Álvarez Peña va falar sobre'l solsticiu de branu na cultura astur

Charra de la Lliga Celta d'Asturies

  Dientru'l Programa Añal d'Actividaes de la Lliga Celta d'Asturies, Alberto Alvarez Peña, etnógrafu y investigador de la Fundación Belenos, dibuxante y escritor, va poner la conferencia 'El solsticiu de branu na cultura astur'. Nella va falar sobre'l significáu del solsticiu de branu na cultura de nueso, les costumes, ritos y tradiciones rellacionaes pa con ello, y la so cristianización, ente otros asuntos.

  L'actu, que va presentar Fernán Morán, presidente de la Lliga Celta d'Asturies, va celebrase esta tarde, a les 19 hores, na xixonesa Biblioteca Pública Xovellanos. La entrada ye llibre hasta completar aforu.                                                                   Fonte: asturies.com

Yá hai programa pal XIII Seminariu d'Estudios Asturianos de la Fundación Belenos

Yá hai programa pal XIII Seminariu d’Estudios Asturianos de la Fundación Belenos

Los díes 17 y 18 de payares la Fundación Belenos entama en La Puela d’Allande una nueva edición, la XIII, del so Seminariu d’Estudios Asturianos, que nesta ocasión va tar dedicáu al “Arte Popular na sociedá tradicional asturiana”. La xornada del sábadu 17 ábrese bien ceo, a les 10’30 h., cola presentación del seminariu. A les 11’00 h. entamen les conferencies con Gerardo Díaz Quirós (“Considerances sobre teoría y fenomenoloxía del Arte Popular”) y, dempués, Ástur Paredes (“Arte Popular y modernidá: el casu del horru asturianu”).

Tres la xinta, les charres vuelven de magar les 17’00 h. con Jesús González Calle (“Arte Popular de tradición barroca nos horros y paneres asturianos”) y Alberto Álvarez Peña (“Ornamentación y simbolismu nos preseos tradicionales asturianos: cuernes, gaxapos, marcos, rueques…”). La xornada pesllaráse, tres la cena, col tradicional filandón nel Café Centro, onde habrá música del país. El domingu 18 ta empobináu a visitar, de magar les 11’00 h., dellos llugares d’Allande con bonos conxuntos d’horros y paneres y a aldericar en conceyu abiertu al rodiu’l tema “Simbolismu y funcionalidá nel Arte Popular”. A les 14’30 h. tendrá llugar la xinta y el pieslle d’esti XIII Seminariu.

El preciu de la matrícula ye de 35 € y l’agospiu opcional en “La Nueva Allandesa” (dende la xinta del sábadu a la xinta del domingu) de 60 €. Los contautos y comunicaciones puen facese al traviés del corréu seminariubelenos@gmail.com.

Fonte:  Asturnews.

Bertu Peña va charrar esti miércoles en Mieres sobre la Nueche de San xuan

Alberto Álvarez Peña va charrar esti miércoles 2o de xunu en Mieres sobre la Nueche de San Xuan.

Mieres ta viviendo les sos fiestes de San Xuan con un programa enllenu d’actividaes. Ente elles, esti miércoles 20 de xunu, a les 19.30 hores, Alberto Álvarez Peña va dar una conferencia nel Salón d’Actos de la Casa la Cultura Teodoro Cuesta, sobre Mitos y lleendes de la Nueche de San Xuan.

Alberto Álvarez Peña (Xixón, 1966) ye escritor, investigador sobre folclore asturianu y dibuxante. La temática principal sobre la que vien trabayando xira alredor de la mitoloxía asturiana, tema sobre’l que tien una obra bien amplia publicada en delles editoriales asturianes. Miembru del Conceyu d’Estudios Etnográficos Belenos, responsables de la edición de la revista Asturies. Memoria encesa d’un país, ye autor nes sos páxines de bien d’artículos y notes sobre la tradición asturiana. Nel añu 2012 ganó’l IV Premiu d’Ensayu Fierro Botas cola obra Mitoloxía de los santos n’Asturies. Raigaños paganos nel cristianismu, publicada va poco por Trabe. Na so faceta d’ilustrador hai que lu destacar como cofundador de la revista El llapiceru y del Salón del Cómic de Xixón.

Fonte:   Les Noticies.com