Trabe asoleya la segunda parte del métodu de Flavio R. Benito

Alborada II aporta a les llibreríes con una amplia recopilación de melodíes pa gaita

 

2ª parte del Métodu pa Gaita de Flavio R. Benito

   Tres del ésitu de la primer entrega, Ediciones Trabe vieno acabante d'asoleyar la segunda parte d’Alborada, el métodu pa Gaita del mayestru gaiteru Flavio R. Benito que nesta ocasión va permitir al llector atopase pa con una amplia recopilación de melodíes pa gaita, en total más de 125 trescripciones. Apaecen dixebraes nos seis cursos que componen los estudios de les Enseñances Profesionales de Música y clasificaes de menor a mayor dificultá y según el so calter rítmicu.

Na semeya,  el gaiteru Flavio Rodríguez Benito

   Les pieces alcuéntrense ordenaes según que’l so compás seya de 2/4, 3/4, 4/4, 3/8 o 6/8. Sigún la editorial "ye d’interés pa tou estudiante de gaita l’estudiu d’un repertoriu que, amás d’estensu, seya variáu no tocante al ámbitu xeográficu de procedencia de les melodíes. D’esta manera, el repertoriu musical de los gaiteros d’angüaño sedrá representativu de toles fasteres d’Asturies.

    Los seis cursos qu’integren esti llibru cunten con un repertoriu representativu de los xéneros musicales más relevantes de la nuesa tradición musical y de pieces de nueva composición. Asina ye qu’atoparemos a lo llargo de toos ellos, alboraes, entemedios de misa, procesiones, dances, xiraldilles, xotes, fandangos, muñeires, saltones y xiringüelos, pericotes, sones d’arriba, gallegadas, cariaos, pasudobles, pol­kes, rumbes, valsiaos, asturianaes o tonaes, habaneres y cantares populares Per otru llau, y col envís d’atender como merez l’apartáu del acompañamientu de l’asturianada, cunta la obra col valiosu trabayu investigativu y el análisis d’Héctor Braga, estudiosu, virtuosu y buen conoceor d’esti campu musical".                                      Fonte: Asturnews

La música asturiana de xira per Marruecos

Héctor Braga y el Che de Cabaños, de xira per Marruecos:  Fez,  Casablanca  y  Marrakech.

Por Pablo R. Guardado

La música asturiana va sonar esti mes de payares en Marruecos. El músicu Héctor Braga y el cantante de tonada, el Che de Cabaños, van protagonizar una xira conxunta pel país norafricanu con paraes en Fez, Casablanca o Marrakech.

Los Estudios Mundo Sonoro de Xixón entamen esti ciclu de conciertos baxo’l nome de ‘Estampa asturiana de folk’, que cuenta col sofitu del Ministeriu d’Educación, Cultura y Deporte, del Instituto Cervantes y de la cadena d’hoteles Barceló. La estancia de Braga y de José García González, más conocíu como’l Che de Cabaños, nel país norafricanu va allargase del 19 al 25 de payares, con actuaciones yá confirmaes en Fez (martes 20, a les 19 hores, nel Hotel Barceló Fez-Medina), en Casablanca (miércoles 21, a les 20 hores, nel Instituto Cervantes) y Marrakech (vienres 23, a les 20 hores, nun sitiu por determinar), a la espera de sumar feches nueves.

Na so xira per Marruecos, Braga va acompañar a la voz del Che de Cabaños col arpa, la gaita y la gaita rabil, anque tamién va interpretar dellos cantares. El repertoriu va tar centráu na canción tradicional asturiana.

Fonte:  Asturies.com