Esti martes 7 de xunu, a les 11.30 hores, nel Salón d’Actos del Centru Cultura Antiguu Institutu, la Oficina de Normalización Llingüística de Xixón va facer entrega de los Décimos Premios del concursu ¡Ruempi la Mollera! nel que participaron escolinos y escolines de quintu y sestu cursu d’Educación Primaria de Xixón.
Nel actu, amás de la Conceyala d’·Educación y Cultura, Monserrat López Moro, participarán actores del grupu de teatru “Higiénico papel”qu’animarán la entrega de premios con sorpreses y bon humor. Amás va poder vese una amuesa de los trabayos presentaos nel patiu del Antiguu Institutu. Los colexos participantes de la edición 2015-2016 son: C.P. Alfonso Camín, C.P. Cabueñes, C.P. Clarín, C.P. Honesto Batalón, C.P. Jacinto Benavente, C.P. Montevil y C.P. Xovellanos.
Ruempi la mollera, ye un concursu nel que pue participar tol alumnáu de 5u y 6u de Primaria en llingua asturiana de cualesquier colexu del Conceyu de Xixón. El concursu entamó n’ochobre de 2015 y remató nel mes de mayu d’esti 2016. Nel desendolcu del cursu demientres los meses d’ochobre, xineru y abril, propúnxose a les escueles participantes una entruga sobre dellos temes, que van implicar un curtiu procesu d’investigación per parte del alumnáu. L’oxetivu ye que cada escuela dea la rempuesta al mayor númberu d’entrugues pa dir sumando puntos. Les citaes entrugues mandáranse per corréu a caún de los colexos participantes al mesmu tiempu que s’espublizaron na web de la Oficina de Normalización Llingüistica. Los participantes podíen pegala nel panel de la llingua que caún de los colexos participantes tuvo y con respeutu a la duración de l’actividá, hai que decir que foi una actividá que se desendolcara a la llargo del cursu escolar.
Fonte: Asturnews
