Primer biblioteca en llingua bretona dafechu

El més pasáu abrió la primer biblioteca en llingua bretona en Kawan (Côtes-d'Armor). Esta biblioteca ye unica en Bretaña. Nun ye una biblioteca temática más sobre Bretaña, sinon una biblioteca en llingua bretona abierta a toos. Nella alcuéntrense llibros, discos, revistes y documentos d’archivos d’escritores en bretón. Son de la Bibliothèque des Côtes-d'Armor, de Levraoueg Breizh (llibros), de Dastum (informatica, discos) y de numberoses donaciones privaes.
El testu más antiguu nesta llingua consta de seyes o siete llínies qu’apaecen nun manuscritu llatinu del sieglu XIV. A lo llargo del sieglu XX dióse a conocer la obra de nuevos autores bretones en diverses espublizaciones, como Gwalarn (Noroeste, 1925-1944); Liamm (Venceyu, dende 1946). “La Nuesa Señora del Carme” (1942), de Youenn Drezen, ta considerada una de les meyores noveles bretones modernes. Ente los poetes modernos tán Jean Pierre Colloc'h, autor de poesía relixosa, y Roperzh Er Mason, autor d’una poesía de la natura. El teatru ye popular en Bretaña dende la edá media y Tanguey Malmanche, figura ente los fundadores de la escuela de teatru moderna.
Camentamos que ye un bon exemplu a siguir n’Asturies onde entá nun hai denguna institución d’estes carauterístiques.

XV concursu de cuentos pa rapacinos y mozos d'Asturies

L'Asociación Cultural "El Portón", l’Asociación Xuvenil “El Tragaluz” y la Fundación Docente de Mineros Asturianos, afiten un concursu, que tien por oxetu l'espardimientu de la lliteratura ente rapacinos y mozos, coles siguientes bases:
I.- Toles obres fadránse n´asturianu, mecanografiaes a doble espaciu y non superiores a ocho fueyes (pa rapacinos a mano tamién).
II.- Los orixinales sedrán inéditos, non premiaos con anterioridá nin suxetos a nengún compromisu d´edición.
III.- Creyaránse tres categoríes:
A) Primaria: 1º premiu 100 euros en llibros. 2º premiu 50 euros en llibros.
B) Secundaria, módulos y bachillerato: 1º premiu 150 euros en llibros. 2º premiu 100 euros en llibros.
C) Xóvenes de 19 a 30 años inclusive 1º premiu 300 euros. 2º premiu 200 euros.
IV.- Puen participar llibremente y presentando un númberu indefiníu d´obres toes aquelles persones interesaes.
V.- La temática ye llibre.
VI.- El premiu podrá declarase ermu.
VII.- El xuráu formaránlu persones escoyíes pola asociación.
VIII.- L´orixinal y tres copies empobinaránse a nome de l´asociación cultural "EL PORTÓN" al apartáu 140 d´Uviéu, indicando´l nome del concursu y la categoría.
IX.- El trabayu mandaráse firmáu col nomatu y xunto a ésti mandaráse una plica nun sobre peslláu onde se llante: nome, apellíos, edá, señes (cai, númberu, códigu postal, llocalidá). Too esto enantes el llunes 28 d´Abril de 2008.
X.- Los trabayos premiaos son propiedá de l´asociación xuvenil que reservará´l so drechu a editalos. En nengún casu se tornarán los orixinales a los autores. XI.- A les decisiones del xuráu nun podrá retrucase, ésti entiende los presentes finxos.
XII.- Participar na convocatoria lleva inxerío aceptar perdafechu estes bases.

XI concursu de rellatos curtios "28 de xunu" de XEGA

El colleutivu Xente Gai Astur (XEGA) convoca la oncena edición del so concursu de rellatos curtios nomáu “28 de xunu”, porque ye’l día internacional de gais, llesbianes, bisexuales y transexuales. Los rellatos han ser creyaciones inédites qu’aborden la temática gai nun másimu de seyes fueyes per una sola cara.
Los rellatos puen presentase n’asturianu o en castellanu. Valoraráse la calidá lliteraria del rellatu y la presentación d’una visión positiva de la cuestión LGTB.
Los rellatos han presentase per triplicao y roblaos con nomatu dientro d’un sobre peslláu. N’otru sobre interior han escribise los datos y un disquete o CD-ROM cola versión dixital del rellatu, pa la so edición en casu de resultar ganador.
El plazu fina’l 3 de xunu a les 16 hores. Han mandase a la sede de XEGA, asitiada na cai Gascona 12, 3u, 33001 Uviéu.

Afítense dos premios: el primer premiu, dotáu de 200 euros y el finalista, dotáu de 100 euros.
Los rellatos premiaos sedrán espubizaos na revista Asturiasgai.

Carta Europea de les Llingües Rexonales o Minoritaries

Amosamos equí dellos oxetivos y principios de la Carta, que nun se cumple n'Asturies pesia que'l gobiernu español la tien roblao va años:

1. Nos territorios nos que se falen diches llingües y según la situación de caúna d’elles, les Partes basarán la so política, la so llexislación y la so práutica a:
a) la reconocencia de les llingües rexonales o minoritaries como espresión de la bayura cultural;
b) el respetu del área xeográfica de cada llingua rexonal o minoritaria, actuando de suerte tala que les divisiones alministratives yá esistentes o nueves nun seyan una torga pal fomentu de dicha llingua rexonal o minoritaria;
c) la necesidá d’una aición resuelta de fomentu de les llingües rexonales o minoritaries, cola fin de salvaguardales;
d) la facilitación y/o el fomentu del emplegu oral y escritu de les llingües rexonales o minoritaries na vida pública y na vida privada;
e) el caltenimientu y el desendolcu de rellaciones, nos ámbitos qu’abarca la presente Carta, ente los grupos qu’empleguen una llingua rexonal o minoritaria y otros grupos del mesmu Estáu que falen una llingua utilizada de manera idéntica o paecida, asina como l’afitamientu de rellaciones culturales con otros grupos del Estáu qu’utilicen llingües estremaes;
f) la provisión de formes y medios afayadizos pal enseñu y l’estudiu de les llingües rexonales o minoritaries en tolos niveles apropiaos;
g) la provisión de medios que permitan deprender una llingua rexonal o minoritaria a los non falantes que residan nel área nel que s’emplega dicha llingua, si asina lo deseyen;
h) la promoción d’estudios ya investigación sobre les llingües rexonales o minoritaries nes universidaes o centros equivalentes;
i) la promoción de formes apropiaes d’intercambios tresnacionales, nos ámbitos cubiertos pola presente Carta, pa les llingües rexonales o minoritaries utilizaes de manera idéntica o asemeyada en dos o más Estaos.

2. Les Partes comprométense a desaniciar toa restricción o dificultá con respeutu a la utilización d’una llingua rexonal o minoritaria que desaliente o ponga en pelligru’l caltenimientu o el desendolcu de la mesma.

N'ALCORDANZA DE NENÉ LOSADA RICO

Nené Losada Rico (L.luarca 1921-2009) escribióu dende mui nena, pero foi l'alcordanza de la xente ya l'aldea lo que feixu que comencipiara a faelu n'asturianu. Feixu muitas intervenciones l.literarias en L.luarca, Treviyas, ya enforma nos homenaxes al afamáu poeta valdesanu Fernán Coronas. Pertenez a la xeneración del Surdimientu.


Dedicóuse a la poesía. Nas suas obras n'asturianu destacan: Cantares valdesanos (Ed. Llibros del Pexe, 1992), Entre apigarzos (Ed. Trabe, 1997), El nome de las cousas (Ed. Trabe, 2001), Fueyas que reverdecen (Ed. Atenéu Obreru de Xixón).


Nené Losada dexóunos esti sábadu pasáu 11 d'abril, que valgan estas l.letras pa la sua alcordanza como escribiera Fernán Coronas:

"... Quieru you cantar cantares, nel idioma mas harmosu desta costa de esmeralda: Ya escribir lus mious pensares, cun vocables ya espresiones de la vieya fala xalda"

La nuesa llingua

¿Como pudiste esqueicer

Valdés, conceyu del alma,

lo que un día foi'l granu

que se recueye ya guarda

como se guarda un tesoru?

Ya tú deixaste na paya

lo que, ha tierripu, foi semandu

la gran Hestoria asturiana.

¡Buscái nos llibrus agora,

pueblus, aldeas ya brañas

del conceyu de Valdés,

el granu guardáu nel arca,

ya semáilu pal futuru,

que'l falar nuesu tien alma!.

¡Non deixéis que na cultura

dormezca la nuesa fala!.

(Autora'l poema: Nené Losada na "Antoloxía de muyeres poetes asturianes s. XX")

El Parllamentu navarru quier una emisora n'euskera

La comisión d’Educación aprebó esti mes, cola oposición d’UPN, una resolución pola que s’insta al Gobiernu de Navarra a valorar la implantación d’una emisora de radio qu’emita n’euskera dafechu.

La resolución insta al Executivu a que, "dea conformidá colos dos informes del Comité d’Espertos del Conseyu d’Europa, valore en futures axudicaciones d’emisores de radio la implantación autorizada d’una cuyos programes s’emitan dafechu n’euskera, tomando pa ello en consideranza el llabor radiofónicu que se vien realizando a favor del euskera nes caberes décades".
Na esposición de motivos de la iniciativa impulsada por NaBai alúdese a esos informes y a los encamientos del Conseyu de Ministros del Conseyu d’Europa sobre l’aplicación de la Carta Europea de les Llingües Rexonales o Minoritaries en Navarra, "que nel so artículu 11 recueye’l compromisu de garantizar la creyación de, a lo menos, una emisora de radio y un canal de televisión nes llingües rexonales o minoritaries".

Les llingües autonómiques nos colexos públicos

La educación na llingua minorizada ye una ferramienta de primer orde pal so deprendimientu y pa la so normalización social. Nesta llista, tolos casos correspuenden a autonomíes onde la llingua propia ye cooficial col castellanu, sacante Asturies onde entá nun tien esi estatus llegal.

Galicia
Afítase un mínimu del 50% d’asignatures en gallegu.

Euskadi
Hai tres modelos, en castellanu col euskera como asignatura (D), billingüe (B) y n’euskera col castellanu como asignatura (A). La opción n’euskera ye la mayoritaria col 56%.

Cataluña
El catalán ye la llingua vehicular, col castellanu como asignatura.

Islles Baleares
Ye obligatoriu un mínimu del 50% en catalán, que se potencia como llingua vehicular. Quienes tienen dificultaes reciben clases de sofitu.

Valencia
Pue escoyese estudiar en catalán o en castellanu. 744 de 900 colexos ufierten catalán.

Asturies
L’enseñu ye voluntariu. Son 17.000 estudiantes, asina que’l 55%, de los alumnos de Primaria estudia l’asturianu. El 91 % de los centros ufierten clases d’asturianu.

Quebec y Valonia-Bruxelles sofiten les lliteratures de llingua francesa

Dos eventos recientes vienen a illustrar la implicación de Quebec (Canadá) y de Valonia-Bruxelles (Bélxica) empobinada a sofitar l’espardimientu de les lliteratures de llingua francesa.
La Ministra de Cultura y Audiovisual de Valonia-Bruxelles, otorgó’l Premiu a la Difusión de les Lletres nel Estranxeru de la Comunidá Francesa de Bélxica a Gilles Pellerin, profesor, autor y editor quebequense. Esti premiu, atribuyíu per primer vegada en 1998, gallardona a una persona de nacionalidá estranxera que, nel so país, trabayara na promoción de la lliteratura de Valonia-Bruxelles. El Sr. Pellerin, profesor de francés y de lliteratura, autor de noveles curties, ensayista, críticu lliterariu y responsable de delles revistes lliteraries, editor y direutor d’emisiones culturales y lliteraries, siempres se tien ocupao por defender la diversidá de les lliteratures de llingua francesa, ente elles la de Valonia y Bruxelles.
Per otra parte, Quebec cuntaba con una fuerte presencia na Feria del Llibru de Bruxelles d’esti añu. Unos cuarenta editores y una quincena d’autores participaron nesti importante eventu, que se cellebró en marzu y cuyu tema yera “Crisis y creyación”. Al marxe de la Feria, organizáronse actividaes d'escritura pública, permitiendo asina reaniciar l’espíritu que carauteriza los focos públicos d’escritura, empobinaos por escritores profesionales, tanto en Quebec como en toles partes del mundiu francófonu.

Quebec, con 7,6 millones d’habitantes, ye una de les naciones de Canadá (reconocida pol Parllamentu canadiense nel 2006) y la única rexón de Norteamérica col francés como única llingua oficial.
P’afondar nes estadístiques del francés en Quebec, pinchái equí :

http://www.spl.gouv.qc.ca/publications/statistiques/index.html

En Valonia, de 3,4 millones d’habitantes, más del 96% de les comunidaes (252 de les 262) tienen como llingua oficial única’l francés. Y en Bruxelles, de 1.100.000 habitantes ye oficialmente billingüe en francés y neerlandés, estímase que’l 50% de la población bruxellense ye francófona pol orixe de la so llingua materna, el 10% flamenca y el 40 % falen otres llingües (qu’utilicen cuasi esclusivamente como lingua franca al francés), nel so conxuntu’l francés ye emplegáu pol 95,5% de la población de cotidián.

Más de 9.000 persones sofiten "Doi la cara pola Oficialidá"

La campaña “Doi la Cara pola Oficialidá”, entamada pola plataforma Conceyu Abiertu pola Oficialidá, yá tien el sofitu de más de 9.000 persones nuna iniciativa na que tan dando “lliteralmente” la cara a favor de la reconocencia oficial pa la llingua asturiana, al traviés de semeyes con un cartelu con esi mensaxe.
El CAO felicítase “pola rápida y progresiva consecución de los oxetivos que se marcaron cuando se definió esta campaña: amosar el respaldu mayoritariu a la reivindicación llingüística y facer rescamplar qu’esi sofitu trescala tolos ámbitos sociales y xeneracionales de la sociedá asturiana, lo que sirve pa evidenciar que la braera protagonista del procesu de recuperación llingüística ye una ciudadanía plural y non sectaria que camina mui per delantre de la nuesa acomodada clas política”.
Según el CAO “la oficialidá ye l’únicu pegoyu sobre’l que sofitar un futuru de sobrevivencia amañosu pal nuesu padrimoniu llingüísticu. Ye l’únicurangu constitucionalmente posible y ye lo que tienen reconocío cuantayá’l restu de llingües del Estáu. La oficialidá del asturianu nel Estatutu d’Autonomía ye la meta del camín que tamos andando ente toos y la participación ciudadana, como queda espeyao nesta iniciativa, el mediu pa consiguilo”.

Enllaces de cuentos clásicos n'asturianu

Un compañeru y amigu facilitóme fai unes feches un llistau d’enllaces d'accesu a cuentos clásicos n’asturianu con unes ciertes particularidaes que se ponen en tela de xuiciu, y que l'usuariu que s'entrugue de qué se trata pue escuchalos y velos. Sedría interesante que dempués que se ficiese un breve comentariu o un simple nomáu del cuentu que más prestó y que menos.

El llistáu de enllaces de cuentos n’asturianu ye:

http://www.youtube.com/watch?v=AI8p3skcq_A&feature=related


http://www.youtube.com/watch?v=zeuKtZRjlHY&feature=related

http://www.youtube.com/watch?v=f29hVxIhdZk&feature=related


http://www.youtube.com/watch?v=enEkr6mV_aQ&feature=related


http://www.youtube.com/watch?v=XSuSidEq1hk&feature=related


http://www.youtube.com/watch?v=adTx0EFU45U&feature=related

45.000 persones nes Trobades d'Escola Valenciana

Escola Valenciana entama les sos Trobades de 2009 cola asistencia de 45.000 persones.
Escola Valenciana entamó les Trobades Lectores (dientro de les Festes per la Llengua) con una bona asistencia de 45.000 persones, según informó la entidá organizadora. Les tres Trobades que sirvieron pal aniciu de les sesions d’anguaño foron en Llutxent (la Vall d’Albaida), la Pobla de Farnals (l’Horta Nord) y Castelló de la Plana. En total, cellebraránse 21 Trobades. El presidente d’Escola Valenciana, destacó que les Festes per la Llengua entamaren «col récord d’asistentes, padres, madres, alumnos y ciudadanos que entienden que’l valencianu ye’l vehiculu de convivencia de tolos valencianos y valencianes».

Col envís de fomentar la llectura nesta llingua, nes Trobades repartiránse 200.000 vales d’un euru de descuentu p’alquirir llibros en valencianu. Esti ye’l nome que se-y suel dar al catalán nel País Valencianu.

Hugoenea: Casa del Escritor de llingües minoritaries

Donibane foi’l llugar escoyíu pola Asociación d’Escritores en Llingua Vasca-Euskal Idazleen Elkartea (EIE) p’abrir la Casa del Escritor, un espaciu concebíu con forma de vivienda empobinada al abellugu d’autores que desendolquen el so llabor lliterariu n’euskera, gallegu, catalán, asturianu y otros idiomes consideraos como minoritarios. Nella podrán agospiase demientres un tiempu másimu de quince díes, que dedicarán a la ellaboración de noveles, artículos periodísticos, guiones cinematográficos ya eso...

La iniciativa tien el nome d’Hugoenea «y nun ye casualidá», afitaba l’alcaldesa de Pasaia. «La casa que Victor Hugo ocupó equí alcuéntrase a pocos metros». El presidente d’EIE, desplicó que n'otros países, como Austria, esisten cases asemeyaes nes qu’escritores «persiguíos» alcuentren un espaciu pa poder facer el so trabayu.

Les creyaciones que se xesten n’Hugoenea llevarán, nel momentu del so espublizamientu, una mención d’agradecimientu al Ayuntamientu de Pasaia pola aidanza y los artistes deberán de comprometese a ufiertar una charra a escolinos de la llocalidá.

5u Festival de Cine Asturianu n'Uviéu

El 5u Festival de Cine Asturianu entama güei nel Teatru Filarmónica d’Uviéu, cola proyeición de los curtiometraxes finalistes nuna Gala que presentarán María Xesús Rodríguez y Jesús Menéndez.
Tamién, estrenaráse la obra “De rebaxes na sablera” pol Grupu Teatru de Güeñu. Y llueu proyeutáranse los documentales finalistes.

Güei, a les seyes de la tarde, tien llugar la Gala de Pieslle, cola entrega de premios del Festival, presentada por Pepa Martínez y Jesús Piquero y coles actuaciones del Ballet Baidán, Celia González y el gaiteru Pelayu Cuaya.

Na Gala de Pieslle del festival dirixíu por Xaviel Vilareyo fadráse un homenax a Lilián de Celis y van proyeutase los curtiometraxes ganadores. A les diez de la nueche el Grupu Teatru de Güeñu va estrenar la obra “El misteriu del pelu roxu” . Toles sesiones del fesival son de baldre pa los espeutadores

Campaña de normalización "El Mio Primer Vocabulariu" en Llangréu

La Casa’l Conceyu de Llangréu acoyó la presentación de la campaña de normalización social del asturianu "El Mio Primer Vocabulariu, vocabulariu básicu de la Llingua Asturiana n’imáxenes". L’actu presidiólu l’Alcaldesa de Llangréu y cuntó cola presencia de la Conceyala de Política Llingüística, amás del diseñador de la campaña y el responsable del Serviciu de Normalización Llingüística llangreanu.
"El Mio Primer Vocabulariu, vocabulariu básicu n’imáxenes de la Llingua Asturiana" ye una campaña que busca "afalar l'usu del asturianu ente los neños y neñes más mozos del conceyu y concienciar al profesoráu y a les families de la importancia d'usar l'asturianu nos primeros años de vida".
Esta nueva iniciativa del Conceyu de Llangréu va empobinada "a les escueles de 0 a 3 años y a los primeros cursos d’educación infantil, y consiste nun vocabulariu básicu n’imáxenes pa que los más pequeños y pequeñes vayan conociendo y familiarizándose con términos y pallabres venceyaes a la so rodiada más cercana: el so cuerpu, la ciudá, la escuela, el parque, el bañu, los colores y les formes xeométriques, y la so casa".
Esta campaña desendólcase al traviés de siete modelos diferentes de cartelos a tou collor con dibuxos del prestixosu diseñador Alfonso Zapico, estos cartelos presenten un vocabulariu básicu n’imáxenes d’unos 200 términos d’usu frecuente y cercanu a lo más mozo de la casa. Los cartelos compleméntense con fiches en blancu y negru pa pintar que permiten trabayar de forma entretenida esti proyeutu.
La campaña El Mio Primer Vocabulariu, vocabulariu básicu n’imáxenes de la Llingua Asturiana “ponla en marcha l’Ayuntamientu de Llangréu en collaboración cola Rede de Normalización Llingüística nos Conceyos y cuntó cola aidanza económica de la Conseyería de Cultura y Turismu del Principáu d’Asturies”.

300 obres lliteraries pa discapacitaos visuales n'euskera

Según s’afita nel Euskararen Berripapera de febreru, fueya informativa qu’informa sobre la promoción y normalización del euskera, y que s’espubliza mensualmente tanto n’euskera como en castellanu, la Viceconseyería de Política Llingüística del anterior Gobiernu Vascu y la ONCE ficieron el balance del conveniu de collaboración robláu nel 2008. L’oxetivu del conveniu foi ufrir nueves oportunidaes pa vivir n’euskera, y nesti casu, poner a dimposición de les persones con discapacidá visual nuevos llibros y conteníos n’euskera, pa garantizar los sos drechos llingüísticos.

L’añu pasáu, la ONCE adautó 85 obres lliteraries n’euskera al sistema Braille y al formatu Daisy: Festa aldamaneko gelan de Mariasun Landa, Traizioak de Iban Zaldua, ya Ihes betea d’Anjel Lertxundi, ente otres.

Son yá unes 300 les obres n’euskera en Braille y Daisy a dimposición de los vascofalantes con discapacidá visual. Amás, presentóse un nuevu preséu informáticu adautáu pa estes persones: el diccionariu lletrónicu Elhuyar.

Les llingües autonómiques na TV

La televisión ye ensin dubia’l mediu de comunicación de mases más potente, y poro, preséu fundamental pa la normalización social d’un idioma amenorgáu. Equí ufrimos una rellación de canales autonómicos y l’emplegu que faen de la so llingua propia. Nellos, en xeneral, nes comunidaes billingües nes que s’inxerten, hai un enfotu nel respetu a la llibertá d’espresión, al pluralismu políticu, cultural y llingüísticu asina como una bona promoción de la llingua y la cultura autóctones
Tolos casos correspuenden a autonomíes onde la llingua propia ye cooficial col castellanu, sacante Asturies onde entá nun tien esi estatus llegal.

Galicia
- TVG emite namái en gallegu.

Euskadi

- Hai un canal n’euskera dafechu ETB1 y otru en castellanu dafechu ETB2.

Cataluña
- La programación ye dafechu en catalán en TV3, que produz ente 20 y 24 telefilmes al añu como estratexa, y nel Canal 33.

Islles Baleares
- IB3 y TV Mallorca emiten cuasi too en catalán.

Valencia
- Canal 9 emite un 50% en catalán. Punt 2 ye dafechu en catalán.

Asturies
- TPA y dalgún canal llocal emiten dellos programes puntuales n’asturianu.

Panorama del gaélicu escocés

El gaélicu escocés ye l’idioma celta d’Escocia. Güei fálenlu namái unes 60.000 persones de mou billingüe, y unes 90.000 tienen dalguna conocencia de la llingua, la mayoría nes islles y na costa del oeste del país, pero nel pasáu falóse en toa Escocia.
Sacante les polítiques billingües alministratives y educatives nes Islles Hébrides y ciertu puxu na escolarización nes Tierres Altes, Strathclyde y otres rexones, ta na categoría de en pelligru nel Atles de les llingües de la UNESCO.
Anque menos del 1% de la población escocesa total de 5,1 millones falen esti idioma, pa los que lu falen, hai dellos periódicos y programes de radio disponibles. L’añu 2005 aprebóse nel Parllamentu d’Escocia la llei que fai del gaélicu escocés una de les llingües oficiales d’Escocia, xunto col inglés.
Dende’l 2008 entamó BBC Alba que tresmite gran parte de los sos conteníos en gaélicu. La BBC tamién opera la Raidió nan Ghàidheal. Y tien presencia na prensa de la fastera, asina como na lliteratura y na música escocesa.
El muérganu pa la so promoción y desendolcu ye Bòrd na Gàidhlig. Los sos finxos cimeros son:
-Xorrecimientu del númberu de falantes del gaélicu escocés
-Da-y puxu al gaélicu como llingua na comunidá y nel llar
-Promover el gaélicu na vida cultural d’Escocia.
-Desendolcar l’usu del gaélicu en tolos aspeutos de la vida escocesa

Atopen los llibros d'actes de la Xunta Suprema d'Asturies de 1808

L’Asociación pa la Recreyación Hestóricu-Cultural d’Asturies (ARHCA) ta acabante anunciar que dos de los sos miembros, José Luis Calvo, collaborador y Antonio Luis Pérez, presidente, descubrieron los llibros d’actes de la Xunta Suprema d’Asturies, lo que supón un “hestóricu y perimportante impulsu col descubrimientu d’una documentación, en paraderu desconocíu dende va cuasi doscientos años”.
Bones noticies pa la Hestoria d'Asturies al ser alcontraos documentos que , “contienen información de primer mano alrodiu de la parte de la llucha escontra l’invasor francés que se llibró n’Asturies”.
Los documentos desapaecieren en mayu de 1809 y diéronse por perdíos ente 1814 y 1815, cuando se recompunxo l’archivu de la Xunta Xeneral d’Asturies. Estos "llibros o cuadernos d’actes" daben testimoniu de tolo alcordao pola Xunta, primera en declarar la guerra a Napoleón en mayu de 1808, de les sos delliberaciones y los oficios y noticies que recibía.
Dende esti mes los documentos tán dixitalizaos y al algame de cualesquier investigador, incluyendo los "llibros d’alcuerdos" de la Xunta dende setiembre de 1808 fasta payares de 1809.

Política Llingüística. Desendolcu llegal de la oficialidá del aranés.

L'occitanu tendrá una llei de política llingüística pa normalizar l'idioma.

L'artículu 6.5 del nuevu Estatut de Catalunya diz que “la llingua occitana, nomada aranés n'Aran, ye la llingua propia d'esti territoriu y ye oficial en Catalunya”. Al respective d'esta norma, el Govern desendolcó n'agostu de 2007'l programa pa llantar la Oficina Occitan en Catalonha, una entidá dirixida por Jusèp Louís Sans que se cuidará de diseñar l'espardimientu la oficialidá del occitanu en tol país y que, ente otros aspeutos, asoleyará una Llei de l’Occità a mou de preséu de llei de política llingüística col envís de sofitar la normalización del idioma. Dase'l casu de que Catalunya ye l'únicu territoriu que tien l'occitanu como llingua oficial. Pesie que l'occitanu tien un territoriu de más de 190.000 kilómetros cuadraos y más de 16 millones d'habitantes, l'idioma nun tien la reconocencia de la so oficialidá na mayor parte del dominiu llingüísticu pesie a tratase de la llingua los trovadores y que tien na so hestoria a un Nobel de Lliteratura como Frederic Mistral.
La Oficina Occitan en Catalunya tendrá dos sedes: una n'Era Val d’Aran –que sedrá la central– y otra en Barcelona. Anguaño, el programa pa la creación de la oficina trabaya en seyes estayes. La primera básase nel aspeutu de calter xurídicu, especialmente, na ellaboración de la Llei de l’Occità. Jusèp Louís Sans desplica qu'esta llei de política llingüística, qu'habrá de definir el procesu de normalización del occitanu y marcar la so aplicación, podría aprobase depués de la Llei del Règim Especial de la Val d’Aran. Sans diz qu'esta llei, ente otres cuestiones, afitará aspeutos como'l drechu de los ciudadanos a ser atendios n'occitanu y pon como exemplu'l casu que-yos pasó a tres estudiantes de la Pompeu Fabra que pidieron esaminase nésta llingua. Dende la universidá-yos retrucaron que teníen drechu a faelo pero que nun contaben con una infracadarma afayadiza pa “satisfacer esti drechu”. El segundu ámbetu nel que trabaya la futura oficina ye l'estrictamente llingüísticu. Sans desplica que ye importante saber cuál ye'l referente del occitanu que se tendrá en cuenta al aplicar la oficialidá. El responsable de la oficina destaca que l'occitanu ye una llingua con muncha frayaura dialectal y asegura que, ensin querer actuar como autoridá normativa, ye necesariu determinar que la llingua que se diz oficial básase nuna mena de “llinguadocian ampliu” al que llamaran“occitanu xeneral”. Sans afita que nun se-y llamará nin “occitanu referencial nin estándar”, pero afita que ye importante adautase al estándar el día que lu haiga. Paralelamente la oficina tamién deberá definir como encaxa l'aranés col “occitanu xeneral”.
Na estaya alministrativa, la oficina empobina agora les sos fuercies a esparder la oficialidá del occitanu ente tolos departamentos del Govern de la Generalitat. “Trátase de comunicar y suxerir actuaciones pa que la población entame a visualizar la oficialidá d'esta llingua”, diz Sans. Les publicaciones, la presencia del idioma nes webs y l'atención ciudadana son dalgunes de les estayes u incide la oficina.Anguaño tamién se tien en cuenta un cuartu ámbetu, l'empobináu a les entidaes y al aspeutu más social de la llingua. Per un llau, la futura oficina Occitan en Catalonha desendolca cursos d'aranés en Barcelona al traviés del CAOC, una de les entidaes que espoxiga l'hermanamientu ente la cultura catalana ya occitana. Trabayar pa que los medios de comunicación usen esti idioma y potenciar les producciones lliterariaes n'occitanu son otros de los obxetivos del algame de la oficialidá d'esta llingua, amás de les traducciones. Nel ámbetu políticu, la oficina propon la creación d'un consorciu ente la Secretaria de Política Llingüística, el Conselh y la Generalitat pa potenciar la oficialidá. Ye qu'el Conselh d’Aran ye'l gobiernu “llexitimáu” pa exercer el fomentu de la llingua y el so enseñu n'Aran. Arriendes d'ello, trabayarase tamién pa potenciar les relaciones con otres fasteres del dominiu llingüísticu d'Occitania y con países con situaciones asemeyaes.
Fonte: diari la mañana

Maxisteriu apreba la especialidá de Llingua Asturiana

La Escuela de Maxisteriu de la Universidá d'Uviéu cuntará cola especialidá de Llingua Asturiana nos planes resultantes de la prósima reforma de les sos enseñances. La Xunta d'Escuela aprebó ayeri por mayoría absoluta de 58 votos a favor, 26 a la escontra y 13 astenciones, creyar la mención d'asturianu.
La propuesta, votóse en solitariu, al marxe del restu de menciones plantegaes, nuna sesión monográfica convocada a tal efeutu. Cuatro profesores y el direutor de Departamentu de Filoloxía realizaron intervenciones a favor de l'aprobación de la mención. Nadie a la escontra. Amás, una representante estudiantil na Xunta d'Escuela presentó una recoyida de 340 firmes de profesores y estudiantes de Maxisteriu favoratible a la creyación de la mención.
Cola aprobación de la mención de Llingua Asturiana, Maxisteriu ye'l segundu centru educativu de la Universidá d'Uviéu qu'acepta creyar una especialidá d'asturianu. Enantes, dio'l pasu la Facultá de Filoloxía, onde la Xunta tamién dio'l so vistu bonu a la creyación d'un minor de Llingua Asturiana. Con esti determín los estudios d’asturianu qu’esisten anguaño na Universidá d’Uviéu queden inxeríos nel Sistema Européu d’Enseñu Universitariu.
A les puertes de la escuela, mediu centenar de persones, ente los qu'había representantes de tolos sindicatos d'enseñanza, y de dellos partíos políticos, concentráronse convocaos pola Xunta pola Defensa de la Llingua Asturiana, en defensa de la mención.
Tamién, profesores del Seminariu de Filoloxía Asturiana de la Facultá de Filoloxía unviaron una carta a Maxisteriu, defendiendo la creyación de la mención. Amás, tanto'l reutor de la Universidá d'Uviéu, como'l conseyeru d'Educación, comunicaron al centru'l so interés en que se creyare la especialidá de Llingua Asturiana