Llangréu celebra les Lletres Asturianes con esposición y talleres de cómic

L’Ayuntamientu de Llangréu celebra esta edición trenta y seis de la Selmana de les Lletres Asturianes con una esposición y talleres de cómic en llingua asturiana. La esposición "Celebrando una Llingua", un percorríu peles ediciones de la Selmana de les Lletres Asturianes, inaugurábase esti vienres coincidiendo col Día de les Lletres Asturianes y va poder visitase demientres esti mes de mayu nel Centru de Referencia de la Cultura y la Llingua asturiana Casa de los Alberti de Ciañu. Los talleres de cómic que van desenvolvese en llingua asturiana van tener llugar tamién na Casa los Alberti. Estos talleres teórico-prácticos tán abiertos a tolos centros escolares del conceyu y va ponelos el dibuxante Ruma Barbero, llicenciáu en Belles Artes que recibiere montonera premios como l’Alfonso Iglesias (2009) pola novela gráfica Manzajú, Comarca La Sidra (2003) col cómic-book Marcianaes o’l de la Tertulia Mallory al Meyor llibru n’asturianu por La Chelita. El Salvador1992 nel añu 2012. Fonte: Asturnews

Un recital lliterariu, "Compañeru dame tira", remata na Casa los Alberti de Ciañu los Xueves de Castilletes y Carbón

   Esti xueves 27, a les 20 hores, el recital lliterariu "Compañeru dame tira" va rematar los Xueves de Castilletes y Carbón en Ciañu. Esti recital enmárcase dientro de les V Xornaes Culturales De Castilletes y Carbón qu’organicen la Fundación Nuberu y l’Ayuntamientu de Llangréu.

   Nesta edición de Castilletes y Carbón que se remata agora, la Casa los Alberti de Ciañu acoyó les charres: Academia de la Llingua Asturiana, 34 años de trabayu que punxo l’Académicu de la Llingua y Presidente de la Fundación Nuberu Pablo Xuan Manzano; El procesu creativu na producción cinematográfica que lleó’l cineasta Pablo Casanueva; y Política cultural n’Asturies que lleó Ana González Rodríguez, Conseyera d’Educación Cultura y Deporte del Principáu d’Asturies.

   Compañeru dame tira ye un recital lliterariu nel que, con guión y dirección de Chechu García, van participar los y les escritores Milio Rodríguez Cueto, Miguel Allende y Solinca Turbón.

   Va ponese’l ramu a estes xornaes culturales con un conciertu del grupu Nuberu en Sobrescobiu’l 4 d’avientu, día de Santa Bárbara, patrona de la minería.                                                                         Fonte: Asturnews

V Romería de la primavera en Ciañu pa esta fin de selmana

   L’Ayuntamientu de Llangréu, en collaboración cola Asociación de Vecinos S. Antonio de Ciañu y les agrupaciones corales José León Delestal, Santa Apolonia, S. Andrés Sergio Domingo, Polifónica L’Entregu y Agrupación vocal Alfredo de la Roza organicen esta quinta fiesta de primavera que va tener llugar en Ciañu esti sábadu 31 de mayu y el domingu 1 de xunu.

   La Romería presenta una montonera actos que, dende la mañana’l sábadu, van llevar folixa y cultura tradicional per tol distritu llangreanu de Ciañu. El sábadu a les 11:00 hores, el disparu morteros va anunciar l’empiezu de la V Romería de Primavera en Ciañu pa siguir cola inauguración y apertura 1er Mercáu Tradicional Romería de Primavera. A les 13:00 hores empieza’l V Certame Cantando pelos chigres cola entrega llibros de cantares y rondes pelos chigres de Ciañu colos coros y pareyes de gaita y tambor. Yá de tarde, a les 18:00 hores va tener llugar una sesión de canción asturiana y l’actuación de la Bandina Tradicional Valle del Nalón nel quioscu’l parque Rosario Felgueroso de Ciañu. La tarde’l sábadu va rematase con una actuación del grupu folk Degañans a les 19:30 horas.

   Pal domingu, amás de siguir col Mercáu Tradicional de Primavera, a les 11:00 va haber diana floriada con gaita y tambor, desfile de xigantes y cabezudos y disparu de morteros. A les 12:30 hores va haber un conciertu de la Banda Música de Llangréu nel quioscu’l parque de Ciañu. Dempués, a les 13:30 va tener llugar la segunda parte del V Certame Cantando pelos chigres. Yá de tarde, a les 17:00h, el parque de Ciañu va ser escenariu d’actividaes pa tolos públicos: xuegos y deportes tradicionales, atracciones pa neños y neñes y actuaciones de bandines tradicionales y pareyes de gaita y tambor. A les 17:00 hores va tener llugar la V ROMERÍA DE PRIMAVERA cola actuación nel quioscu’l parque de los coros, canción asturiana, la Bandina Tradicional Valle del Nalón y el Colectivu Musica Tradicional y Baille L’Enguedeyu, too esto con escenariu llibre y pipa de sidra. Va poner el ramu a esta romería’l conciertu de Los Foolanos a les 19:00 hores nel quioscu’l parque Rosario Felgueroso de Ciañu. Demientres estos dos díes y hasta’l 27 de xunu, el Centru de Referencia de la Cultura y la Llingua Asturiana Casa de los Alberti va acoyer la esposición Ciañugrafía III, Ciañu n’imaxenes.                                        Fonte: Asturnews