La Lliga Celta d’Asturies convoca una concentración en defensa l’arte asturianu

Dende la Lliga destaquen l’estáu de desdexamientu nel que s’alcuentra l’emportante padremoñu hestóricu-cultural d´Asturies y aleguen que  “Ye munchu más que monumentos, ye parte de la identidá d´un pueblu, l´asturianu

Llamen a participar nesta concentración a partíos políticos, istituciones, organizaciones, coleutivos y a la ciudadanía; en xeneral, “a toos aquellos que consideren que curiar de lo propio merez la pena”.

Nel actu, que tendrá llugar el prósimu sábadu 25 de marzu delantre de l´ilesia de Santuyanu na cai Selgas 1 d´Uviéu a les 11:00h, lleeráse l’analís que la Lliga Celta d’Asturies fai de la situación del prerrománicu asturianu anguañu, asina como un decálogu de midíes de baxu coste y poca complexidá operativa que podíen entamar a facese darréu y que tendríen l’oxetivu de caltener y conservar un l´Arte Asturianu, un padremoñu únicu y diferenciáu d’incalculable valir.

De magar esti actu reivindicativu pola correuta xestión del nuesu padremoñu, a les 12h ufrirán nel vecín Hotel d´Asociaciones Santuyanu una conferencia entitulao “Monumentos altomedievales d´Uviéu: nuevos enfoques y perspeutives Impartía por Francisco José Borge Cordovilla, autor de Mirabilia Ovetensia, investigador del Arte Asturianu y miembru docente na fastera cismontana d´Asturia, ye dicir, en Llión.

Fonte: Infoasturies

L’Atenéu Obreru de Xixón acueye una charra sobre’l ganáu de tueru célticu

   El ganáu de tueru célticu n’Asturies ya n’otres ñaciones celtes: un enfoque xenéticu y morfolóxicu ye’l títulu de la conferencia que va ufrir esti xueves Cesar Herrerías en Xixón.

  Mañana xueves, 12 de xineru, a les 19 hores, nel local social del Atenéu Obreru de Xixón, na cai Covadonga, 7 – 1º Izda., va tener llugar una conferencia baxo’l título El ganáu de tueru célticu n’Asturies ya n’otres ñaciones celtes: un enfoque xenéticu y morfolóxicu, al cargu de César Herrerías, nun actu organizáu pola Lliga Celta d’Asturies. 

  Fernán Morán, en calidá de Presidente de la Lliga Celta d’Asturies, va facer la presentación de la conferencia, asina como de la Lliga Celta d’Asturies, y dará entrada al ponente.

  César Herrerías ye llicenciáu en Bioloxía pola Universidá d’Uviéu, Master en Estudios Sociales de la Ciencia y la Tecnoloxía y doctorandu nel área de Cultura Científica. Profesor de Secundaria en el CP López y Vicuña de Xixón.                               Fonte: asturnews.com