L'Arena espera la llegada de L'Anguleru

Llegada de L'Anguleru, semeya propiedá de l'Asociación Cultural Garabuxada.

El so barcu yá aportó a Asturies esti xueves y llegará al cai del pueblu a les 19.30 hores.

Los neños y neñes asturianos esperen ansiosos la llegada del pescador procendente del mar de los Sargazos, que tien previsto dedicar la nueche a pescar angula y, coles perres que saque, mercar regalos pa los más pequeños y repartilos esta Nuechebona. Precisamente, esta mañana tuvo nel Acuariu de Xixón recoyendo cartes colos pidimientos de la reciella.

La so llegada a L'Arena ta prevista pa les 19.30 hores. Tres saludar a los neños y neñes de la villa, pondráse manes a la obra pa trayer la felicidá a tolos llares asturianos.
                                                                                      Fonte: asturies.com/A la Gueta los Sueños

Zarzuela nun escaez el bable

Vitor Suárez Otru añu más, cola Nuechebona, produciráse la marxinación hacia la llingua asturiana nel discursu del Rei, que sí tendrá versión nes correspondientes llingües oficiales autonómiques. Pero nun se trata d’un despiste, la Casa Real ye consciente dafechu d’ello y en declaraciones al mediu catalán “Nació Digital” tienen espresao lo que vien darréu: “Hemos de cumplir la llei con procuru, y la llei diz qu’hemos de respetar les llingües cooficiales. Y si l’Estatutu d’Asturies dixere que’l bable ye cooficial, tornaríemoslu al bable” Ye dicir, qu’escudándose nun fechu anómalu como ye que la llingua asturiana nun seya tovía oficial, la Casa Real obvia’l nuestru idioma del so discursu, y desprecia la normativa actual qu’obliga a les instituciones a protexer y afalar el so emplegu. Otru añu más, vuelven a espeyanos qu’esa institución que diz representar a tolos ciudadanos del Estáu, nun respeta a Asturies nin a los asturianos y, amás, a sabiendes. Fonte: Blogue En caldia