‘El requexu de los escolinos’, que suma dibuxos nuevos, prepara un especial d’Antroxu

Leticia Díaz El requexu L'Anguleru

  Queda una selmana pa la llegada del Antroxu y "El requexu de los escolinos" de ‘A la gueta los sueños’ quier celebralo con un especial. Asina, yá podéis unvianos los vuesos dibuxos y testos sobre esta folixa tan prestosa pa incorporalos a esta seición que ta acabante de recibir dellos trabayos.

  Éstos correspuenden a neños de 7 a 10 años del Colexu Públicu Xovellanos de Panes y tienen como protagonista al personaxe navidiegu favoritu de los neños y neñes asturianos: L’Anguleru. Cola cercanía de l’Antroxu, vamos entamar un especial nuevu sobre esta fiesta na que los disfraces son protagonistes. Por ello, maestros y padres, o los propios neños, pueden unvianos dibuxos o testos sobre esta folixa col nome y la edá –tamién el colexu si se fixeron en clase– al traviés de la direición redaccion@asturies.com o pel Facebook de ‘A la gueta los sueños’.                                                                     Fonte: Asturies.com

Xixón celebra los quintos Alcuentros cola cultura tradicional

Xixón celebra los quintos Alcuentros cola cultura tradicional

El Vieyu Institutu de Xixón acueye esti sábadu 10 de payares los quintos Alcuentros cola cultura tradicional, organizaos pol Conceyu de Cultura Tradicional Vezos Astures, una asociación que tien como oxetivu recoyer estudiar y espublizar el conxuntu de tradiciones asturianes, especialmente los aspeutos rellacionaos cola música, el baile y los elementos etnográficos que lleven arreyaos.

Vezos Ástures enfótase na perimportante xera de divulgar la tradición y pa ello entama per quintu añu consecutivu “Los Alcuentros cola cultura tradicional”, dientro de los que van impartise unes conferencies sobre folclor nes que se va cuntar con estudiosos d'otres Comunidaes Autónomes.

Amás de les conferencies, que se van celebrar nel Vieyu Institutu, van impartise pela tarde nel Colexu Xovellanos talleres de baille con acompañamientu musical en directu y va entamase un baille con espicha nel llagar Herminio y conciertu del Tríu Santos, Caleya y Varela.

Más información: Porgrama completu d’actividaes.

Fonte: Asturnews.