Podemos Asturies pide más programación infantil y n’asturianu pa una RTPA calidable, innovadora, plural y participativa

El conseyu d’alministración de Radiotelevisión del Principáu d’Asturies axuntó esti llunes pa, ente otros asuntos, aprobar una parte de la so programación pa los primeros meses del añu 2017 ya informar sobre la incorporación de trés nuevos cargos directivos y Podemos pidió nesta xunta más programación infantil y en llingua asturiana.

Dende’l Grupu Parlamentariu de Podemos Asturies aportunen na necesidá de replantegar l’actual modelu de RTPA, que consideren que nun respuende a lo que tendríen de ser los principios rectores d’una radiotelevisión asturiana. Entienden que la razón de ser d’un mediu de comunicación de titularidá pública pasa pol compromisu cola realidá social y cultural del territoriu nel que ta enllantáu y esixe un apueste decidíu por conteníos informativos y formativos calidable, con especial atención na so programación, nel casu de la radiotelevisión asturiana, al públicu infantil, a la llingua y cultura asturianes, a la creación audiovisual con denominación d’orixe de la nuesa comunidá autónoma, y al texíu social y asociativo que definen en bona midida la identidá y l’idiosincrasia de Asturies.

“Consideramos necesariu un mayor apueste pola programación infantil y la llingua, y un alderique social sobre’l modelu de radiotelevisión”. Esta foi la propuesta nidia de la formación pa “superar un modelu continuista y seguidista d’otros exemplos de radiotelevisión que suponen más de lo mesmo, y pallo una bona ferramienta sería favorecer y xenerar un ampliu alderique social que nos ayudar a determinar qué tipu de radiotelevisión demanda y precisa la ciudadanía asturiana. Hai qu’oyer la voz de les xentes de les artes escéniques y d’otros sectores de la cultura, del movimientu vecinal, de les organizaciones de consumidores y usuarios, de les y los profesionales de la comunicación, de les ONGs, de la comunidá educativa asturiana, de los colectivos xuveniles y de les asociaciones de persones mayores, de los distintos axentes sociales… La voz, les voces, de la Asturies a la que se debe una radiotelevisión non yá de titularidá pública sinón con auténtica vocación de serviciu públicu, participativa de puertes fuera y de puertes adientro, qu’escuche a la xente de la cai y que ponga en valor el trabayu, el criteriu y el talentu de les y los profesionales que nella trabayen día ente día. Sedría’l camín pa dotanos d’una RTPA con calidá, innovación, independencia y pluralidá, un reflexu de l'Asturies actual y un sacalliñu pa l'Asturies que queremos ser nel futuru”.

Fonte: Asturnews

L’ALLA reclama una presencia digna del asturianu na RTPA

   La RTPA lleve meses apregonando, y lluciendo en toles sos emisiones, un anagrama especial conmemorativu de los 10 años de la so esistencia y l’Academia de la Llingua albidra que ta bien cumplir diez años pero que nun val un res si nun sirve pa dignificar la llingua y la cultura d’Asturies.

  Nuna nota de prensa asoleyada esti día, l’Academia de la LLingua diz felicitase porque “el qu’un ente públicu de radiotelevisión asturiana algame los 10 años ye un fechu ensin dulda relevante pa la vertebración d’una comunidá autónoma que, como Asturies, ta somorguiada nuna fonda crisis económica, social y cultural”. Pero al mismu tiempu, l’ALLA fai alcordanza de que “apocayá, va unos años, la RTPA sofrió una fuerte crisis estructural que tuvo a piques de facela desapaecer. Nesi momentu, tanto los sos trabayadores como la direición del ente quixeron treslladar a la opinión pública asturiana la importancia del so llabor social y cultural, mesmamente polo que cinca al usu y caltenimientu de la llingua asturiana como patrimoniu común de tolos asturianos”.

D. Antonio Virgili Rodríguez, Direutor Xeneral de la RTPA

  Y ye que, “a lo que paez, la crisis pasó y el compromisu de la RTPA cola dignificación del asturianu siguió como siempres; ye dicir, ensin sobrepasar el 5% de la emisión selmanal y con una programación temática que da una visión del asturianu ente etnográfica y costumista”. El propiu Conseyeru d’Educación y Cultura del Gobiernu del Principáu d’Asturies criticaba díes atrás les insuficiencies d’esti modelu.

  Convién saber, en tou casu, pala Academia “qu’una presencia digna del asturianu na RTPA nun ye namái una cuestión de sensibilidá cultural de dellos sectores asturianos, sinón que deriva direutamente del marcu llegal que la enconta (Llei d’Usu del Asturianu de 1998 y Llei de Segunda Reestructuración del Sector Públicu Autómicu de 2014). Pues bien, los mandaos calteníos nes anteriores son dafechu desatendíos pola direición de la RTPA, magar tolos indicadores d’audiencia afiten l’aceutación popular de la presencia del asturianu na radio y televisión publiques d’Asturies”.

  L’Academia de la Llingua Asturiana (ALLA) camienta nesti sen “qu’una presencia granible del asturianu na RTPA esixe d’un compromisu claru d’esta pa col procesu de recuperación llingüística n’Asturies y pide, darréu d’ello, que se dean pasos urxentes nel emplegu del asturianu con un enclín nidiamente comunicativu. Esto ye y como una propuesta de mínimos, un espaciu informativu na tv. (el del meudía o la nueche) dafechu n’asturianu, xunto con otros programes que dignifiquen l’usu social de la llingua (magacines, restrasmisiones deportives, documentales de temática actual, etc.); espacios informativos con un usu cotidianu del asturianu na radio y, dende llueu, un periódicu dixital dafechu n’asturianu (o con una opción doble de llectura n’asturianu y en castellán)”.

  L’Academia de la Llingua Asturiana da anuncia, a lo cabero, que pa treslladar estos encamientos al ente públicu, acaba de solicitar una entrevista urxente con D. Antonio Virgili Rodríguez, Direutor Xeneral de la RTPA.                                              Fonte: asturnews.com