Los músicos que tomaron parte nos conciertos 'pola Oficialidá' recibieron esti martes el reconocimientu de la XDLA. Foi mientres l’actu d’inauguración de la muestra ’25 años de conciertu en cartelos’, que se pue visitar hasta'l vienres.
La esposición, asitiada na uviedina Plaza’l Pescáu, presenta caún de los cartelos de les venticinco ediciones convocaes –la vixésimoquinta va celebrase esti sábadu en Xixón–, amás d’entraes y dalguna semeya. Una perbona forma de repasar la historia músical asturiana na llingua del país y de contemplar la evolución nel diseñu de los cartelos, asina como pa facer alcordanza d’aquelles ediciones de tiempos más mozos d’esta folixa reivindicativa que vien entamando la Xunta pola Defensa de la Llingua Asturiana (XDLA) de forma ininterrumpida dende l’añu 1989.
Aprovechando esta muestra, el coleutivu cívicu tamién quixo facer un homenaxe a tolos músicos que, de manera desinteresada, collaboraron en dalguna edición del ‘Conciertu pola Oficialidá’, polo que convidaron a los miembros de les casi 70 formaciones que xubieron al escenariu pa reivindicar esti derechu ciudadanu. Asina, acudieron al actu representantes de La Bandina, Los Berrones, Dixebra, Balandrán, La Coḷḷa Propinde, Fala non Caduca, Xera, La Cigua, DRD, La Tarrancha o K-Nalón, ente otros, que s’axuntaron pa facer una semeya de familia tres la pancarta qu’anuncia la esposición.
Enantes, Carlos Pulgar tuvo pallabres d’agradecimientu pa ellos: “Inauguramos nesti espaciu un percorríu modestu y significativu per un cachín de la historia d’Asturies. Un cuartu de sieglu de música y folixa, pero sobre too de compromisu y de reivindicación de la xente de la música asturiana y n’asturianu, que fuisteis quien a llevantar un sector y una industria que ganó ún de los pocos espacios de normalidá pa la llingua asturiana. Gracies a vos el panorama cambió y anguaño pocos son agora los grupos asturianos que nun se planteguen cantar les sos composiciones dafechu o en parte n’asturianu”, principió’l voceru de la XDLA la so intervención, que considera que’l Conciertu pola Oficialidá tuvo muncho que ver en qu’esti avance fora posible. D’igual forma, recordó la collaboración destinteresada de los músicos nesta iniciativa y n’otres entames pol coleutivu cívicu. “Siempre atopemos esa ayuda. Por too eso, el valir d’esti actu nun ta nos cartelos, sinón no que ta detrás d’ellos: les hores y hores de trabayu, de compromisu y música que tán representaos n’ellos”. Por último, Pulgar fixo alcordanza d’aquellos músicos “que participaron colos sos grupos nestos conciertos y que yá nun tán equí pa celebralo con nós y poder reivindicar”.
Pa zarrar l’actu, l’Asturiana Mining Company ufrió un conciertu breve, a lo que siguió un pinchéu. La esposición, asitiada na Plaza’l Pescao, va tar abierta’l públicu de 11 a 14 hores y de 18 a 21 hores, hasta’l vienres. El sábadu, a les 19.30 hores nel Parque de los Hermanos Castro/Parque Inglés de Xixón, va tener llugar el XXV Conciertu pola Oficialidá, nel que van participar N'Arba, Felpeyu, La Tarrancha, La Bandina, Dixebra y Dani Stylo.
Fonte: Asturies.com
