VIII Amuesa d'Obres d'Arte pola Oficialidá en L.lena

Fasta'l martes 15 de marzu, la sala d'esposiciones Celso Granda, na Casa la Cultura de La Pola (L.lena) va desendolcase la VIII Amuesa d'Obres d'Arte pola Oficialidá.

La VIII Amuesa d'Obres d'Arte pola Oficialidá ta formada poles creaciones artístiques donaes por autores asturianos pa sofitar les campañes del Conceyu Abiertu pola Oficialidá, plataforma cívica integrada por más de trescientes asociaciones culturales, vecinales, folclóriques o grupos de música, y que tien como oxetivu únicu algamar la oficialidá de la llingua asturiana y del gallego-asturianu n'Asturies.

Na amuesa puen atopase artistes de les cuatro últimes xeneraciones. Dende Ánxel Nava y veteranos autores de la talla y el prestixu de Bernardo Sanjurjo o Fernando Alba a otros muncho más mozos que formen parte del arte emerxente actual. Fasta'l momentu la esposición tien visitao yá conceyos como Piloña, Cangas del Narcea, Colunga, Nava.

Fonte: RTPA-Estaya d’asturianu

VIII Amuesa d'Obres d'Arte pola Oficialidá en Piloña

L’Infiestu va acoyer la VIII Amuesa d’Obres d’Arte pola Oficialidá que reúne creaciones d’artistes donaes pa vindicar los drechos llingüísticos de los asturianos. La esposición va inaugurase’l xueves y va tar abierta’l públicu hasta’l 24 d’esti mes. A les 13 hores ta previsto qu’entame l’actu inaugural na Casa la Cultura de L’Infiestu cola presencia de Camilo Montes Díaz, alcalde del conceyu, y dellos artistes participantes na esposición. La VIII Amuesa d’Obres d’Arte pola Oficialidá ye un interesante percorríu pel arte contemporaneu producíu n'Asturies, qu'abarca tanto escultura como pintura y fotografía, con gran variedá de téuniques y soportes. Nella puen alcontrase artistes de les cuatro xeneraciones últimes: dende veteranos autores de la talla y el prestixu de Bernardo Sanjurjo o Fernando Alba, a otros muncho más mozos que formen parte del arte emerxente actual.

Les obres que componen esta esposición foron donaes polos artistes participantes p'apoyar les campañes del Conceyu Abiertu pola Oficialidá, plataforma cívica integrada por más de trescientes asociaciones culturales, vecinales, folclóriques, grupos de música, artistes de toa triba, deportistes, sindicatos, partíos políticos y persones particulares. L’oxetivu únicu d’esti coleutivu ye l’algamar la oficialidá de la llingua asturiana y del gallego-asturianu nel Estatutu d'Autonomía d'Asturies.

Fonte: Asturies.com