Nueu intentu de galleguización de los asturfalantes del ocidente

L’usu de la denomación “gallego-asturiano” pa referise a la fala aumenta la confusión a la hora de frenar les continues inxerencias de l’Academia Galega

Víctor Freixanes, nuevu presidente de la Real Academia Galega

Llucía F. Marqués

“L’asturianu tien de ser oficial n’Asturies y el gallego tamién nel Ocidente d’Asturies» Esti ye’l caberu ataque procedente del recién escoyíu presidente de la Real Academia Galega, l’escritor Xosé Luís Méndez Ferrín.

Dende hai décades la vecina Galicia vien prauticado una política d’invasión llingüística continua, facilitada pola falta de reación por parte de les autoridaes na materia asturianes, quienes non solo nun actúen con decisión sinón que yos lo ponen más fácil al camudar el tradicional nome de “la fala”, col que se conoz a la variante más ocidental del asturianu, pol más confusu y menos correchu de “gallegu asturianu”.

Afortunadamente nesta ocasión la reclamación d’oficialidá pal gallegu na fastera eonaviega fizo reacionar a representantes políticos, escritores y filólogos asturianos, que remembraron al académicu que la so petición nun tien  dala llegitimidá.

Ana Cano, espresidenta de l’Academia de la Llingua Asturiana salió al pasu de les declaraciones de Ferrín remembrando-y que les competencies en política llingüística son del Gobiernu asturianu: «L’Academia enxamás renunciará a la asturianidá de tolos conceyos d’Asturies y ta en contra de que se intente galleguizar l’Ocidente». Pa la presidenta de l’Academia, «la única mena de frenar estes inxerencies ye la oficialidá d’ambes llingües»

N’Andecha Astur son contundentes: “Dende’l mesmu istante en que francieron la xunidá llingüística asturiana, discriminando a los falantes de la fala l’ocidente col inventu’l gallegu asturianu abrieron de par en par les puertes a la galleguización. Acúsenmos de querer asturianizar Asturies, pero esti nun ye sinón l’enésimu ataque.” declaró Lola Suárez, responsable de la estaya de llingua.

Dende Izquierda Unida prefieren atacar a Ferrín en so tarrén, afalándolu a «iguar los problemes del gallegu dientro les sos llendes oficiales», y añaden que «de continuar la política de Lola Suárez tendrá problemes más graves de los que ocupase que del Ocidente d’Asturies».

Finalmente, Consuelo Vega, de la Oficina de política Lligüística precisa que «ye una manifestación cultural y lingüística asturiana nel sen históricu y social del términu», n’alusión a la crítica de Ferrín que denunció la intención de «asturianizar el gallegu d’Asturies».                                                                                  Fonte: infoasturies.com

Reaiciones a la campaña “Vuelve al Paraíso, ven a Asturies”

Andecha Astur critica la hipocresía del “Principado” y Ecoloxistes d’ AsturiesVerde.Net llancen un videu nel qu’asonsañen la campaña de turismu

Denuncien la utilización fraudulenta de la nuesa bayura natural al tiempu que permiten el so desaniciu. “Ye un contrasentíu aprofitar la guapura del nuesu país con fines económicos ya al tiempu consentir toa triba d’abusos a la mesma” diz Arturu Xosé Bermeyu, Secretariu Xeneral d’Andecha Astur, quien tamién recalca la nula presencia del asturianu na presentación de la campaña, na que, per otru llau, abonden los términos ingleses.

Asturies ye un paradisu, si, pero tan estrozándolu. Llargues xornaes llaborales p’algamar infrasueldos, atascos sofitaos na falta d’un eficiente tresporte públicu, contaminación, comida basoria, tele basoria… non too ye tan guapo comu te lo pinten. Esi ye’l mensaxe principal del videu que, asonsañando a la campaña oficial de turismu, circula peles redes.

Nelli dan un repasu a dellos de los problemes ecolóxicos que carecemos anguañu nel país, vertíos, animales colgaos peles carreteres, desproteición de la mesma ñatura que quieren vender y munchos más problemes que namás unos pocos s’atreven a denunciar… “¿Que nos ta pasando?” entruga’l narraor.

Tamién remarca la pasividá de la población énte l’espoliu del nuesu padrimoniu natural “Quiciás que nun desiximos una vida sana y natural…Nun queremos una Asturies de folletu publicitariu, de Greenmarketing, sinón una Asturies real”.

Nun queremos convertinos nel Paradisu perdíu, o meyor dicho, arrampluñáu.

Fonte: Infoasturies

Andecha Astur reivindica la figura d'Andrés Solar

La formación nacionalista celebró un actu d'homenaxe nel cementeriu xixonés de Deva.

L'eventu, que principió a les 13 hores d'ayeri con una ufrienda floral xunto a la placa instalada por Andecha Astur n'alcordanza d'Andrés Solar nel 2004, xunció lo emotivo colo político, remembrando "el compromisu d'esti nacionaliegu pa con Asturies". Asina mesmo, "reflexonóse cómo'l tiempu va dando la razón a los plantegamientos qu'Andrés Solar defendió dende l'Ensame Nacionalista Astur; cómo la represión llingüística sigue siendo la norma, y la oficialidá tan llonxana como entós; y cómo se tenía razón cuando'l nacionalismu asturianu denunciaba que'l procesu de 'reindustrialización' nun yera otro que l'esfarrapamietu del texíu socio-económicu asturianu y l'anuncia del paru, la emigración forciada y la precariedá llaboral y social", apunten dende la organización.

Nel actu tamién se destacó "la continuidá del so pensamientu y cómo los plantegamientos nacionaliegos non sólo nun s'esaniciaron, sinón que siguen siendo l'únicu referente posible pa francer la situación que carecemos". Lali Solar, hermana del escritor fináu hai agora 32 años, compartió colos presentes dellos aspeutos destacaos de la personalidá d'Andrés, asina como la humildá que siempre lu carauterizó y la so permanente disposición a echar un gabitu a quien lo precisara, no que foi la parte más emotiva del homenaxe.

Na semeya, Lali Solar nel momentu de la so intervención.

Fonte: Asturies.com

Andecha Astur llama a la manifestación de la Oficialidá

Andecha Astur llama a participar nel manifestamientu pola Oficialidá de la Llingua Asturiana que se cellebra esti vienres 6 de mayu, “comencíos de la necesidá de xuncir fuercies alroidu del oxetivu común d’algamar un drechu democráticu tan básicu, ya internacionalmente reconocíu, comu’l de poder emplegar con tolos drechos la nuesa llingua nacional en tol territoriu asturianu y en toles circustancies”.

Nun comunicáu de prensa asoleyáu esti día, Andecha diz llamentar que “un añu más tenemos de costatar de nueu la inesistencia d’avances sinificativos na reconocencia d’esti drechu democráticu y la sistematización de la  situación de represión y amenorgamientu llingüísticu que carecemos n’Asturies, col agravante de que, dende les fuercies polítiques teóricamente favoratibles a la normalización llingüística, tan faciéndose ca vuelta más frecuentes postures testimoniales, ensin más repercusión que la púramente mediática, ensin qu’ellí onde tienen responsabilidaes lleven alantre denguna midía que reconoza drechos reales. Polítiques de xestos ensin fechos, que los confirmen comu cómplices de la situación que carecemos”.

Ello asina Andecha Astur fai un llamamientu al conxuntu de la sociedá asturiana pa que participe activamente nel manifestamientu entamáu pal prósimu Díi de les Lletres Asturianes(vienres 6 de mayu) a les 19:30 hores, con salida de la Estación de la RENFE d’Uviéu. Y nel mesmu sen, Andecha Astur unvió un comunicáu de felicitación a l’Academia de la Llingua Asturiana nel que quier asoleyar “so importante llabor nel estudiu, dignificación y defensa de la nuesa llingua patria, en tol territoriu nacional, y na defensa de los drechos llingüísticos de los asturianos”.

Andecha Astur perafítase nel so compromisu pa cola llingua asturiana, cola unidá llingüística de la mesma en tol territoriu asturianu y na necesidá d’algamar la OFICIALIDÁ comu drechu democráticu “y pasu imprescindible cara a la normalización democrática d’Asturies y al necesariu procesu de recuperación llingüística nel nuesu país.”

Fonte: Asturnews

Andecha Astur denuncia qu’Avilés nun cumple la llei de toponimia

Andecha Astur denuncia la colocación per segunda vegada de cartelos indicaores que nun respeten la toponimia oficial pesia lo dimpuesto llegalmente nel Decretu 145/2010, 24 de payares, pol que se determinen los topónimos oficiales del Conceyu d’Avilés.Andecha denunciaba esti día nun comunicáu que l’Ayuntamientu d’Avilés sigue emplegando nes siñalizaciones topónimos españolizaos qu’agora mesmo tan fuera de la llegalidá, comu ye’l casu de “Llaranes Viejo”, “Camino de San Lorenzo” y “Las Niñadas”.

Pa enriba dase la circustancia de que los indicaores en custión yá tovieren que ser camudaos nuna ocasión por poner “Llanares Viejo” y “Agera”, pero los nuevos continúen tando incorrechos, non yá por un erru de la empresa contratada pol Ayuntamientu, sinon porque ésti facilitó-yos los nomes de los pueblos castellanizaos ensin respetar la toponimia asturiana, qu’agora mesmo ye la llegal.

Dende Andecha Astur consideren qu’estos fechos son significativos de lo que ye’l despreciu del gobiernu municipal no qu’a cultura asturiana se refier, y del desenfotu del restu de los conceyales que nun respuenden énte estes faltes de respetu a la cultura y la identidá asturiana.

Fonte: Asturnews

Andecha califica de “burlla a la sociedá asturiana” la campaña entamada por Educación y Cultura

  Cree que’l Gobiernu “busca enmazcarar con xestos les sos polítiques represives en materia llingüístico”. Insiste na oficialidá como únicu camín pa “normalizar democráticamente la situación de la llingua asturiana” y empondera l'actitú de los clubes.

  Nun comunicáu critica “que’l ‘Principado’, los mesmos que reprimen la llingua asturiana y mos ñeguen la oficialidá, faiga campañes aparentemente na so defensa”, dalgo que los nacionalistes consideren “inaceutable dafechu” y venceyen a una “política de xestos ensin conteníos que complementa la política llingüística d’amiguismu y redes clientelo-familiares a la que mos tienen avezaos”. Esti tipu de campaña, na so opinión, lo que busca “ye tracamundiar el problema principal, la falta d’oficialidá y, per ende, la non reconocencia d’un derechu humanu tan ellemental como ye falar llibremente la propia llingua nel propiu país”.

  Andecha Astur califica la campaña ‘Col asturianu, xugamos toos nel mesmu equipu’ de “una auténtica burlla a la sociedá asturiana, entamando porque l’emplegu que fai la mesma conseyería de Cultura de la llingua asturiana nun pasa d’aneudóticu, pero sobre manera porque son los mesmos que reprimen la llingua asturiana los que pretenden presentase comu los sos defensores y obviar la custión principal dende la qu’entamar a normalizar democráticamente la situación de la llingua asturiana: la oficialidá”. Por último, empondera la collaboración de los clubes asturianos na campaña.

Importante difusión pela rede           La campaña entamada pola conseyería comenzó a visibilizase’l sábadu 5 col usu de la llingua asturiana en redes sociales por parte del Sporting y Uviéu, los dos clubes de mayor siguimientu del país, asina como la incorporación del cartelu de la mesma nes sos páxines web. La megafonía d’El Molinón utilizó tamién el nuesu idioma enantes de la presentación de les alineaciones del partíu ente’l conxuntu xixonés y Las Palmas –tamién fixo referencia a la campaña nel descansu– y la plantiya del Uviéu posó enantes d’un entrenu cola pancarta de la iniciativa.

  Sporting y Uviéu nun foron los únicos clubes que se sumaron a ‘Col asturianu, xugamos toos nel mesmu equipu’. A entidaes que vienen puxando nel usu del idioma nos años últimos, como’l Llangréu y el Ciares, sumáronse delles como’l Lealtad, Gijón Industrial o l’Oviedo Moderno femenín, asina como d’otros deportes.                                        Fonte: asturies.com

Andecha Astur prioriza la oficialidá pa poder cuntar con unos presupuestos afayadizos

por Pablo R. Guardado

Los nacionalistes comparten la denuncia de discriminación pal asturianu fecha pola ALLA, pero ven básico la oficialidá. Mentes, Podemos demandó a Alonso más recursos pal nuesu idioma nos presupuestos na Comisión sobre les cuentes d’Educación y Cultura.

“Pa poder cuntar con una partida presupuestaria afayadiza nos presupuestos asturianos y acceder tamién a les sovenciones millonaries de los presupuestos del Estáu y de la XE pa les llingues oficiales, nun hai que perder de vista lo fundamental: que la llingua asturiana seya oficial”, entiende Andecha Astur, que cree que “mientres siga dándose l’actual situación de falta de reconocencia llegal, la discriminación presupuestaria ye inevitable. Lo único esperable son les migayes que los partíos de la Xunta Xeneral tengan a bien conceder”.

La organización nacionalista sofita la postura presentada esta selmana pola Academia de la Llingua Asturiana (ALLA), pero apunta que “por munchu presupuestu que destine’l ‘Principado’ al asturianu, seya pa la so rede clientelo-familiar de la Oficina de Política Llingüística, seya pa la mesma ALLA, la represión siguirá siendo un fechu”. Por ello afirma “que mentes nun se garantice’l drechu de los asturianos y asturianes a utilizar la so propia llingua dientru’l so país con toles consecuencies, tarémos falando de concesiones arbitraries, non de drechos”.

Ello lleva a Andecha a esixir “la oficialidá del asturianu como pasu obligáu pa la normalización democrática en materia llingüística y primer pasu pa la so recuperanza”, al empar que denuncia “les actitúes de posturéu de los que dicen tar a favor d’esi drechu pero nun lu reconocen allí onde tienen poder políticu”.

Otra manera, el sábadu pasáu Andecha Astur celebró’l so Conceyu Nacional, que coincidía col 25 aniversariu de la formación, nel que participaron representantes d’Alternativa Nacionalista Canaria, CUP, Chunta Aragonesista y BNG, amás del diputáu d’Amaiur Jon Iñarritu. Nél la militancia afitó les bases de la organización: “soberanía, socialismu, oficialidá, igualdá y futuru”.

Más recursos

Genaro Alonso, conseyeru d’Educación y Cultura, compareció ayeri énte la Comisión de Facienda de la Xunta Xeneral pa presentar les cuentes del so departamentu. Lucía Montejo, de Podemos, aprovechó la so comparecencia pa demandar más recursos pal asturianu nel presupuestu. Tamién pa criticar l’ausencia de programes de formación en llingua asturiana, dalgo que reconoció’l propiu Alonso. Al respeuto, Montejo emponderó l’actitú conciliadora del conseyeru.

Concha Masa, d’IX, solicitó pela so parte más apoyu al asturianu. Otra manera, na so intervención, Alonso defendió la necesidá d’aprobar el presupuestu pa poder convocar asina les oposiciones previstes pal mes de xunu, con 400 plazes en xuegu.

Fonte: Asturies.com

Andecha Astur lleva la discriminación llingüística al Parllamentu Européu

Una delegación d’Andecha Astur participa nes “Xornaes de trabayu estratéxicu n’Europa – Los Pueblos Deciden”, y aconceya con representantes de la Comisión y el Parllamentu européu.

La delegación va tratar de los temes qu’agora mesmo tán activándose nel Parllamentu Européu al traviés del eurodiputáu de Los Pueblos Deciden, Josu Juaristi. Concretamente na xornada del miércoles, Llucía Fernández taba esponiendo la situación de discriminación que vive la llingua asturiana, exemplarizándola col reciente casu de discriminación elleutoral de les pasaes elleiciones nacionales y de conceyu nes que se retiraren les papeletes d’Andecha Astur por tar n’asturianu. Fonte: Asturnews

Andecha Astur sofita a les radios llibres asturianes y fai un llamamientu a la sociedá asturiana a que faiga otru tantu

"Dende la defensa d'un Espaciu Comunicacional Asturianu llibre y autoxestionáu, de les que les radios llibres y comunitaries son ellementu prioritariu; y dende la defensa de la mesma llibertá d'espresión", Andecha Astur vien de roblar el sopelexu na so defensa, espresando'l nuesu sofitu y solidaridá coles radios llibres y comunitaries asturianes, desixendo darréu la paralización d'espedientes sancionaores y tamién de cualesquier otra midía de presión respeutu a ella. El mencionáu sopelexu (que nun cunta con versión asturiana) inclúi asina mesmo la reconocencia del llabor desendolcáu por estes emisores y la planificación de frecuencies que dea rempuesta a la demanda de Servicios de Comunicación Audiovisual Comunitarios n'Asturies en cumplimientu de lo dimpuesto nel artículu 32.2 de la Llei 7/2010. Fonte: Asturnews

Andecha Astur critica la investidura

Nun comunicáu asoleyáu esti día, Andecha Astur critica la "vieya estratexa d’IU-IX de camudar votos y compromisos por puestinos, renunciando a custiones fundamentales comu la superación del Estatutu y la Oficialidá, traimos otros cuatro años más de réxime PSOE nel Principado”. La elleición de Javier Fernández de nueu comu presidente del “Principado”, "gracies al avezáu sofitu d’IU-IX que torna a traicionar les sos promeses elleutorales en función de los propios intereses, supón la renuncia definitiva a la superación d’un Estatutu y una istitución autonómica, el “Principado”, impuestos dende Madrid, y a la Oficialidá de la llingua asturiana, nuna incesante repetición de lo que vien siendo la dinámica del PSOE-IU n’Asturies nos trenta años caberos". P'Andecha, "los que fueron cómplices más que socios de gobiernos corruptos comu los d’Areces, qu’esfarraparon el texíu económicu y productivu asturianu, que reprimieron sistemática y obsesivamente la llingua asturiana, que prevocaron l’ésodu de decenes de miles d’asturianos, tornen a repetir la mesma traición alliándose colos enemigos d’Asturies, porque a la fin, nun dexen de ser lo mesmo". Asina les coses, nel gobiernu del “Principado” nun hai dengún cambéu pala organización nacionalista: "Un xiru de 360º pa tornar al mesmu sitiu. Otros cuatro años más d’Estatutu impuestu, ensin Oficialidá, condergaos a la cola de la recuperanza económica y cola corrupción comu seña d’identidá de los gobiernos PSOE-IU". Fonte: Asturnews

Andecha Astur desixe al Principáu qu'intervenga y garantice'l respetu pol himnu d'Asturies na campaña la Llotería

L'Asturies Patria Querida quier ser emplegáu nuna campaña pola Llotería Nacional Andecha Astur desixe urxentemente al Principáu la comprobación de la noticia, recoyía en LNE de güei, na que s’afirma qu’el nuesu himnu d'Asturies va ser parte de la sintonía que Lloteríes y Apuestes del Estáu utiliza esti añu pa promocionar la vienta pel branu de la Llotería de Navidá. Andecha quier que nel casu de confirmala, actúe de forma imediata, firme y contundente, paralizando asemeyada falta de respetu escontra l’himnu que representa a Asturies y a los asturianos, y desixendo les debíes responsabilidaes, polítiques y llegales al responsable d’asemeyada ofiensa. Andecha Astur, que enxamás nun consideró’l “Asturies Patria Quería” un himnu lo suficientemente dignu pa representar a la nuesa nación, y que considera al “Principado” una istitución desllixitimada dafechu, "tantu por ser impuesta dende Madrid, como poles sos actuaciones comu sucursal española, entiende que ye obligación de quien agora mesmo representa a Asturies actuar pa defender l’himnu qu’anguañu mos representa, y a torgar qu’una vegada más acabe siendo pocu menos que l’himnu los borrachos". Per otru llau, Andecha Astur "costata una vegada más la falta de respetu que merez Asturies nel contestu estatal, tando ciertos de que sedríe imposible imaxinar asemeyáu usu publicitariu non yá del himnu d’España, sinón mesmamente del de Cataluña, País Vascu, Andalucía, Galicia…. ". Les desixencies d'Andecha xurden énte la información apaecía nos medios de comunicación afirmando que l'Asturies Patria Querida va ser utilizáu na publicidá de la Lloteria de Navidá. Fonte: Asturnews

La XE contesta-y a Andecha Astur que la sidre nun tien dengún preséu de mercáu específicu

L'ablucante rempuesta dexa en evidencia la política del Principáu d'Asturies nesta materia

 La rempuesta de la Xunión Europea a entrugues rializaes por Andecha Ástur al traviés de Josu Juaristi, el nuesu eurodiputáu de Los Pueblos Deciden, cola fin de determinar por qué la sidra nun cunta na XE coles mesmes midíes de promoción, sofitu y sovención coles que cunta'l vinu resultó especialmente sorpresiva: “ A la escontra del vinu, nun esiste dengún preséu de mercáu específicu pa la sidre na organización común de mercáu”. Según Andecha "esta rempuesta pon n'evidencia al “Principado”, dende cuya Conseyería d’Agroganadería vienen anunciándose dende va años distintes actuaciones na XE en defensa de la sidra asturiano, llegando inclusive a afirmase que se taba trabayando n’aniciar un lobby de la sidre a nivel européu".

Tamién dexa n'evidencia al conxuntu de los eurodiputaos “asturianos” cuyu interés pola nuesa bébora nacional queda n'entredichu dafechu.

 Sigún datos facilitaos na mesma rempuesta de la XE, "Asturies ye'l segundu productor européu, namás per baxo del Reinu Xuníu, lo que supón que daes les nueses dimensiones xeográfiques, demográfiques y económiques, la sidre como seutor produtivu tien una repercusión proporcionalmente munchísimo más alta qu'el de cualisquier otru país d'Europa, lo que debiera de vese reflexao na debida atención istitucional, en llugar de la desidia amosada pol Principado”.

 Llamentablemente la falta de sofitu a la sidre na XE non solo torga aportar a les aídes de les que gocia'l vinu, s"inón qu’al nun haber una normativa común sobro lo que ye la sidre, n’Asturies vémosmos obligaos a cumplir cola llexislación española, absolutamente restrictiva y desconoceora de lo que ye sidre, mentes que n'otros países europeos gocien de llexislaciones muncho más permisives y que compiten por nuesos mesmos mercaos. Por poner un exemplu recoyíu na mesma rempuesta de la XE, respeutu al conteníu de zusmiu de mazana hai Estaos qu'almiten como sidre bébores con un conteníu dende un 15% de zusmiu de mazana, comu ye'l casu de Reinu Xuníu, el principal productor, y que llóxicamente nun tien dengún interés en que s'harmonice la llexislación comunitaria, dao que esta indefinición beneficialos dafechu".

 Pero la rempuesta de la XE tamién apurre bones noticies de les que según pudiemos cosstatar, el seutor sidreru nun yera conocedor, y ye que la sidre ta incluyía nel anexu I del TFUE, y polo tanto va tener cabida na política d'información y promoción de los productos agrícoles que va ser aplicable de magar del 1 d'avientu de 2015, y que tien comu oxeto aidar a los profesionales del seutor a atopar nueos mercaos, consolidar los esistentes y promover la calidá de los productos agrícoles de la XE ente los consumidores n'Europa y en tol mundiu. Anguañu ta trabayándose nes normes de desendolcu d'esta nueva política y espérase teneles peracabaes na seronda d'esti añu.

 Por último Andecha Ástur facilitó toa esta información a los llagareros asturianos, amosándo-yos el so interés en caltener les oportunes entrevistes colos mesmos en visu a esclariar más si ye precisu esta rempuesta de la XE y ponelos al tantu de les prósimes iniciatives nes que yá tamos trabayando. Fonte: Asturnews

Más información: Información detallao sobro'l nuevu actu de base (Reglamentu (UE) nº 1144/2014)

Andecha Astur pide la intervención de l'Academia de la Llingua Asturiana na polémica alrodiu de la denominación “Faba”

  L'intentu de privatizar el términu asturianu “faba” pa usu esclusivu d'una marca vieno xenerando estos díes una fonda polémica y supón" la espresión de la situación kafkiana de la falta d'oficialidá de la nuesa llingua nacional y l'absolutu despreciu del “Principado” escontra tolo asturiano" según asoleyaba esti dói nuna nota de prensa Andecha Astur. La organización política vieno acabante dirixise a l'Academia de la Llingua Asturiana pa que, "d'alcuerdu al so mandatu estatutariu, actúe en defensa de la llingua asturiana y de los drechos de los asturianofalantes, considerando que l'intentu per parte de la Conseyería de Sanidá y Consumu de privatizar l'usu del términu asturianu “faba” pa que namás puea ser utilizáu pa los productos d'esta marca de calidá costitúi una agresión a la llingua asturiana".

  Andecha Astur diz qu'al asturianu amenorgase-y "arbitrariamente'l campu semántico del términu, comu a la del conxuntu de los asturianu falantes que namás podríen utilizar esi términu refiriéndose a la faba controlada pola DO. Términu que per otru llau ye d'usu xeneralizáu en tol país y que costitúi una referencia identitaria d’Asturies y del Pueblu Asturianu".

  Dende Andecha Astur quieren esclariar que "de mena dala tase escontra les Denominaciones d'Orixe, de les qu'habría namás que dicir que lleguen con 20 años de retrasu, cuandu pasó'l so momentu álxidu y cuandu yá se tán replantegando en toa Europa, sinón que lo que se denuncia ye'l fechu de privatizar un términu asturianu pa usu esclusivu d'una marca, contra toa llóxica y sentíu común."

  Per otra parte, Andecha Astur atalanta qu'asemeyada situación solo puede dase pola situación predemocrática que se vive n’Asturies, onde la nuesa llingua non solo nun ye oficial, "sinón que sigue siendo oxetu de represión sistemática per parte de les istituciones, especialmente dende'l “Principado”, que con esta nueva agresión llingüística pon n’evidencia tantu’l so despreciu a tolo asturianu comu la so falta de xacíu!.                                                                    Fonte: Asturnews

Andecha llama a participar na Fiesta de la Oficialidá

   "Frente a los que quien faer del usu del asturianu una ferramienta publicitaria ensin conteníos riales, los 19 años d'Oficialidá en Bimenes son un exempllu a siguir". Con esti llamáu, Andecha Astur quería poner a les clares la importancia de sofitar aconceyamientos persignificativos como la Fiesta de Bimenes nestos momentos tan importantes políticamente pal desenvolvimientu dle procesu de normalización de la llingua de nueso.

   "Si tolos años ye d'especial interés participar nos actos de cellebración de la Oficialidá de la Llingua Asturiana nel conceyu Bimenes, pioneru na reconocencia d'esti drechu democráticu, esti añu faise perimportante p'amosar lo que ye un compromisu rial cola nuesa llingua nacional, espresáu en términos llegales y práuticos, frente a los intentos de facer del usu del asturianu una ferramienta simbólica ensin conteníos práuticos".

   Nuna nota de prensa asoleyada esti día, tamién se diz que "énte la necesidá d'obligar a qu'esti usu simbólicu/publicitariu de la llingua asturiana acabe espeyándose na reconocencia llegal del asturianu, cola OFICIALIDÁ comu primer puntu, Andecha Astur considera que la participación nos actos entamaos pol conceyu yerbatu pa esta fin de selmana (3 al 5 xunetu) son una bona manera d'espresar el sofitu a lo que tien de ser una política llingüística comprometía y coherente y la refuga espresa a la utilización de la nuesa llingua nacional p'actos simbólicos valeros de cualisquier conteníu rial".                                                                                                     Fonte: asturnews

EQUO Asturies solidarízase con Andecha Astur

Imaxe: lne.es

EQUO Asturies quier faer pública la so solidaridá con Andecha Ástur pol atropellu sufiertu na xornada eleutoral del 24 de mayu,cuando se retiraron papeletes llegales d’esi partíu nos colexos eleutorales.

Según la información que nos tresmitieron dende Andecha Ástur na reunión que tuvimos, fueron los interventores del PP y el PSOE quien presionaron a los/les presidentes de mesa pa que retiraren diches papeletes, faciendo un usu abusivu de la so función llegal.

Creemos qu’esiste una total falta de medios por parte de la Xunta Eleutoral. Esta tendría de dar sofitu a les meses pa que les votaciones nun queden en manos de los interventores como vien asocediendo en munchos casos.

Otru abusu más ye’l que se produz poles dificultaes y la carestía pa recurrir ante la xusticia, que pierde la so función al nun haber un pronunciamientu rápidu.

La situación de indefesión d’un partíu como Andecha Ástur amuesa la necesidá de la declaración d’oficialidá del asturianu. Hai que trabayar por una meyora de la democracia y coses como estes nun pueden volver pasar.

Pidimos a los partíos que tán na Xunta xeneral qu’utilicen los votos que-yos emprestó la ciudadanía pa qu’esto nun vuelva asoceder.

Fonte:EQUO Asturies

La Xunta Eleutoral refuga la impugnación d'Andecha Astur

El refugu a la impugnación de les elecciones del 24 M pola retirada de les papeletes de Andecha Astur, que vieno acabante conocese, pon n'evidencia pa esta organización política "la falta de garantíes democrátiques, tantu más cuando los motivos pa refugala son falsos y contradictorios". La Xunta Eleutoral Central (XEC) tornaba esti día'l recursu de Andecha Astur “por nun concretar les meses nes que se produció nin el tiempu que duró esta”, magar que en na so denuncia "figuren 14 meses alcontraes nes que se retiraron les papeletes, el tiempu nel que tuvieron retiraes en dalguna d'elles, y ufiértase la posibilidá de declaraciones xuraes de ciudadanos a los que'l presidente de mesa negó-yos les papeletes pa poder votar a Andecha Astur". Por si fora poco, la sentencia de la XEC nun coincide cola Xunta Eleutoral Provincial (XEPA) nos motivos polos que decide archivar la denuncia: "Nel primeru de los casos la XEC acota que nun se concretó les meses nes que supuestamente se retiraron les papeletes nin el tiempu que duró la retirada, porque'l so motivu refuga la impugnación de les eleiciones a nivel d'Asturies". Sicasí la Xunta Eleutoral Provincial de Asturies (XEPA) reconoz los fechos, ponlos en conocencia del Ministeriu Fiscal y refuga la impugnación en Xixón, por calificar los fechos de “irregularidá procedimental”. Pa la organización nacionalista "con tan vergoñoses artimañes la XEC pon fin a la vía alministrativa pa la reclamación, y anque abre les puertes pa un recursu contenciosu-alministrativu, lo cierto ye qu'ésti se retrasará nel tiempu y por enforma que la razón ampárenos, la sentencia tardaría tantu en producise que sedría totalmente invidable". Fonte: Asturnews

Andecha Astur recurre l’alcuerdu de nun invalidar les elleiciones

La Xunta Elleutoral Provincial d’Asturies considera que nun hai base llegal pa la impugnación, pero sí infración elleutoral.

 Andecha Astur recurrió l’alcuerdu de la Xunta Elleutoral Provincial d’Asturies (XEPA) que considera que nun hai base llegal pa la impugnación de les elleiciones, aunque sí infración elleutoral, refiriéndose únicamente al Conceyu de Xixón, en cuentes d’a toa Asturies, comu figura na impugnación presentada.

Por esa xida, y por otres munches asemeyaes de lo que la mencionada XEPA considera “irregularidades procedimentales”, Andecha Astur presentó’l pertinente recursu al alcuerdu de la mesma, apurriéndo entá más información y desixendo-y a la XEPA la rialización de les oportunes investigaciones a la fin de concretar l’amplitú y duración de los fechos denunciaos, y la valoración de la repercusión de los mesmos de forma direuta ya indireuta.

Fonte: Andecha Astur

La Xunta Eleutoral ve irregularidaes pero non pa invalidar les eleiciones

  La retirada de les papeletes d'Andecha Astur nun ye motivu pa la Xunta Eleutoral pa invalidar les eleiciones pese a ver irregularidaes. La formacion nacionalista recurre esta decisión.

  La Xunta Eleutoral considera que nun hai base llegal pa la impugnación de les eleiciones, aunque sí irregularidaes, refiriéndose únicamente al Conceyu de Xixón y non a toda Asturies, comu Andecha Astur espresa na impugnación presentada. Asina, la organización presentó un recursu apurriéndo entá más información y desixendo-y a la Xunta Eleutoral "la realización de les oportunes investigaciones a la fin de concretar l’amplitú y duración de los fechos denunciaos, y la valoración de la repercusión de los mesmos de forma direuta ya indireuta, enantes de desentendese de la impugnación".

  Andecha Astur entiende que con esta postura, la Xunta Eleutoral busca "tapecer el problema y desentedese d’elli" en cuenta d'investigar los fechos denunciaos y aplicar el regalmentu de la Llei Orgánica del Rexime Eleutoral Xeneral (LLOREG).                                             Fonte: asturies.com

Andecha Astur da'l pasu d'impugnar les eleiciones pol asuntu de les papeletes

La falta de papeletes d'Andecha Astur en decenes de colexos eleutorales lleva a la organización a impugnar les eleiciones. En dalgunos casos nun se repusieron hasta cerca de les 14 hores.

Nun escritu presentáu a la Xunta Eleutoral apúntase l'ausencia de papeletes d'Andecha Astur "polo menos en 100 meses eleutorales llocalizaes preferentemente en Xixón, pero tamién n'Avilés, Grau y Mieres". La formación nacionalista tamién diz tener conocimientu de "otres munches que nun pudimos comprobar", un problema que, recuerda, detectó la propia Xunta Eleutoral, "al menos pola Xunta Eleutoral de Zona de Xixón, que tuvieron recibiendo consultes por parte de los presidentes de mesa mientres tola mañana y qu'obligó a la mesma emitir una circular a tolos presidentes de mesa especificando que les papeletes d'Andecha Astur 'no pueden ser retiradas bajo ningún concepto del Colegio Electoral'". Inclusive la Policía Llocal de Xixón tuvo qu'actuar a pidimientu de dicha Xunta de Zona tres la quexa d'Andecha.

"Ye evidente que too ello supón una violación nidia de los derechos democráticos más básicos, yá que la nuesa candidatura nun pudo tar presente n'igualdá de condiciones que'l restu, lo que supón un incumplimientu nidiu de lo dispuesto na LLOREG, motivu pol qu'Andecha Astur impugnó diches eleiciones", afirmen dende la formación nacionalista. Esta situación diose pola decisión de la Xunta Eleutoral de negase a distribuyir les papeletes en llingua asturiana validaes pol propiu organismu y l'actuación d'apoderaos del PSOE y el PP, qu'aprovecharon la falta d'información que teníen los presidentes de mesa pa retirar tanto les que taben n'asturianu –llevaes por Andecha a los colexos eleutorales– como en castellanu.

Fonte: Asturies.com

La XDLA crítica l'actitú represiva hacia l'asturianu na xornada eleutoral y pide pasos alantre pa iguar estes situaciones

Nuna nota de prensa asoleyada esti día, la Xunta pola Defensa de la Llingua (XDLA) crítica l'actitú represiva hacia l'asturianu na xornada eleutoral y pide a los partíos políticos pasos alantre pa iguar estes situaciones, depués de que la Xunta Eleutoral validara les papeletes n'asturianu d'Andecha Astur -anque namás nel recuentu y ensin poder aparecer nes meses eleutorales-. Esti partíu denunció qu'en plena xornada eleutoral y a lo menos nun cientu de meses taben retirándose les sos papeletes, colo que na XDLA atalante que ye "una intencionalidá represiva hacia'l nuesu idioma, dellos interventores reinterpretaron la resolución de la Xunta Eleutoral y retiraron toles papeletes d'esti partíu políticu". Pa la Xunta esta actitú "muestra la represión y el castigu exercíu sobre los asturfalantes y l'incumplimientu de la llexislación vixente, tanto a nivel asturianu como español y européu". Por eso, la XDLA "pide a tolos partíos políticos que van tar representaos na Xunta Xeneral nueva que dean pasos alantre pa poner fin a estes actitúes propies d'un periodu predemocráticu". Y ye que la existencia de mayoríes nueves "va permitir -si les otres partes nun exercen un bloquéu- avanzar llexislativamente nel reconocimientu de derechos y nel desarrollu real d'una planificación llingüística afayadiza pal casu asturianu. De la mesma manera, hai que recordar qu'en tolos conceyos del país van tar representaos partíos políticos que llevaben nel programa un compromisu esplicitu col idioma de la nuesa tierra. La XDLA espresa la importancia -yá sía executándola dende'l Gobiernu llocal o faciendo propuestes dende la oposición municipal- de desarrollar una política llingüística a nivel de los conceyos. Quier dicise, dende les alministraciones más averaes al ciudadanu". Por mor d'ello, la organización pide "a tolos conceyos asturianos que dean pasos alantre na recuperación de la toponimia tradicional -hailu tovía que nun dio'l primer pasu pa empezar el procesu-, na estabilidá de los servicios de normalización y nos derechos llaborales de los sos emplegaos, y nel desarrollu d'una política llingüística municipal, midíes que munches veces nun suponen nengún costu añadíu. Otra manera, hai que volver a insistir en qu'a nivel autonómicu ye preciso tamién dar pasos alantre p'acabar colos casos claros de represión exercíos contra les persones que quieren utilizar el so idioma na vida cotidina y nel exerciciu de los sos derechos democráticos como ciudadanos". Fonte: Asturnews