Ixuxú edita un nuevu dossier pa espardir música, cultura y aspectos sociales asturianos nel País Vascu

El “Dossier 2014 Txostena” axunta 17 grupos, 9 proyecciones y 18 charres pa intentar que se programen n'infraestructures socioculturales vasques.

   Ixuxú Asturies-Euskal Herria elkartea, l'asociación d'asturianos emigraos al País Vacu que fai de ponte sociocultural ente los dos pueblos, acaba d’espublizar una nueva edición del so dossier. Nél, arrexunta grupos de música, charres y proyecciones d’Asturies pa dales a conocer ante'l públicu vascu. Tamién tien por oxetivu algamar que se programe dalgún de los sos conteníos nes infraestructures socioculturales onde s’esparde.

   17 grupos de música, 9 proyecciones y 18 charres sobre llingua, cultura, historia, música y movimientos sociales formen el “Dossier 2014 Txostena”. Na parte musical –impresa a tou color- destaquen bandes folk y rock que tienen nuevu material discográficu, xunto con otres que yá collaboren dende l'añu pasáu con Ixuxú. La otra parte –impresa nun cartafueyu independiente- ye una amuesa de charres y proyecciones alrodiu temátiques culturales y sociales asturianes pa la so divulgación pel País Vascu.

   A la fin, un total de 32 páxines que busquen amenorgar les carencies que tien la música asturiana pa salir fuera de les sos llendes, visibilizar Asturies ante'l país vecín y captar l'interés d'árees municipales de Cultura, festivales, gaztetxes, comisiones de fiestes, asociaciones, centros asturianos… pa que contraten dalgunes de les propuestes del dossier y les incluyan dientro de la so programación sociocultural.

   Gracies al dossier del añu pasáu, esta asociación consiguió que La Tarrancha actuara nel Teatru municipal de Gernika, que'l próximu mayu fáigase un intercambiu cultural ente L.lena y Amorebieta y que Skama la Rede, Skontra, Adizión Etílika y K-Nalón tocaran en dellos gaztetxes. Otros de los sos conteníos, como delles proyecciones y les charres sobre llingua asturiana, movimientos sociales y modelos de fútbol popular, tamién llegaron a Euskal Herria.

Autoxestionáu   Una vegada más, los 500 exemplares d'esti dossier vuelven editase de forma autoxestionada dafechu, ensin recurrir a nenguna ayuda pública pa la so fechura. Los gastos d'impresión, realización, traducción y distribución cúbrese coles abondes actividaes que fai Ixuxú Asturies-Euskal Herria elkartea y gracies a los grupos y persones que se fixeron socies d'esti proyectu.

Fonte: Infoasturies.net

• Debaxo, na seición d'Archivos Alxuntos, disponible pa la so descarga'l Dossier.

Descargar archivos alxuntos: 

• dossier2014txostena.pdf (11 Descargues)

Ixuxú elkartea edita un dossier que sirve de muesta de la realidá social y cultural asturiana

El proyeutu Ixuxú Elkartea edita un dossier que sirve de muesta de la realidá social y cultural asturiana

Ixuxú Asturies n'Euskal Herria

   Ixuxú Asturies-Euskal Herria elkartea ta acabante d’asoleyar un dossier pa distribuyir per instituciones y coleutivos vascos que sirve de muestra de la realidá social y cultural asturiana. L’oxetivu ye visibilizar aspeutos d’Asturies nesi país.

   Xicu Ariza, ex redautor d’Asturies.com residente anguaño n’Euskal Herria, ye l’impulsor del proyeutu Ixuxú Asturies-Euskal Herria elkartea, “un glayíu intercultural pa visibilizar aspeutos d’Asturies, tantes vegaes invisibilizada y estereotipada”. Tres facer promoción de delles bandes de música asturianes y entamar un alcuentru cultural el 2 de marzu pasáu nel Gaztetxe de Gasteiz, con charres y conciertos, la iniciativa nueva del periodista asturianu ye la ellaboración del ‘dossier 2013 txostena’ cola intención de distribuyilu por gaztetxes, ayuntamientos, comisiones de fiestes, centros asturianos y festivales de tol territoriu vascu.

   Esti completu documentu, de 40 páxines, recueye información sobre grupos de dellos estilos musicales que collaboraen col proyeutu, como Herbamora, La Coḷḷa Propinde, K-Nalón, Sambre, Dixebra o Skontra, ente otros munchos, con información detallada sobre la so trayeutoria y la so música, asina como datos pa la so contratación, tratando de facilitar a este formaciones el salir a tocar fuera d’Asturies. Tamién propón una serie de charres posibles destinaes a conocer más de cerca la realidá asturiana en temes como la llingua, la mitoloxía, el celtismu, el fútbol o’l conflictu mineru, ente otros, y impartíes por coleutivos como la Xunta pola Defensa de la Llingua Asturiana o la CSI, y por espertos como Alberto Álvarez Peña, Pablo Texón o Iñigo Arza. Talleres de danza asturiana, de llingua asturiana, mercaos tradicionales o delles proyeiciones son otres de les propuestes qu’apurre esti dossier, disponible en versión física y dixital. Hai que destacar qu’esta iniciativa d’Ixuxú Asturies-Euskal Herria sal alantre ensin nengún apoyu económicu, siendo autoxestionada dafechu.

   Otra manera, ente les actividaes próximes entamaes por Ixuxú elkartea destaca l’actuación del grupu ḷḷenizu Adizión Etílika’l 8 de xunu en La Kelo Gaztetxea de Santurtzi, y la presentación de la novela gráfica de Ruma Barbero ‘La Chelita. El Salvador 1992’, con fecha y llugar tovía por confirmar.

   Fonte:  Asturies.com