Andecha Astur critica la investidura

Nun comunicáu asoleyáu esti día, Andecha Astur critica la "vieya estratexa d’IU-IX de camudar votos y compromisos por puestinos, renunciando a custiones fundamentales comu la superación del Estatutu y la Oficialidá, traimos otros cuatro años más de réxime PSOE nel Principado”. La elleición de Javier Fernández de nueu comu presidente del “Principado”, "gracies al avezáu sofitu d’IU-IX que torna a traicionar les sos promeses elleutorales en función de los propios intereses, supón la renuncia definitiva a la superación d’un Estatutu y una istitución autonómica, el “Principado”, impuestos dende Madrid, y a la Oficialidá de la llingua asturiana, nuna incesante repetición de lo que vien siendo la dinámica del PSOE-IU n’Asturies nos trenta años caberos". P'Andecha, "los que fueron cómplices más que socios de gobiernos corruptos comu los d’Areces, qu’esfarraparon el texíu económicu y productivu asturianu, que reprimieron sistemática y obsesivamente la llingua asturiana, que prevocaron l’ésodu de decenes de miles d’asturianos, tornen a repetir la mesma traición alliándose colos enemigos d’Asturies, porque a la fin, nun dexen de ser lo mesmo". Asina les coses, nel gobiernu del “Principado” nun hai dengún cambéu pala organización nacionalista: "Un xiru de 360º pa tornar al mesmu sitiu. Otros cuatro años más d’Estatutu impuestu, ensin Oficialidá, condergaos a la cola de la recuperanza económica y cola corrupción comu seña d’identidá de los gobiernos PSOE-IU". Fonte: Asturnews

La Xunta Pola Defensa de la Llingua califica de continuista l'alcuerdu d'investidura en política llingüística

La XDLA critica a Izquierda Xunida por dicir na campaña que la oficialidá yera prioritaria A la XDLA parez-y "qu'intenten vendenos el desalcuerdu como una midida o que nos demás puntos hubo un consensu xeneralizáu y que namás foi nesa cuestión onde surdieron les rocees. Sobre manera, ye especialmente llamativo qu'una de les fuercies firmantes d'esti alcuerdu asegurara na campaña eleutoral que la oficialidá yera una prioridá". Sicasí, otra vuelta volvieron dexala pa prau na mesa de negociaciones. Parez que nun s'esixó a la FSA un derechu humanu como ye la igualdá de derechos llingüísticos, cuestión que vien xenerando una movilización civil constante dende los tiempos de la Transición y que sigue ensin resolver. Pa negar la oficialidá agora pónense sides como la falta de consensu o, mesmamente -utilizando un argumentariu mui de la FSA-, fálase de que quien lo reclama ye una minoria. Nun vemos mayoríes nin manifestaciones multitudinaries a favor de la reforma de la llei eleutoral, midida qu'a pesar de la negativa inicial socialista sí s'inclúi nel alcuerdu. La organización de defensa y promoción llingüística atalanta que ye enforma preocupante "la falta de midíes concretes en política lingüística, polo que se ta dando una fueya en blanco al Executivu de Javier Fernández pa que siga cola paralización total qu'hubo na llexislatura pasada. Mesmamente, fálase de la creación d'una d'eses famoses comisiones d'estudiu, d'esta vuelta pa estudiar les fórmules meyores pa protexer l'asturianu. Pa eso nun faen falta comisiones d'estudiu porque les fórmules yá les conocemos. Lo que fai falta ye firmar midíes concretes en materia política llingüística efectiva, pero nel alcuerdu nun se fala d'activar esta materia y d'implicase con ella". Amás, a la XDLA abulta-y que "tampoco nun se fala de mínimos que tendríen que tar en marcha dende hai más d'una década, como l'usu de la toponimia en toles estayes alministratives -mesmamente, na RTPA-. Asina, queda comprobao que vamos tener un Executivu formáu por un sector que quier acabar col nuesu patrimoniu llingüísticu (PSOE) y apoyáu por una fuercia política que nun aprovecha'l so pesu pa marcar l'axenda de la política llingüística. Y ye que si nun hai nada firmao ye que nun hai nengún compromisu nesa materia, polo que tenemos mieu de que too siga igual que siempres: parálisis y retrocesu". Fonte: Asturnews

"Un alcuerdu insuficiente dafechu" pa l'ALLA

• La FSA algama un alcuerdu con IX pal apoyu a Javier Fernández na investidura

L'Academia de la Llingua Asturiana (ALLA) espón nun tweet la so disconformidá col alcuerdu ente la FSA-PSOE y Izquierda Xunida no que respeuta al tema llingüísticu.

Tanto na so cuenta Twitter como na de Facebook, la institución académica espresó'l mensaxe siguiente: "L’alcuerdu PSOE-IX ye insuficiente dafechu y nun respuende a les necesidaes y espeutatives sociales. La cooficialidá ye irrenunciable".

D'esta forma l'ALLA dexa nidia la so postura con respeuto a esti alcuerdu ente les dos formaciones pa que Javier Fernández, cola suma de los votos de los cinco diputaos d'IX, algame una mayoría suficiente pa ser presidente del país.

Fonte: Asturies.com