comunicación incentiven y alimenten.

     Consiguió ello de la que velaba polos derechos de quien quier usala; defendéndola de los ataques, de los escaezos, ensin importar les sigles. Soportando, amás, les consecuencies d’esi enfotu.

L’Academia de la Llingua Asturiana ye l’ultimu rescualdu d’una llucha que muerre. L’asturianismu llingüísticu, de va tiempu, ta esvertebráu. Y como cualquier organismu ensin vértebres, ye informe, amorfu. Poco áxil. Presa fácil.

     Si dalgo creíemos fixo, seguro; si dalgo llográremos afitar, yera esa institución que poco a poco vio amenorgáu’l so presupuestu, foi arrequexándose inda más…  Agora nesti postrer episodiu llega cuestionase incluso la so naturaleza xurídica. Faciéndola feble, domestícase.  Una Academia fuerte ye una Academia independiente.

     L’asturianismu ta a puntu de perder  l’únicu elementu vertebrador que nos queda, la talaya dende la que mirar un ámbetu pa la nuestra llingua, pa la parte más vieya del nuestru patrimoniu inmaterial.

Pa una llingua que nun ye patrimoniu esclusivu de los asturianos si non, que como  toles llingües, ye patrimoniu de la humanidá. 

Fonte: Blogue lletra menudo

La sidra asturiana candidata a Patrimoniu de la Humanidá

La sidra asturiana podría ser patrimoniu de la humanidá en trés años

   PREPARACIÓN DE LA CANDIDATURA
   El Gobiernu asturianu confía en que la cultura de la sidra asturiano, que non el productu en sí, seya patrimoniu inmaterial de la humanidá nun plazu que rondaría los trés años. La Conseyería d'Agroganadería empezó yá a trabayar na preparación de la candidatura, acabando'l plazu de presentación na Unesco'l 31 de marzu del 2014.

   Asina lo informó esti xueves la conseyera d'Agroganadería, María Jesús Álvarez, que compareció en rueda prensa acompañada pola directora xeneral d'Agroalimentación, Tomasa Arce, y l'investigador Luis Benito García, autor de la tesis doctoral na que se va basase principalmente la candidatura.

   Tres la presentación de la candidatura, abriríase un plazu de dos años mientres el que técnicos de la Unesco visitaríen Asturies pa conocer la cultura sidrera, y tomar una decisión final. La propuesta asturiana pretende axuntar un corpus científicu que va xirar precisamente sobre les investigaciones de García, y tamién va acompañase d'otros elementos, como una escoyeta fotográfica y una "presentación rigurosa". Destacó concretamente la escoyeta d'apoyos. Nun quiso adelantar nengún apoyu, pero esclaró que van contar con "importantes y prestixoses" firmes, y que la so intención ye provocar una "movilización social" a favor de la candidatura asturiana.

   La declaración de Patrimoniu Inmaterial de la Humanidá per parte de la Unesco reconoz aquelles espresiones culturales o sociales que puen ser "crisol de la diversidá cultural y el caltenimientu de la mesma, y d'una garantía de creatividá permanente". Asina, la conseyera mostróse convencida de que la cultura sidrera asturiana cumple con estos requisitos.

   De la bebida y del tolo que la arrodia, destacó que l'asturiana ye "la única que s'escancia, la sidra por antonomasia, qu'identifica a la comunidá autónoma, pero que tamién ye una de les principales producciones agroalimentarias d'Asturies, concretamente la tercera".

   "Caltién a una importante industria, atomizada bastante y repartida pel territoriu", añadió, destacando que'l sector productor creció y profesionalizóse. Arce, pela so parte, señaló que nestos momentos funcionen n'Asturies 93 llagares, con una producción de 25 millones de llitros de sidra natural.

   PERVIVIÓ GRACIES A EL SO ENRAIGONO
   García refirióse a la so tesis, defendida nel 2008, na que destaca la pervivencia de la sidra como productu, precisamente gracies al so fuerte enraigono cultural. Recuerda qu'otros productos antaño importantes, como'l casu de la cazalla, sobreviven a dures penes, mientres que la sidra supo pervivir, "sin grandes campañes publicitaries y con una producción consumida casi al 90% n'Asturies".

   Asegura que'l so consumu de popularizó porque resultaba bien difícil producir vinu n'Asturies y bien caro tresportalo dende la meseta pelos puertos. Rellaciona amás la costume de beber delles persones d'un solu vasu cola carestía del vidriu, qu'obligaba al chigreru a ofrecer ún solu pa dellos bebedores. Asina se xeneró "una interconexón bien fuerte ente los consumidores", esplicó l'investigador, antes d'añadir qu'esti factor provocaba preocupación ente los sectores hexemónicos de la sociedá asturiana, porque los obreros reuníense pa beber sidra y falar de los sos problemes.

   Fonte: Europa Press.