Fina Xaviel Vilareyo

Xaviel Vilareyo, profesor y escritor mierense, finó'l martes de manera prematura a los 48 años. Esti miércoles va celebrase'l so funeral na ilesia de los Santos Apóstoles d'Uviéu.

Defensor de les llingües d'Asturies y de la identidá asturiana de l'Asturies de Santiyana, Vilareyo tamién destacó como activista cultural, entamando numberoses iniciatives, ente les que sobresalen el Festival de Cine Asturianu y el Festival de Cine LGBT d'Asturies. Tamién organizó cuatro ediciones de la Xunta d'Escritores Asturianos n'Uviéu ente los años 2005 y 2012.

Iniciativa pol Asturianu asoleyó güei una nota na que recuerda la so figura y el so compromisu pa col idioma. Dende Asturies.com treslladamos el nuesu pésame a familia y amigos, que van despidir al escritor estar tarde, a les 16.30 hores, na ilesia uvieína de los Santos Apóstoles. Descansará nel cementeriu de Navia.

Fonte: Asturies.com

Finó'l céllebre escritor llatinoamericanu Eduardo Galeano

Dexa trabayos percéllebres, como "Les venes abiertes d'América Llatina"

Eduardo Galeano

   L'escritor y periodista uruguayu, Eduardo Galeano, finó esti llunes a los 74 años en Montevideo (capital uruguaya), según informó'l diariu local uruguayu Sorrayáu. Les fontes familiares precisaron a Efe que Galeano foi ingresáu nun centru hospitalariu de la capital uruguaya debíu al agravamientu del so estáu de salú nos últimos díes, tres una de les munches recaídes que sufriera últimamente dempués de pasar dómines bones una vegada que foi interveníu en 2007 d'un cáncer de pulmón.

   Galeano ye consideráu unu de los más destacaos autores de la lliteratura llatinoamericana. Ente les sos numberoses obres destaquen "Memoria del fueu", "Los díes siguientes", "Guatemala, país ocupáu", "La so maxestá'l fútbol", "El fútbol a sol y solombra", "Cróniques llatinoamericanes", "La contraseña", "Úselo y tírelo", "Pates arriba. La escuela del mundu al aviesu" y l'universalmente reconocida "Les venes abiertes d'América Llatina".

   La so obra estrémase por tescender xéneros ortodoxos y combinar documental, ficción, periodismu, analís políticu y hestoria. Nos años sesenta empezó la so carrera periodística, trabayando como editor nel selmanariu Marcha y mientres dos años nel diariu Época. Tres el golpe d'estáu de 1973, Galeano tuvo que dexar Uruguai y coló a vivir a Arxentina, onde fundó un magacín cultural de nome Crisis. Cuando volvió a Uruguai, yá en 1985, fundó un selmanariu llamáu Brecha. Unu de los episodios más complicaos de la so vida foi superar el cáncer de pulmón que lu aquexaba y del que salió airosu en 2007.
Fonte: Infoasturies.net