Los asturianos de Sao Paulo celebren so tradicional Fabada

La Fabada Asturiana tradicional nel Centro Asturianu de Sao Paulo

   Cola presencia de más de 150 invitaos, el Centru Asturianu de São Paulo y la Fundación Españoles nel Mundu/Brasil, celebraron esti pasáu domingu 30 de marzu la so tradicional Fabada Asturiana, que se realiza dende 1959. Una vegada más el local escoyíu foi'l Salón “Alvorada” de la Ilesia “São Carlos Baorromeu”, onde tuvieron presentes el Cónsul Xeneral d'España en São Paulo Sr. Ricardo Martínez Vázquez, la Canciller Sra. Norma Sánchez Arias, la xefe de la Sección d'Empléu y Seguridá Social Sra. Ana María Serrano Oltra, el Director del Institutu Cervantes Sr. Pedro Benítez, la presidente de la Sociedade Rosalía de Castro Sra. Carmen Bley, representantes de partíos políticos y empresarios españoles y brasileños.

   Dempués de saborguiar el platu tradicional, los hermanos Thiago y Priscilla Flórez, estudiantes de la Escuela d'Asturianía, allantaron a los presentes con músiques y dances del repertoriu popular asturianu, que fixeron la emoción brotar de los emigrantes ellí presentes, yá que dempués de munchos años recuperábase la presencia de los mozos nel plantel folclóricu.

   La presidenta del Centru Asturianu de São Paulo, Charo Concepción Fernández y el presidente de la Fundación Españoles nel Mundu/Brasil, Francisco Javier F. López, estimaron la presencia de toos, esplicando a los presentes el trabayu sociocultural que'l Centru realiza al pie de los sos paisanos y los proyectos presentaos nel ámbito de la cooperación internacional, como agradecimientu al pueblu brasileñu por haber acoyío a los asturianos que llegaron a Brasil.

   A la fin, yá toos de pies, cantóse l'Asturies Patria Quería.        Fonte: Asturnews

El Centru Asturianu de Madrid concede l’“Urogallo de Bronce” a Próspero Morán pola so xera pol asturianu

Inaciu Galán
El Centru Asturianu de Madrid ta acabante anunciar los sos gallardones del añu 2011, otorgaos a asturianos que destaquen nel so llabor n’estremaos llabores. Próspero Morán, director d’Asturnews, va recibir l’Urogallo de Bronce na categoría de llingua asturiana. El premiu, que s’entrega dende 1987, recibiéronlu nel pasáu xente como Xosé Lluis García Arias, Mª Josefa Canellada, Florina Alías, Ediciones Trabe o Nené Losada Rico, ente otros, y reconoz el llabor a favor del espoxigue del asturianu.
Próspero Morán (Llangréu, 1962) lleva toa una vida dedicáu al llabor pol asturianu. Llicenciáu en Filoloxia Hispánica y Doctor en Llingua y Lliteratura Española, algamó dellos posgraos en nueves tecnoloxíes y vien compartiendo’l so llabor de docente n’universidaes col trabayu como periodista, trabayu onde siempres tuvo al asturianu como llingua d’espresión.

El so llabor como periodista entamó en Radio Llangréu, pasando per cásique tolos medios asturianos y dellos estatales, como La Voz de Asturias, onde llegó a ser Xefe de Cultura, TVE, onde foi presentador del telediariu nuna de les poques esperiencies d’informativos n’asturianu. Collaboró tamién en Radio Asturies-SER, Radio 5, el Canal Internacional de TVE, el diariu económicu CincoDías, Qué, y nos años últimos, na TPA, onde presenta’l programa “Nós”, tamién na nuesa llingua.

Dende la so empresa Asturnet fundó Asturnews, una de les primeres esperiencies periodístiques pal asturianu n’internet. El so llibru “Llingua y Nueves Tecnoloxíes”, asoleyáu en 1996, ye ún de los pocos trabayos dedicaos al usu de llingües minoritaries nos medios que trata’l casu asturianu.

El so llabor a favor del asturianu fizo que lu nomaran miembru correspondiente de l’Academia de la Llingua Asturiana. Recibió amás otros reconocimientos, como l’Antena de Plata de l’Asociación de Radio y Televisión d’Asturies.

Fonte: Asturnews

El Centru Asturianu de Barcelona

Esti centru, amás d'acoyer a munchos asturianos que tan lloñe, desendolca una importante actividá favoratible a la llingua y cultura asturianes. Como amuesa podeis ver el so sitiu d’Internet n’asturianu y catalán, amás d’en castellanu, del qu’estrayemos dellos testos:

http://www.centroasturianobarcelona.com/

¿Qué ye'l Centru Asturianu de Barcelona?
Ye una entidá, llegalmente constituyida en 25 de xunetu de 1.952, ya inscrita nel Rexistru d'Asociaciones de Xeneralidá de Cataluña, col númberu 708. Ye una asociación declarada d'Utilidá Pública por Resolución alcordada en Conseyu de Ministros de 23 d'ochobre de 1.970, con responsabilidá xurídica y padrimoñal propia ya independiente, esfrutando d'autonomía dafechu alministrativa y financeramente, d'alcuerdu colos Estatutos aprobaos y disposiciones llegales aplicables.El so ámbetu d'actuación ye toa Cataluña, definiéndose como Entidá ensin ánimu de llucru.

¿Quiénes participen?
El Centru Asturianu de Barcelona como Entidá dafechu enxertada y abierta a la sociedá catalana desenrolla les sos actividaes pa tola ciudadanía, los sos fines son atropar a los asturianos y a los que, ensin selo, simpaticen con Asturies, so cultura y tradiciones, esparde les sos carauterístiques rexonales, sociales y materiales emburriando'l mutuu conocimientu, averamientu y apreciu. Dende'l Centru enguízase darréu l'encontu y espardimientu cultural, per aciu de conferencies, publicaciones, visites, desendolcu d'actividaes deportives, recreatives, formatives, entamu de certames artísticos y lliterarios, xuntances escéniques, y cuantes actividaes se calletren necesaries. Tamién se quier emburriar de contino l'intercambiu cultural de forma especial con Cataluña.El Centru Asturianu de Barcelona ta rexíu polo Estatutos y Reglamentos que los desenrollen. La Xunta Direutiva ye'l muérganu permanente de gobiernu, alministración y representación de l'Asamblea Xeneral y ta formáu por: Presidente, Vicepresidente, Secretariu, Tesoreru, Contador y los Delegaos de les estremaes Árees a atender. Los sos cargos nun son remuneraos y son escoyíos en procesu elleutoral cada cuatro años ente la masa social de la Entidá.Finánciase de mena autónoma principalmente al través de les aportaciones de los sos asociaos, les estremaes actividaes que desendolca y dalgunos fondos de calter público y/o privao.