Montejo (Podemos) pide a PSOE y PP un cambéu na política llingüística

"La llingua, la cultura y los derechos nun tendríen de tener color políticu"

La diputada Lucía Montejo fixo esta mañana en nome de Podemos Asturies el discursu de réplica a les candidatures a la presidencia y nella intercaló una parte sobre la situación de la llingua asturiana:

"Asturianu.

Un casu sintomáticu de la forma de faer política del PSOE y del PP y de la so falta de proyeutu coherente p’Asturies, ye per un llau l'ausencia de referencies a la llingua asturiana nel discursu de Javier Fernández y, per otru, nel casu de Mercedes Fernández, una única referencia, na que defendía una rebaxa, entá mayor, del estatus de l'asignatura d'asturianu na educación.

Señores diputades y diputaos, l'asturianu ye una llingua que cada vez se tresmite menos, y hasta la UNESCO y el Conseyu d'Europa tienen que llama-y l'atención al Gobiernu asturianu pa que protexa la cultura asturiana y los derechos de los ciudadanos y ciudadanes d’Asturies, porque esti Gobiernu incumple sistemáticamente la llexislación vixente en materia llingüístico y eso tien un costu que se cuantifica nuna perda cultural que van pagar les siguientes xeneraciones.

Pero si'l PSOE y el PP rectifiquen el so planteamientu d'estos años, asumen la diversidá llingüística como un elementu qu'arriquez a tolos miembros d'esta comunidá –falen l'idioma que falen-, deciden incorporase a los planteamientos de les sociedaes civilizaes de la nuesa redolada que potencien el so patrimoniu y la diversidá como elementos vertebradores y enriquecedores, (tamién nel planu económicu), y asumen los pidimientos de los organismos internacionales qu'alerten sobre la mala situación del asturianu, van poder trabayar con Podemos tamién nesti tema.

Animámosvos a faelo porque la llingua, la cultura y los derechos nun tienen, o siquier nun tendríen de tener, color políticu".

Fonte: Asturies.com

La XDLA reclama al Gobiernu la continuidá de la Dirección Xeneral de Política Llingüística

Alfredo Ignacio Álvarez Menéndez, hasta agora Director Xeneral de Política Llingüística La XDLA reclama al Gobiernu la continuidá de la Dirección Xeneral de Política Llingüística La Xunta pola Defensa de la Llingua Asturiana (XDLA) considera fundamental la presencia efectiva nel Gobiernu de cargos con capacidá y rangu “pa poder sacar alantre les midíes contemplaes na llexislación pa desenvolver polítiques afayadices pal futuru de la llingua asturiana”. La organización de defensa de los derechos llingüísticos pidió al traviés d’un comunicáu “abrir una dómina nueva qu'asegure, non solo los derechos básicos, sinón tamién la tresmisión interxeneracional y el prestixu públicu pal idioma”. Pa la XDLA, esta presencia efectiva tien que tar inspirada y venir determinada pola tresversalidá, p'asina caltriar en tolos departamentos de l’Alministración. Esto ye, qu'a los tradicionales ámbitos de Cultura y Educación –onde l’asturianu ha tener la más alta representación política y alministrativa–, han sumase les demás Conseyeríes que, coordinaes dende la Presidencia, tienen que tener la capacidá real de facese presentes y vertebrar tol territoriu asturianu al traviés del nuestru idioma. Otra manera, la organización entiende que la fusión de les conseyeríes de Cultura y Educación “nun pue suponer recortar el rangu qu'hasta'l momentu tuvo l'idioma dientro del organigrama del Gobiernu”. Por eso, la XDLA solicita'l mantenimientu de la Dirección Xeneral de Política Llingüística dientro de l'actual Conseyería que dirixe Ana González. La estructura nueva, amás, pue permitir una mayor coordinación ente les midíes de promoción social y les desarrollaes nel ámbitu educativu, dos estayes fundamentales p'asegurar el futuru de la llingua asturiana. Fonte: Asturnews