Carta abierta al Sr. Conseyeru de Cultura y Deporte

Cola nuesa consideranza:

La política llingüicida y clientelista de los gobiernos d’Areces obligaron-y al Aconceyamientu de Xuristes pol Asturianu a tener qu’amosar, de contino y per años, la so cara más combativa y fosca: la única posible cuando se llucha pola sobrevivencia.

Como exemplu, quiciás nun sobre refertar, porque la memoria ye davezu feble, qu’una cenciella fras escrita nun impresu oficial (“Día 7-3-07, a les 9:30 hores, pruebes cardiolóxiques n’Hospital Xeneral d’Asturies”) valió-y al gobiernu aquelli pa provocar una retafila pleitos qu’entá nun se zarró porque queden por resolver dos recursos d’amparu, l’ún énte’l Tribunal Européu de los Drechos Humanos y, l’otru, énte’l Tribunal Constitucional.

Por contra, al primer encamientu que-y ficiemos, el nuevu gobiernu arrespuende col testu darréu, escritu en llingua asturiana:

“Estimáu Sr.: Recibíu’l so escritu de fecha 5 d’agostu de 2011 nel que se fae’l pidimientu de que tolos impresos emplegaos davezu o n’asuntos concretos nes Conseyeríes del Principáu d’Asturies tengan redacción billingüe, castellán-asturianu, quiero treslladá-y que valoramos positivamente la so propuesta y que la estudiaremos ente les posibles llinies de trabayu na normalización llingüística del asturianu. Uviéu, a 17 d’agostu de 2011. El Conseyeru de Cultura y Deporte. Emilio Marcos Vallaure”.

Avezaos al tratu arispiu, cuando non direutamente a l’aición represiva, del vieyu gobiernu, les respetuoses pallabres de so suénenmos perbien y danmos pie a la esperanza de poder amosar la parte bonal de nós, la cara negociante y comprensiva. Eso sí, siempres que seya faciendo camín, dando pasos, midíos pero decidíos, p’haza una sociedá asturiana dafechamente tolerante pa colos drechos llingüísticos de tolos sos ciudadanos.

Con respetu y enfotu, reciba un saludu candial.

N’Uviéu a dos de setiembre de dos mil once.

Xurde Blanco. Secretariu del Aconceyamientu de Xuristes pol Asturianu.

Fonte: Infoasturies

L'Aconceyamientu de Xuristes pol Asturianu pide la dimisión del Alcalde Noreña por nun permitir escritos n'asturianu

Xurde Blanco Puente, na so condición de Secretariu del Aconceyamientu de Xuristes pol Asturianu vieno acabante unviar una instancia a los conceyales del Ayuntamientu de Noreña onde-yos pidi que faigan dimitir al Alcalde pola so pergrave decisión de refugar la moción d’un conceyal por dir escrita n’asturianu.
Na instancia firmada por Xurde Blanco dizse que "pente medies del presente escritu la Xunta Direutiva del Aconceyamientu de Xuristes pol Asturianu quier tresmitir a tolos conceyales del Ayuntamientu de Noreña la so indignación énte’l despreciu que l’entá alcalde amosó pa cola llingua asturiana nel fechu de refugar la moción d’un conceyal por dir escrita n’asturianu. Da vergoña ayena refiertar a un cargu públicu, a estes altures del sieglu XXI, que la Constitución entama afitando que “La Nación española, naguando por asitiar la xusticia, la llibertá y la seguridá y promover el bien de los que nella s’inxerten, n’usu de la so soberanía, proclama la so voluntá de: ... Protexer a tolos españoles y pueblos d’España nel exerciciu de los derechos humanos, les sos cultures y tradiciones, llingües ya instituciones”; que l’artículu 9.2 de la mesma Constitución obliga a los poderes públicos “a facer los posibles pa que la llibertá y la igualdá del individuu y de los grupos nos que s’inxer seyan reales y efeutives”; que cola ratificación de la Carta Europea de les Llingües Rexonales o Minoritaries (BOPA de 15 de setiembre de 2001), l’Estáu español obligóse a la “facilitación y/o el fomentu del emplegu oral y escritu de les llingües rexonales o minoritaries na vida pública”; o que los artículos 3 y 4 de la Llei 1/1998, d’usu y promoción del bable/asturianu declaren, afiten y emparen el derechu de tolos ciudadanos al llibre usu de la llingua del país".
Sigún l'Aconceyamientu esta "Indignación y vergoña que mos torguen dafechu l’empobinamos al desagradecíu ciudadán –y llamentablemente alcalde de un conceyu asturianu- que paga la hospitalidá qu’esti país-y dio con un xestu perdespreciatible escontra la primera seña d’identidá del pueblu asturianu: la so llingua".
Darréu de too ello, l'Aconceyamientu encamienta a los conceyales de Noreña " qu’adopten les resoluciones afayadices pa desaposiar darréu del cargu d’alcalde a un suxetu que, a lo que tresciende a la opinión pública, namás s’esmuela pel sueldu y dietes que nagua por cobrar y que, a poco que-y rasquen, amuesa con xeitu autoritariu’l so enclín ideolóxicu preconstitucional.
Fonte: asturnews
Más info: lne, escritu d'Aconceyamientu de Xuristes pol Asturianu

AXA encamienta al gobiernu la redaición billingüe de tolos impresos de l'alministración

L'Aconceyamientu de Xuristes pol Asturianu:
Nel so escritu, empobináu al Presidente y al Conseyeru de Cultura, los xuristes afiten que ye’l momentu afayaizu pa facelo porque munchos d'ellos tienen d’aperiase coles nueves competencies y denomamientos de Conseyeríes, Viceconseyeríes y Direiciones Xenerales; que la midida ye de poco costu “porque anguaño tolos impresos salen direutamente del ordenador, que non de la imprenta, y el so camudamientu ye un trabayu que lu fai –ensin matase- un funcionariu nuna selmana (dos puestos a desaxerar) per Conseyería”, siendo asina que la de Cultura cunta con una direición Xeneral de Política Llingüística sirvida per once funcionarios; y qu’un xestu tan cenciellu y baratu sedría pa la normalización social del asturianu “muncho más granible que los dolce años de política arecista na que’l popularmente conocíu como ventanucu de política llingüística dedicóse a repartir perres, aparentemente al debalu, pero que cuasi siempres viníen a cayer nes mesmes manes”.

Política clientelista y llingüicida de los gobiernos d’Areces que con una mano esbardiaron los recursos públicos demientres cola otra torgaben a la ciudadanía l’exerciciu de los drechos proclamaos nes lleis, pente elles la 1/1998, d’usu y promoción del bable/asturianu, onde se “declara, afita y empara’l drechu de tolos ciudadanos al llibre usu de la llingua llariega ensin discriminación dala” énte l’Alministración asturiana. Drechu que ficieron imposible porque nel intre d’empobinase a ella pa xestionar cualesquier asuntu desixíen –y desixen- l’emplegu d’un impresu redautáu dafechu en castellán.

Faen alcordamientu los xuristes de que la igua darréu d’esti asuntu ta dientro del programa del nuevu gobiernu, “apallabráu col pueblu asturianu nes elleiciones y, robláu énte la Xunta Xeneral del Principáu nel procesu de la proclamación del Presidente”, no que cinca al desendolcu bonal de la mentada Llei 1/1998.

Fonte: Infoasturies

Impugnáu nos tribunales un alcuerdu de la Universidá empobináu a torgar drechos llingüísticos

L’Aconceyamientu de Xuristes pol Asturianu (AXA) impugna un alcuerdu del Conseyu de gobiernu de la Universidá d'Uviéu empobináu a torgar l'exerciciu de dellos drechos llingüísticos proclamaos nuna llei y amparaos pel Estatutu d'Autonomía p'Asturies.

L’Aconceyamientu de Xuristes pol Asturianu vien de formalizar, énte’l Tribunal Superior de Xusticia d’Asturies, la so demanda escontra l’Alcuerdu del Conseyu de Gobiernu de la Universidá d’Uviéu, de 28 de mayu de 2009 (BOPA de 27 de xunu), pol que s’apreba’l Reglamentu pa la presentación y receición d’escritos en bable/asturianu.
Les sides de los xuristes pa impugnar l'alcuerdu son les que siguen:

1ª. La Universidá foi tresferida a l’Alministración del Principáu d’Asturies per Real Decretu 848/1995. Arriendes d’ello, el Decretu 233/2003, pel que s’apreben los Estatutos de la Universidá d’Uviéu, nel so artículu 6 dispón que l’usu de la llingua asturiana “tendrá’l tratamientu qu’establezan l’Estatutu d’Autonomía y la llexislación complementaria, garantizándose la non discriminación de quien la emplegue”.

2ª.- Quier ello dicir que la Universidá d’Uviéu tien de respetar el mandáu del artículu 4 del Estatutu d’Autonomía d’Asturies y con ellilo dimpuesto nel artículu 4.2 de la Llei 1/1998, de 23 de marzu, d’usu del bable/asturianu: “Tendráse por válidu a tolos efeutos l’usu del bable/asturianu nes comunicaciones de pallabra o per escritu de los ciudadanos col Principáu d’Asturies”. Poro, la llei nun pon torga dala a tales comunicaciones, nin por razón de la materia, nin pola condición del ciudadán, nin pol muérganu al que s’empobinen, nin por denguna otra condición.

3ª.- Por contra, l’Alcuerdu impugnáu, quier llendar la posibilidá d’empobinar escritos a la Universidá per razón:
a) Del receutor: namái permite los empobinaos a los Muérganos Xenerales, colo qu’esclúi los que se quieran facer a los Muérganos de Gobiernu de Facultaes y Escueles, Departamentos ya Institutos Universitarios d’Investigación, pente otros (artículu 1 y, per conexón, 2, 3 y 4).
b) De la forma: solo tramitará los escritos presentaos “per comparecencia personal”, dexando fuera, por exemplu, los fechos pente medies de representante (artículu 2 y per conexón, 3, 4).
c) Del procedimientu: “nel marcu de procedimientos alministrativos entamaos pela parte interesada” (si’l procedimientu s’entama d’oficiu,el ciudadán afeutáu nun pue empobinase a la Universidá n’asturianu) y siempres que nun seyan “procedimientos complicaos, de tramitación urxente o de curtios plazos de resolución, talos como los rellativos a reclamaciones elleutorales, solicitú de convocatories d’esame especiales o estraordinaries, reclamaciones escontra prebes d’accesu a la Universidá, incidentes de recusación o cualesquier otru que, peles razones espuestes, determine’l Reutor”. Al cabu: pue emplegase l’asturianu en cásique dengún procemientu alministrativu na Universidád’Uviéu y siempres y cuando-y dea pela gana al Reutor consentilo (artículu 2 y per conexón 3 y 4).

4ª.- Al Aconceyamientu de Xuristes pol Asturianu abulta-y nulu de planu l’Alcuerdu impugnáu por conculcar dafechu’l principiu de xerarquía normativa (una norma inferior, nun pue aminorgar los drechos reconocíos n’otra superior, nesti casu la Llei 1/1998) proclamáu nel artículu 9.3de la Constitución y desendolcáu pelos artículos 51 y 62 de la Lei 30/1992, de Réxime Xurídicu de les Alministraciones Públiques y del Procedimientu Alministrativu Común.

Fonte: Infoasturies