Asturies va celebrar en Mieres y La Pola el Día de la Llingua Materna

    

La UNESCO celebra’l 21 de febreru’l día de la Llingua Materna y como vieno faciendo dende hai dellos años, Asturies celebralo nesti mes de Febreru en Mieres y Siero.

La Conseyería d’Educación y Cultura va celebralo esti añu nel Auditoriu Teodoro Cuesta de Mieres el 20 de febreru, y el martes 21 nel Auditoriu de La Pola Siero. Amás, nos díes próximos vas disponer n’Educastur d’unos manifiestos pa lleer y comentar nos centros educativos.

Nel añu 2016, y acordies colos oxetivos establecíos na Axenda de Desenvolvimientu Sostenible pal 2030, la UNESCO escoyó un llema nuevu pal Día de la Llingua Materna: Educación de calidá, llingua (llingües) d’enseñanza y resultaos de deprendizaxe. La intención que tien la UNESCO ye dexar bien a les clares la importancia de tolos idiomes, y n’especial les llingües maternes, p’algamar una educación de calidá. L’usu de les llingües minoritaries, asegura l’organismu internacional, aumenta la calidá de la educación, meyorando les capacidaes de comprensión y creatividá; y favorez, nes interaiciones del aula, un arriquecimientu de les rellaciones sociales y de les estratexes comunicatives.

Y asina, “el dominiu y l’usu de toles llingües ameyora la competencia nesti ámbitu y en tolos aspectos onde’l llinguaxe ye una ferramienta necesaria pa entender, compartir, rellacionase y deprender.

Fonte:  Asturnews

Anabel Santiago llogra'l Premiu al Meyor Cantar 2016

Premiu al Meyor Cantar 2016 pa Anabel Santiago

  La so canción "La Lloca", con lletra de Xulio Arbesú, foi la escoyida pol xuráu.

  Esti viernes nel auditoriu de La Pola Siero celebrose la gala del Premiu al meyor cantar en llingua asturiana y gallego-asturiano. l'actu tuvo guiáu por l’actriz María Cotiello y el cantante Xune Elipe,  y actuaron los cinco finalistes más  la Banda Gaitas El Tr asno, ganadora de la última edición del premiu.

  Los cinco artistes y bandes que pasaron el primer corte del xuráu y que defendieron los sos temes fueron: 'La lloca', d'Anabel Santiago (lletra de Xulio Arbesú); 'Teatro valleiro', de Bacotexo (Ricardo Saavedra); 'A mano izquierda del mundu', de Fernando Valle Roso (Ismael Arias); 'Tuntu', de La Tarrancha (Delfín Valdés); y 'Avérate', de Vrienden (Juan Ramón Duarte).

  La ganadora, por unanimidá del xuráu, foi Anabel Santago col so tema "La Lloca" con lletra de Xulio Arbesú. Esta canción ta incluida nel so discu Llances de papel (2015), discu poéticu-musical onde axunta parte de los sos éxitos, dende tonaes clásiques hasta tangos como ye la canción ganandora.

  Darréu, la Banda Gaitas El Trasno, ganador de la octava edición del premiu con 'Volviche', va actuar mientres el xuráu tomaba la decisión final sobre quién merez ser ganador del Premiu al Meyor Cantar que resultós ser el tema d'La Pola Siero. El premiu que-y entregaron ye una obra orixinal de l’artista asturiana María Jesús Rodríguez.

  Anabel Santiago ye una de les voces más potentes de la tonada asturiana actual. Nos sos venti años de trayectoria, esta artista publicó los discos Tierra de sueños (2001), Al son de la lluna 82003), Anabel Santiago canta a Diamantina Rodríguez (2005), Desnuda (2007),  Agora (2010) y Llances de papel (2015). Ente munches otres reconocencies y gallardones llograos por Anabel Santiago, pueden destacase'l premiu Nacional de la Música al meyor cantar en llingua asturiana pol tema "Agora" (2010), o los premios AMAS a  meyor cantar folk, meyor discu folk y meyor voz.                                                              Fonte: asturies.com

Ixuxú entama un mercadín ambulante de música asturiana enmarcáu na so campaña de socios 2014

Ixuxú entama un mercadín ambulante de música asturiana enmarcáu na so campaña de socios 2014 y que va desenvolvese del 2 al 5 de xineru, en dellos locales d’Asturies con más de 50 discos a la venta y fueyes p’asociase al proyectu. Cartelu del mercadín    Fomentar el consumu de música asturiana y sumar sofitos pa l’asociación. Esos son los dos oxetivos colos qu’Ixuxú Asturies-Euskal Herria elkartea entama’l “Mercadín de música asturiana”. L’actu ta enmarcáu dientro de la campaña de socios y socies 2014 colos que l’asociación busca algamar sofitos y sumar fuerces pa poder siguir realizando les sos actividaes nunes condiciones dignes.    Coincidiendo coles feches de reis, la campaña va salir a la cai. Distintos locales repartíos ente L’Entregu, Avilés, La Pola Siero y Xixón van dar espaciu a la venta de más de 50 discos nel “Mercadín de música asturiana” y a la posibilidá d’asociase in situ a esti proyectu intercultural que lleva yá un añu visibilizando Asturies en Euskal Herria.    Por una cuota de 1, 5 ó 10 euros mensuales (depende de si ye persona individual o un axente cultural), pue formase parte de l’asociación y tener amás otres ventaxes como descuentos nel catálogu, regalu de discos de música y  usar tolos servicios qu’ufierta’l proyectu pa grupos de música y otros axentes culturales.    Feches y llugares del “Mercadín de música asturiana” son les que vienen darréu:  xueves 2 // l’entregu // CSA LA SEMIENTE // de 18.00 a 20.30 vienres 3 // avilés // EL CAFETÓN // de 19.00 a 22.30 sábadu 4 // ciares // CAMPU LA CRUZ // de 15.30 a 17.00 sábadu 4 // la pola siero // JUDÁ // de 19.00 a 22.00 domingu 5 // xixón // LA MANZORGA // de 17.30 a 21.00.    Fonte:  Astunews.