El ciclu ‘La hora de los cuentos’ incorpora dende esti mes sesiones en llingua asturiana

L’actividá infantil "La hora de los cuentos" qu’entama’l Conceyu de Xixón nes biblioteques municipales incorpora dende marzu sesiones n’asturianu. Esti mes tán previstos cinco eventos pa los que ye necesario inscripción previa.

Pumarín-Xixón Sur, L’Arena, El Llano, El Coto y La Calzada son los llugares onde se va desendolcar esta actividá destinada a neños y neñes de 4 a 8 años gracies a la collaboración de la Oficina de Normalización Llingüística de Xixón. Pa participar nestes sesiones de baldre, que tienen llugar siempre a les 18 hores, ye necesaria una inscripción previa al ser el númberu de place llendáu. Pa ello namái fai falta tener la tarxeta ciudadana y facer la reserva nes Oficines d’Atención Ciudadana, nos caxeros de CaxAstur, na web del Conceyu de Xixón o pela aplicación pa móviles ‘igijón’. P’acceder a la sala ye necesario presentar el xustificante d’inscripción y nel casu de nun poder acudir, avisar con antelación. Tamién s’esixe aportar con tiempu a la sala, yá que nel momentu de que s’anicie’l cuentacuentos nun ta permitida la entrada de neños y neñes pa nun interrumpir al narrador.

La sesión que va inaugurar esta iniciativa va tener llugar esta tarde na biblioteca de L’Arena, pa continuar en marzu’l vienres (El Llano) y los díes 10 (Pumarín-Xixón Sur), 18 (El Coto) y 26 (La Calzada). Nos meses próximos éste son los cuentacuentos previstos: 6 d’abril (L’Arena), 10 d’abril (El Llano), 14 d’abril (Pumarín-Xixón Sur), 22 d’abril (El Coto), 30 d’abril (La Calzada), 4 de mayu (L’Arena), 8 de mayu (El Llano), 12 de mayu (Pumarín-Xixón Sur), 20 de mayu (El Coto) y 28 de mayu (La Calzada. De momento, El Polígono, Contrueces, El Natahoyo, Montiana, La Camocha y Roces, les otres places onde tien llugar esta yá veterana actividá infantil, nun van acoyer sesiones n’asturianu.           Fonte: Asturies.com

Cultura destina 20.000 euros pa la merca de llibros n'asturianu y fala pa biblioteques públiques

   La Conseyería d’Educación, Cultura y Deporte va destinar 20.000 euros pa incrementar los fondos bibliográficos n’asturianu y gallego-asturiano nes biblioteques públiques del país. Los conceyos tienen hasta’l día 5 pa solicitar l’ayuda, qu'obliga a mercar les obres en llibreríes del propiu municipiu.

   “Podrán alquirise obres lliteraries de cualquier xéneru espublizaes n’asturiano o gallego asturiano, incluyendo tamién aquelles obras billingües o trillingües que contemplen l’asturianu o gallego-asturiano n’igualdá de condiciones tipográfiques que les otres llingües”, espliquen dende la conseyería. A esta subvención pueden tener acceso aquellos conceyos que sían titulares de centros de llectura integraos na Rede de Biblioteques del Principáu d’Asturies.

   La cuantía pa cada solicitante –que recibirá un mínimu de 100 euros– va establecese d’alcuerdu con criterios poblacionales y los llibros van poder mercase hasta’l 20 d’avientu, cola obligación de que l’operación se faiga en llibreríes del propiu conceyu. El día caberu pa presentar tola documentación necesesaria ye’l vienres próximu.

Crítiques de N’Ast         L’Asociación Cultural N’Ast califica de “xirigoncia” la convocatoria d’esta subvención. “Munchos conceyos nos que nun hai llibrería –Bimenes, Cabranes, Samartín d’Ozcos, Pezós, Sariegu, Yernes y Tameza…– nun tendríen opción nenguna a recibir la subvención nin, siempres según los dimpuesto pola Conseyería Cultura, los sos vecinos y vecines a esfrutar, de baldre, de la llectura d’obres n’asturianu nes sos respeutives biblioteques o centros de llectura”, apunten dende esti coleutivu, qu’empobina a la conseyera Ana González a camudar les bases “pa que tola ciudadanía pueda beneficiase d’estes ayudes”.               Fonte: asturies.com

Adxuntu	Tamañu
Convocatoria de subvención pa la merca de llibros n'asturianu y gallego-asturiano pa biblioteques públiques.pdf	888.99 KB