Grau acueye la presentación d'un documental sobre los Aguilandeiros de San Xuan

  Esti sábadu, a les 20.30 hores, va presentase na Casa Cultura de Grau'l documental 'Aguilandeiros de San Xuan. Recuperación d'una mazcarada nel conceyu Grau'. Trátase d'una cinta de Producciones Estoupo con Xosé Antón Fernández 'Ambás' y el Grupu Xeitu.

  Encuadráu dientro'l IV Memorial Eliseo Nicolás Lise, qu'entama l'Asociación Cultural Amigos Lise, esti actu va permitir conocer la obra definitiva d'esti documental sobre la mazcarada recuperada nel añu 2014 tres 70 ensin celebrase. Un llabor nel que resultó imprescindible'l trabayu de campu d'Ambás y Ramsés Ilesies, amás del grupu de baille tradicional Xeitu d’Uviéu y los vecinos de la parroquia de San Xuan, con un resultáu espectacular que se ve reflexáu nesti documental.

  Los mozos salen domingu cercanu al 28 d'avientu pela mañana en tractor pa facer un percorríu per tolos llugares de la parroquia –amás de San Xuan, Acebéu, La Llinar y Rozadas–  y finar frente a la ilesia, onde se representa una función. Darréu entámase una xinta popular.                                                                                             Fonte: asturies.com

El documental "Se dice poeta" estrénase esti domingu nel Niemeyer

Proyeición y posterior alderique

Vanessa Gutiérrez,  nel Centru Niemeyer d'Avilés

      "Se dice poeta" fala d'educación,  de cuotes, de discriminación positiva, de feminismu y de llinguaxe. "Porque, como bien dicía Orwell, igual que'l pensamientu constrúi'l llinguaxe, el llinguaxe tamién puede construyir el pensamientu.  Y son les persones qu'escriben y trabayen col llinguaxe quien tienen una mayor responsabilidá a la hora atopar maneres más xustes y más llibres d'espresanos".

   Ye polo tanto un llargumetraxe documental qu'ellabora un  percorríu pol panorama poéticu contemporaneu plantegando entrugues alrodiu la visibilidá de les autores y cuáles son les causes d'esa mirada diferenciadora.

     Esta película ye una producción de SEÑOR  PARAGUAS, dirixida por  Sofía Castañón (Xixón, 1983). Cunta col sofitu de la Fundación Municipal de Cultura y UP de Xixón y del Institutu Asturianu de la Muyer.

     Ente les 21 poetes entrevistaes hai cuatro asturianes:  Vanessa Gutiérrez (Urbiés, 1980), Teresa SotO (Uviéu,  1982), Alba González  Sanz (Llanera, 1986), Laura Casielles  (Siero, 1986), asina como la editora, tamién asturiana, Silvia Cosío.

Sofía Castañón,  directora

     L'estrenu de Se dice poeta va tener llugar el domingu 5 d'ochobre a les 20.30h nel Cine del Centru Niemeyer d'Avilés, y va cuntar cola presencia de la poeta Vanessa Gutiérrez y la directora Sofía Castañón. Moderando'l coloquiu posterior va tar la periodista Sonia Ablanedo.                                                                                                             Fonte: Infoasturies.net