Nava acueye'l I Congresu Internacional 'Gaites nel mundu'

   Del 18 al 20 de xunetu van celebrase en Nava conferencies, meses redondes, esposiciones y conciertos al rodiu de la gaita.

  El profesor de musicoloxía na Universidá d'Uviéu, y autor de Misa de Gaita, Ángel Medina va ser l'encargáu d'inagurar esti martes a les 17 hores nel Muséu de la Gaita el Congresu cola conferencia 'La gaita en la esfera de lo sagrado: tópicos y realidades'. La sesión va continuar a les 19 hores cola mesa redonda 'En busca d'una sentimentalidá moderna p'Asturies' moderada por Flavio R. Benito y na que van participar Chus Pedro, Hugo O'Donell, José Ángel Hevia, Ramón Prada, Xuan Bello y Xune Elipe. El primer día va pésllase cola esposición de gaites antigües y conciertu a cargu de Fonsu Les Regueres, Odón del Paganéu y David Varela.

  El miercoles 19 entama a les 11 hores cola mesa 'La gaita: panorámiques tresversales' moderada por Maxi Gütiez y na que van participar Adolfo Manzano, Antón García, Chus solís, Llorían García Flórez y Miguel Fernández Gutiérrez. Pela tarde ye'l turnu de la mesa 'La tradicion musical y creativa dende una perspectiva de xéneru', moderada por Aída Falcón y na que van intervenir Andrea Joglar, Leticia González, Marisa Luque, Pablo X. Suárez y Tina Cuadriello. Na plaza naveta de La Najosa a les 18:30 hores, intervención artística cola participación de Carmen Montes, Guillermo Lourido, Klara Konkoly-Thege, Leocadio Redondo y Maxi Gútiez. Pa continuar cola entrega del IV Premiu de percusión Manegueru de Nava a Dº María Isabel López Parrondo y a D. Ricardo Moreno Piñera 'El Colchoneru'. Dempués, actuación del grupu Cantaruxare.

  El xueves 20, La Casa de cultura Marta Portal va acoyer la mesa dedicada a 'La gaita na emeigración', moderada por Leocadio Redondo, y na que van participar Fe Santoveña, Gorka Bravo Barrerio, Juan Oliver, Manuel Fernández de la Cera y Susana de la Cruz. Al mediudía, va ser la cita pa la mesa col títulu 'La Gaita y los sos contestos musicales: la pareya, el baille, la tonada, les bandes y el folk' na que David Varela moderará a figures del panorama musical asturianu. La mesa 'La gaita dende una visión internacional: los exemplos de Zamora, Galicia, México/Bretaña, Asturies y Portugal' moderada por rodrigo Joglar, y na que van participar Alberto Jambrina, David Bellas, Ernesto Góngora, Pedro Pangua y Victor Felix.

  Pa la clausura d'esti primer congresu ta programada una conferencia del direutor del Muséu de la Gaita Fonsu Fernández titulada 'La Gaita asturiana como símbolu d'identidá. Aníciu, desendolcu y hora cabera'. A les 21 hores un conciertu del grupu L-R servirá de pieslle a esti primer congresu internacional de gaites nel mundu entamáu pola Escuela Municipal de Música de Nava.                                                                                          Fonte: asturies.com

Adxuntu	Tamañu
Programa del I Congresu Internacional 'Gaites nel mundu' (1/2)	267.82 KB
Programa del I Congresu Internacional 'Gaites nel mundu' (2/2)	316.55 KB

El Muséu de la Gaita protagoniza la charra mensual d'Ástura

Muséu de la Gaita, Xixón

 El so direutor, Fonso Fernández, va analizar la trayeutoria d'esta instalación.

 'El Muséu de la Gaita: afitando una identidá' ye'l títulu que va zarrar la temporada de charres sobre cultura asturiana qu'entama tolos meses l'Asociación Cultural Ástura nel Atenéu Obreru de Xixón. Nella, Fernández va facer un percorríu fonderu polos movimientos culturales que lleven a la creación d'esti muséu'l 29 de xunu de 1966, el primeru qu’hebo en Xixón.

 "Nun aveza pasar que’l primer muséu d’una población seya d’estes carauterístiques. Poro, los raigaños fonderos d’un equipamientu talu hai que los allugar nun tarrén abondo más anchu que lo que ye puramente la museoloxía. Ún de los tópicos más espardíos al rodiu la gaita foi’l so calter pastoril, qu’anicia na iconografía tardomedieval venceyada cola Anunciación a los pastores y l’Adoración, nes que la gaita taba presente de vezu. Ayena a la 'alta cultura', nun taría güei ente los oxetos dignos de caltener ensin un procesu de puesta en valir de les cultures populares. Trataremos d'esti procesu nel que la cultura campesina pasó a ser seña d’identidá y oxetu d’estudiu científicu, mentanto que diba dibuxándose’l nuevu mapa políticu, que sofitaba na idega de qu’un pueblu con llingua y cultura propies tien el drechu de convertise nun estáu independiente. Con esti enfotu, los poderes públicos emprincipiaron a desendolcar polítiques culturales, yá prefiguraes nel despotismu illustráu del sieglu XVIII; ente elles, la creación d’instituciones culturales y particularmente museos", espliquen dende Ástura.

 Estes tres exes, valorización de la cultura popular, nacionalismu ya institucionalización de la cultura, son fundamentales "pa entender cómo la gaita pasó de ser un productu de les clases illetraes a ser un oxetu patrimonial que güei vemos nos museos. Repasaremos les circunstancies históriques, ideolóxiques, polítiques y culturales que triaron el camín pa que’l Conceyu Xixón abriere esti muséu, qu’asitia la gaita nel mapa cultural y social d’Asturies y del mundu", añaden.

 La charra protagonizada pol responsable del Muséu de la Gaita dende 1997, llicenciáu en Filoloxía Hispánica pola Universidá d'Uviéu y doctor en Musicoloxía, va principar a les 20 hores, con entrada llibre.                                                                          Fonte: asturies.com