La XDLA esixe una planificación llingüística na RTPA

La Xunta pola Defensa de la Llingua Asturiana considera imprescindible que la RTPA cuente con una Dirección de Planificación Llingüística que garantice la execución de les midíes sobre los medios de comunicación públicos.

La propuesta de la Xunta pola Defensa de la Llingua Asturiana (XDLA) empobinase a garantizar les midíes incluíes nel Plan de Dignificación del Asturianu y nel Alcuerdu d’Investidura ente PSOE y IX. Sigún la XDLA pa cumplir con esto val “cola tresformación d’una de les direcciones que lleven cuatro años ensin responsable, circunstancia que demuestra que nun son necesaries. Ye’l casu de la dirección d’Antena, la de Rellaciones Corporatives y la de Comunicación”.

La dirección de Planificación Llingüística de RTPA nueva habría d’encargase, na opinión de la Xunta, “d’impulsar l’usu de la llingua asturiana nes emisiones, mirando pola calidá tanto en términos normativizadores como normalizadores. Esta dirección resulta imprescidible pa cumplir los compromisos de la investidura, especialmente desque se confirmó l’ausencia de persones comprometíes colos derechos llingüísiticos na dirección xeneral y na mayor parte del Conseyu d’Alministración nuevu”.

Nesi sentíu, la organización recuerda que nel alcuerdu d’investidura d’Aragón, el candidatu socialista foi escoyíu presidente col compromisu de medrar la presencia de les llingües propies na televisión y yá se tán dando pasos concretos nesi sentíu. Otra manera, en Baleares depués del cambiu de gobiernu, la Dirección Xeneral de Política Llingüística y la radiotelevisión autonómica, IB3, alcordaron un cambiu nel modelu llingüísticu de la canal, cuestión que se lleva faciendo dende setiembre d’esti añu.
Fonte: Asturnews

Alonso anuncia'l desendolcu de “una planificación llingüística realista y mui moderada” como ún de los sos oxetivos

por Pablo R. Guardado

Va tar orientada a “la dignificación de la llingua y cultura asturiana y del gallego-asturiano o a nosa fala”. El conseyeru d’Educación y Cultura inauguró’l cursu d’ESO y Bachilleratu nel IES Marqués de Casariego de Tapia.

Genaro Alonso destacó l’arranque “con normalidá” de les clases n’Asturies pese a la implantanción de la Llei Orgánica de Meyora de la Calidá Educativa (LOMCE) nel país en toda Primaria y en primeru y terceru de la ESO, y primeru de Bachilleratu. Tamién esplicó que la escoyeta del centru tapiego pa la inauguración del cursu debióse pol 150 aniversariu de la so inauguración y por tratase d’una zona “llingüísticamente significativa”, nun nidiu mensaxe d’apoyu al eonaviego.

“Ente los oxetivos d’esta nueva Conseyería d’Eduación y Cultura ta tamién el puxu decidíu d’una planificación llignüística realista y mui moderada alcordies col marcu llegal vixente, y sobre manera orientada a la necesidá de difusión, promoción y dignificación de la llingua y cultura asturiana y del gallego-asturina o a nosa fala”, señaló na so intervención –en castellanu– Alonso, pa depués apuntar que “güei podemos afirmar que superaos prexuicios que dende posiciones supuestamente llingüístiques negaben a la llingua asturiana derechos básicos de normalización, normativización y difusión, la normalización social de la llingua pue discurrir entós per caminos asosegaos, alcordies con una sociedá moderna, democrática y culta que tien la fortuna de contar ente’l so patrimoniu cultural con llingües milenaries; con una manera propia y distintiva de codificar el pensamientu, la realidá o la ficción”.

El conseyeru tamién faló de posibles futures convocatories d’oposiciones, afirmando que la cifra de 400 places que comentara nos díes previos ye una estimación y que dependerá de los presupuestos. “Agora que s’anicia’l trámite de los presupuestos obviamente decidirémoslo” teniendo en cuenta “les especialidaes que más lo requieran, aquelles que más tiempu lleven ensin convocar oposiciones”, esclarió.

Fonte: Asturies.com