I Cursu d'asturianu en Valencia

Ñaz de la collaboración de la Casa d'Asturies cola ALLA ya Iniciativa pol Asturianu.

La Casa d’Asturies en Valencia en collaboración con Iniciativa pol Asturianu y l’Academia de la Llingua Asturiana presenten el I Cursu d’Asturianu en Valencia. El cursu impartiráse de forma presencial en 25 hores dividides en clases de dos hores, un día a la selmana, d’ochobre a xineru de 2015 nel llar de la Casa d’Asturies.

A lo llargo les clases trataránse nociones de gramática, vocabulariu y sociollingüística como pa poder comprender y caltener una conversación básica al traviés de diferentes recursos didáuticos, recreación d’escenes, exercicios, videos, cantares… El cursu tará reconocíu con un diploma d’aprovechamientu emitíu pola Academia de la Llingua.

Cursu válidu tanto pa quienes desconozan totalmente la llingua asturiana como p'aquellos con conocencia por motivos familiares o d’orixe. Sí va ser requisitu necesariu pa siguir adecuadamente'l cursu lleer y escribir de forma fluyida en llingua castellana.

Matrícula 5€ pa socios de la Casa d’Asturies y 7€ pa los que nun lo seyan (inclúi'l material didáuticu que se va usar nel cursu)

• + info

Fonte: Infoasturies

Iniciativa pol Asturianu y la Casa d'Asturies en Valencia pondrán en marcha un cursu d'asturianu

Asperen que seya l'entamu de más collaboraciones.

 Tres un conceyu celebráu nos últimos díes  en Xixón ente miembros de les direutives de la Casa d'Asturies en Valencia y d'Iniciativa pol Asturianu, llegóse al alcuerdu de poner en marcha un cursu d'asturianu de forma conxunta nel llar d'esti centru asturianu asitiáu en territoriu valencianu.

Iniciativa pol Asturianu, que tien entamaes iniciatives formatives d'esti tipu en territoriu asturianu y en cursos a distancia, va echar un gabitu pa poner en marcha esti programa formativu, entregando materiales y guiando'l cursu, collaborando na so difusión y participando del procesu formativu.

Según manifiesten dende Iniciativa pol Asturianu, "nun podemos tar más satisfechos por esta nueva iniciativa de la que se va dar anuncia con más detalle a lo llargo del mes de setiembre. Felicitamos a la Casa d'Asturies en Valencia pol usu que fai yá davezu y con normalidá de la nuesa llingua y por esta iniciativa qu'aguardamos seya l'entamu de más collaboraciones. Animamos a otros centros asturianos a collaborar con nós n'iniciatives asemeyaes a esta".

• Casa d'Asturies en Valencia

Fonte: Infoasturies