García Granda pidió otra vuelta’l votu n’asturianu nel día que lu sofita Sánchez Lazo

El catedráticu de Bioquímica y Bioloxía Molecular, Pedro Sánchez Llazu, decidió sofitar esti martes pela nueche la candidatura de Santiago García Granda na carrera al Rectoráu que’l xueves volverá axuntar a tolos integrantes de la Universidá d’Uviéu. García Granda despidió la campañá pidiendo otra vuelta’l votu n’asturianu.

García Granda finó ayer la campaña emplegando otra vuelta l’asturianu, lo que foi celebrao nes redes sociales por estudiantes y otros miembros de la comunidá universitaria asturiana. Tamién s’espardió en llingua asturiana una cabera propuesta de inversión de 5 millones d’euros en cuatro años p’anovar la conectividá WIFI nes aules y l’equipamientu informáticu.

La primer vuelta de les eleiciones di’o-y a José Muñiz el 34,04% del votu ponderáu y a Santiago García Granda el 32,97% y 90 votos más, dando un empate técnicu. Lazo consiguió un 25,3% y Agustín Costa quedó nel 7,8%. Sánchez Lazo tomó la decisión col so equipu y comunicó-yla a García Granda na xornada d’ayeri.

Según esplicaba Sánchez Lazo al traviés d’un comunicáu espublizáu en Twitter, la so candidatura adquirió “una serie de compromisos fundamentales colos nuesos votantes” qu’agora son asumíos por Santiago García Granda. Los más importantes, que yá s’alcontraben nel programa electoral de García Granda yeren los referíos a los estudiantes, a los que garantiza una representación estudiantil “autónoma ya independiente de los órganos de gobiernu”, amás de “implementar la posibilidá de pagu fraccionáu mensual de les tases universitaries” y la puesta en marcha de medios de tresporte, “en concretu d’un serviciu danzadera”, ente los distintos campus.

Otres midíes tocantes al personal docente ya investigador, como la inversión nel remocicamientu de la plantiya y camudar los “falsos asociaos” en figures contractuales a tiempu completu que foi una de les propuestes estrella de García Granda alcuéntrense tamién nel documentu col que comunicaba’l so sofitu Sánchez Lazo. Nel casu de la PAS, falase de recuperar derechos perdíos amás de facilitar el relevu xeneracional.

Toes estes propuestes paeciéron-y perbién a Santiago García Granda porque les tenía contemplaes nel so programa electoral,polo que refuercen el so propiu planteamientu. García Granda ya prometiere cuntar colos otros tres candidatos al Rectoráu y delles otres personalidaes de la Universidá nun Conseyu Asesor.

La comunidá universitaria asturiana torna a les urnes esti xueves 28 d’abril pa esta segunda vuelta.

Fonte: Asturnews

García Granda celebra n’asturianu’l pase a la segunda vuelta con Muñiz n'Uniovi

Santiago García Granda ganó con 90 votos más que José Muñiz la primer vuelta de les eleiciones al Rectoráu celebraes esti xueves na Universidá d’Uviéu, anque’l votu ponderáu que da mayor valir al profesoráu qu’a otros estamentos allugó a Muñiz un puntu porcentual penrriba de García Granda que siguió usando l’asturianu pa felicitar a la comunidá académica pol resultáu.

El catedráticu de Psicometría José Muñiz, col 34,004% de los votos ponderaos, y García Granda, catedráticu de Química Física, col 32,94%, van disputar la segunda vuelta eleutoral, que se va celebrar el xueves que vien, a la espera de la decisión de la Xunta Eleutoral Central. Los otros dos candidatos qu’aspiraben al rectoráu, Pedro Sánchez Llazu, de Bioquímica, y Agustín Costa, de Química, llograron el 25,3875% y el 7,7932% de los votos ponderaos, respeutivamente.

La participación algamó’l 26,48%, daqué más de dos puntos percima del porcentaxe rexistráu en 2012. En númberos absolutos, José Muñiz llogró 2.017 votos; Santiago García Granda, 2.107; Pedro Sánchez Llazu, 1.844; y Agustín Mariña, 360 sufraxos.

Por seutores, la mayor participación asitiose nel coluctivu de profesores doctores con vinculación permanente, con un 86,48 (1.309 votantes); siguíu pol Personal d’Alministración y Servicios (PAS), con un 80,15% (759); el restu del personal docente ya investigador rexistró un 55,84% de participación (626); y finalmente el coleutivu d’estudiantes, con un 18,96% de participación (4.090 sufraxos).

El campus que más votó nes urnes foi Uviéu Centru, con un 43,21% de votantes; siguíu de Cristu B, con un 34,01%; Uviéu centru y Humanidaes, con un 33,51%; Llamaquique-El Catalanes, con 26,76%; Mieres, con un 26,47%; El Cristu A, con un 20,44%; Campus de Xixón, con un 21,41%; y Xixón- Llaboral, un 16,05%.

A la segunda vuelta tán llamaos a les urnes 24.957 eleutores que conformen el censu universitariu. El votu final ponderáu ta distribuyíu en porcentaxes ente los siguientes coleutivos: Profesores doctores: 55%; Restu de personal docente ya investigador: 10%; Estudiantes de primer y segundu ciclos, grau, máster o doctoráu: 25%; Personal d’Alministración y Servicios: 10%.

Fonte: Asturnews

Cuatro caderalgos entamen la carrera al Rectoráu de la Universidá pero namái unu usa l’asturianu

Los cuatro caderalgos qu’aspiren al rectoráu de la Universidá d’Uviéu entamaron ayeri llunes la campaña eleutoral presentando los sos programes, pero namái Santiago García Granda usa l’asturianu na so cartelería y presentación gráfica, acordies coles manifestaciones que ya ficiere nel mes de marzu.

Los cuatro candidatos qu’aspiren a sustituyir a Vicente Gotor espunxeron a lo llargo de la xornada del llunes los sos programes n’actos enforma simbólicos. Santiago García Granda y Pedro Sánchez Llazu tuvieron en Xixón pa defender la descentralización de los recursos, y nel casu de García Granda tamién los centros pequenos al desenvolver so actu de presentación na Escuela Superior de Marina, mientres n’Uviéu, José Muñíz y Agustín Costa pegaron cartelos nes sos respeutives facultaes.

Santiago García Granda defendió ayeri ‘un equipu eficiente y cercanu’ y fízolo al mesmu tiempu n’asturianu, n’inglés y en castellán como sedrá la so páxina web que se presenta mañána miércoles a les 12 na Biblioteca del Milán, n’Uviéu.  Tresparencia interna y esterna, más titulaciones, asina como evitar la xudicialización de conflictos, potenciar trámites lletrónicos, fomentar la investigación interdisciplinar y promocionar l’asturianu cola creación d’una Oficina de Normalización son les sos apuestes cimeres.

El llema de Costa ye ‘Por una universidá entamadora’, volcándose na amestaura de la producción científica cola xeneración d’empléu y riqueza. L'eslogan de Muñíz ye ‘Toos faemos Universidá. Depende de ti’ y Lazo sostién que ‘Otra Universidá ye posible’. Pero dengunu de los tres fizo denguna referencia a la llingua asturiana nin usó l’asturianu nes sos presentaciones o na so cartelería.

Fonte: Asturnews