González Espina lleva'l VII premiu María Xosefa Canellada por "Cápsules de tiempu"

Carlos González Espina llicenciáu en Lliteratura y bibliotecariu desempeña so llabor na Fundación Municipal de Cultura del Conceyu de Xixón

   La Conseyería d’Educación, Cultural y Deporte falló’l primer de los cinco premios lliterarios del 2014. Foi’l María Xosefa Canellada de lliteratura infantil y xuvenil, que recayó nel trabayu ‘Cápsules de tiempu’, obra del escritor piloñés Carlos González Espina.  

   Ana María Fueyo, direutora xeneral de Política Llingüística, presidió ayeri la reunión del xuráu que tuvo llugar na Casa la Cultura de Santolaya cola presencia de les escritores y especialistes en lliteratura infantil y xuvenil Lourdes Álvarez García, Iris Díaz Trancho y Marisa López Diz, amás del alcalde de Cabranes, Gerardo Fabián Llavona; y Alonso Zamora Canellada, fíu de la escritora que da nome al gallardón. Ente les ocho obres presentaes, decidieron conceder por unanimidá’l premiu –dotáu en 3.000 euros– a González Espina por “la calidá del rexistru llingüísticu y el dominiu d'un estilu narrativu autorreferencial col que se desenvuelve una hestoria unitaria, pensada n'asturianu y de gran capacidá didáctica».

   Llicenciáu en Lliteratura y bibliotecariu, González Espina desendolca anguaño’l so trabayu na Fundación Municipal de Cultura, Educación y Universidá Popular del Conceyu de Xixón. Ye autor de bien d’artículos y reseñes en revistes especializaes, amás de publicar los llibros ‘El Café Gijón’ (2001) y ‘La Comedia Gijonesa’ (2001). Fundó, xunto con Marina Lobo, Llibros del Pexe, una de les primeres editoriales de llibros n’asturianu que güei tien continuidá n’Impronta, cola que ta acabante d’espublizar el títulu pa neños y neñes ‘Falar ensin parar’. En Llibros del Pexe centróse sobre manera na traducción a la llingua asturiana obres de lliteratura infantil y xuvenil, anque tamién firmó títulos como ‘El curiosu alcuentru de don Quixote y la Princesa del Arbeyu’ (2005).                                   Fonte: asturies.com

Impronta presenta cinco títulos de lliteratura infantil en llingua asturiana

Na semeya, González Espina, López Alfonso y Borque, nel Atenéu Obreru de Xixón

     L’Atenéu Obreru de Xixón acoyó esti xueves la presentación de los cinco títulos nuevos de lliteratura infantil en llingua asturiana d’Impronta. Trátense de llibros que lleven la firma de Bernardo Lodares (Leonardo Borque), Alfonso López Alfonso, Carlos González Espina y Irene Riera.

   González Espina foi l’encargáu de conducir l’actu n’ausencia de Marina Lobo, responsable d’una “modesta editorial qu’echó a andar hai un par d’años y que la editora acostuma a calificar como ‘casa editorial’, non a la manera de les antigües cases editoriales tipo Espasa-Calpe o Salvat, sinón más sorrayando la pallabra ‘casa’ que ‘editorial’ porque too faise en casa y colos de casa”. ‘El llibru de les vocales’, de Francisco Álvarez Velasco, abrió l’añu pasáu la producción infantil en llingua asturiana d’Impronta, catálogu que s’amplía con cinco títulos de “autores qu’hasta agora nun teníemos un perfil d’autores lliteratura infantil, como-y paso a Paco Velasco”, por pidimientu de la propia editorial nel so enfotu de visibilizar l’asturianu.

   Tres esta introducción, Borque garró la pallabra pa falar de la so obra ‘Teba’, tornada al asturianu por Carmen Fernández, un cuentu que, a diferencia de lo habitual, “ye una historia real dafechu na que nun hai nada de fantasía”. L’autor, que firma col nomatu de Bernardo Lodares, retrocede a la Posguerra, “nun ambiente de fame y miseria”, pa falar de la perra de la so familia, ‘Teba’. L’autor vivía xunto colos suyos al llau de la vía del ferrocarril y, cuatro quilómetros más arriba nun molín, los sos güelos. “La perra ayudónos a ponenos en comunicación colos nuesos güelos y percorría esos cuatro quilómetros con recaos nel collar de lo que nos facía falta”, esplicó con ciñu Borque. “Ye una historia de solidaridá familiar, obediencia y xenerosidá”, añadió.

Col sofitu del so fíu Ernesto             ‘Valentín y el monte d’azucre’ ye’l primer llibru de López Alfonso “na mio llingua materna, una llingua a la que siento que-y debo bastante más de lo que-y doi y qu’inoro muncho más de lo que me gustaría”. Tamién ye’l primer llibru pa neños del autor, xera pa lo que contó col sofitu del so fíu Ernesto, que cuando escribió la historia tenía 7 años. “Suyu ye’l rellatu de Valentín al que yo namái tuvi que poner cuatro trazos de vida cotidiana” y colos que trató de dar col tonu d’un neñu d’esa edá. Pa da-y más valir al llibru, López Alfonso contó coles ilustrucaciones de Claudia González Lobo. “Nél pasa tanto más la imaxe como la pallabra”, aseguró.

   Riera, autora de ‘Queridu día’ y ‘Hai que tomar midíes’, escusó tamién la so ausencia nel actu y dexó un escritu que lleó González Espina sobre estes histories que son continuidá de ‘Enantes de nacer yo…’ –segundu llibru pa neños n’asturianu espublizáu por Impronta– dientro de la serie ‘Bonos principios’ que cuenta con ilustraciones de Lara González Lobo. Na comunicación, la escritoria esplica como nestos rellatos la protagonista ye una neña ensin nome que mira inocente a la realidá. “Fai preguntes qu’ella mesma se contesta…, o non”, añade pa esplicar darréu cómo en ‘Queridu día’ s’enfrenta a una xornada nueva tres despertar o cómo nun-y valen les midíes establecíes en ‘Hai que tomar midíes’, yá que’l mundu s’escaeció de les más importantes: “cómo se mide la tristura, el contentu, los besos, los abrazos…”.

   Pa zarrar, el conductor del actu comentó sobre la so obra, ‘Falar ensin parar’, que “ye un esperimentu sobre la vida propia de les pallabres, non sólo sobre la vida anterior, sinón sobre la vida propia que tienen les pallabres namái salir de la nuesa boca”. La protagonista de la mesma ye “una neña mui charrana que nun ye quien a controlar tolo que diz”, señaló González Espina sobre esta historia con illustraciones de Marina Lobo.  
Fonte: asturies.com