Valdesoto vive les décimes Xornaes de Mazcaraes d'Iviernu

Participen diez grupos de mazcaritos d'Asturies, Cantabria, Galicia y Portugal

  Les Xornaes de Mazcaraes d'Iviernu qu'entama l'Asociación pa la Recuperación de Los Sidros y Les Comedies 'El Cencerru' vive la so décima edición con un programa d'actividaes que s'anició'l miércoles cola inauguración de la esposición 'Vuelven los Aguilandeiros'. Ésta pue visitase hasta'l domingu nel Centru Polivalente de Valdesoto n'horariu de 17 a 21 hores, güei y mañana, y de 12 a 18 hores, el domingu, y ta formada por semeyes feches por Mara Herrero de les mazcaraes de San Xuan de Villapañada, Tormaleo y El Valledor, acompañaes por testos fechos por Xosé Antón Fernández 'Ambás' y Ramses Ilesies.

 Esta tarde van celebrase les tradicionales charres nesi mesmu llugar, que nesta ocasión tan especial van protagonizar Enrique Escudero, xefe de serviciu de Patrimoniu Cultural de la Conseyería d'Educación y Cultura, cola conferencia 'Sidros y Comedies: Una mazcarada de Bien d'Interés Cultural'; Óscar González, que va falar 'Sobre la vistimenta del Sidru'; y Carla Menéndez 'Perucho', que va afondar sobre 'Los Sidros na escuela. Un Antroxu diferente'. L'actu, que va presentar el periodista y fotógrafu Iván García Fernández 'Esguil', va zarrase cola proyeición del documental 'Aguilandeiros de San Xuan. Recuperación d'una mazcarada del Conceyu Grau', una cinta de Producciones Estoupo con Ambás y el Grupu Xeitu.

Desfiles 

 Mañana, a les 17.30 hores, va entamase un desfile peles cais de La Pola Siero, mentes que'l domingu va desendolcase'l tradicional pel Valdesoto, con salida al meudía del campu de fútbol y final nel Campu la Ilesia. Nesta ocasión, amás de los propios Sidros y La Comedia, a los qu'hai que sumar los Escolinos de Faes, convidóse a otres nueve mazcaraes: O Chocalheiro de Bemposta, O Chocalheiro de Vale do Porco, Careto de Valverde, Farandula de To y Vhelos de Bruçó, de la zona portuguesa de Mogadouro; Os Caretos de Parada, del territoriu cercanu a Bragança tamién de Trás-os-Montes; Os Fullons y Boteiros de Viana do Bolo, y Madams y Galans de Cobres (Galicia); Zamarrones de Piasca (Cantabria); y Guilandeiros de Tinéu, que van pidir l'aguilandu poles cases de la parroquia.
Fonte: asturies.com

Esti domingu sedrá otra vuelta de Sidros y Comedies en Valdesoto

Cultura, tradición y costumes asturianes de siempres

  Esti domingu 10 de xineru, como tolos años, l’Asociación pa la Recuperación de Los Sidros y Les Comedies ‘El Cencerru’ convoca los Domingos de Sidros y Comedies, pa representar les tradicionales comedies en Valdesoto, dende les 12,30 hores.

  La tradición recuperada hai unos años por esta asociación entama tolos domingos primeros depués de los Reis con un desfile encabezáu polos sidros, qu’anuncien la llegada de la comedia. El Campu la Ilesia va ser alredor de les 12.30 hores el llugar de la representación primera, polos neños y neñes, de la comedia ‘Vivamos en paz’, escrita por Pergentino Martínez. Y tres d’esta actuacion, los mayores van interpretar ‘Valdesoto ta de comedia’, de José Ramón Oliva.

  Esti añu, pa promocionar l'eventu, l’Asociación El Cencerru ellaboró un vídiu promocional que pue vese na plataforma Vimeo.                Fonte: asturnews.com 

L'antroxu, tiempu de mázcares

Na semeya Los Sidros mazcarada de Valdesoto

 ¿A quién nun-y presta amarutase? L’Antroxu son feches pa ello; pa divertise y comer dulces típicos d’esti tiempu. Pero, ¿foi siempre l’Antroxu tal y como lu conocemos agora? Non, anguaño la celebración ta lloñe de la tradición asturiana.

¿Cuándo principia l’Antroxu?   Cuando llega’l solsticiu d’iviernu (alredor del 21 d’avientu), momentu nel que la nueche ye más llarga y el día, más curtiu. La fecha tradicional de celebración d’esti solsticiu ye’l 25 d’avientu por mor de los calendarios antiguos.

Pero, ¿nun cae siempre pa febreru o marzu?   Hai que diferenciar ente l’Antroxu tradicional y el modernu. Ésti últimu, por mor del cristianismu, arrequéxase a los díes previos al Miércoles de Ceniza, xornada que marca l’aniciu de la Cuaresma, periodu de 40 díes de reflexón enantes de la Selmana Santa.

¿Y cómo se celebraba l’Antroxu?    El solsticiu yera’l momentu de mayor puxu de les tiniebles y la xente venceyábalo a la llegada de seres del otru mundu, demonios y difuntos, polo que s’amazcaritaben y baillaben p’atrayer, de manera positiva, la so maxa.

¿De qué se disfrazaben?    La xente antroxábase de personaxes que representen la lluz –nomaos tamién los guapos– y la escuridá. Salíen pidiendo l’aguilandu per toles cases del pueblu, onde la xente esperaba a los mozos con comida, dulces y oruxu. Les feches más habituales pa celebrar les nomaes mazcaraes d’iviernu yeren díes señalaos, como Nuechebona, Navidá, Añu Nuevu o Reis, anque éstes allargábanse per tola estación, inclusive más alla del Miércoles de Ceniza.

¿Tovía hai mazcaraes tradicionales?     Sí, hai dellos pueblos que caltienen la tradición. Asina, atopamos Los Sidros y La Comedia (Valdesoto, Siero), El Guirria (San Xuan de Beleño, Ponga), Os Reises del Valledor (Ayande), Os Reises de Tormaleo (Ibias), Os Aguilandeiros de Xedré (Cangas del Narcea) y Los Aguilanderos de La Puela (Ayande). Nel pasáu hebo munches más mazcaraes.

¿Por qué se perdieron?     Al cristianismu nunca-y prestaron esti tipu de celebraciones paganes, pero al nun ser quien a desaniciales lo que fixo foi adaptales. Col tiempu, l’Antroxu redúxose a los díes previos a la Cuaresma, periodu de reflexón nel que nun se podía comer carne, polo que la Ilesia daba permisu los díes previos al Miércoles de Ceniza pa la fiesta y los escesos. La prohibición de la celebración del Antroxu por parte de la dictadura franquista llevó a la práutica muerte d’esta folixa, que se recuperó tres la llegada de la Democracia, anque ensin tener en cuenta la tradición.

Entós, ¿cómo se celebra anguaño l’Antroxu?  Los Conceyos principiaron a organizar la fiesta, pero tomando como referentes carnavales como los de Rio de Janeiro, en Brasil, o Tenerife. Ello llevó a formar ente la xente una idea equivocada de lo que ye l’Antroxu qu’acabo cuayando ente la sociedá. Sicasí, tovía hai coleutivos de xente que puxen por recuperar l’Antroxu tradicional asturianu.

¿Cuándo da entamu?     L’Antroxu asturianu modernu principia con Les Comadres, la tarde-nueche del xueves enantes del Miércoles de Ceniza, una xornada de reunión de muyeres. A esta celebración siguen-y cinco díes de folixa nel que destaquen el Domingu’l Gordu, el Llunes d’Antroxu y el Martes d’Antroxu.

¿Qué ye lo que se come estos díes?   Carne, principalemente de gochu, y dulces típicos d’estes feches, como los frixuelos y les picatostes.

¿Cómo puedo festexalo yo?     Busca un disfraz prestosu y sal a la cai a disfrutar xunto colos tos amigos y familiares, pero nun escaezas que, con casi toda seguridá, nel to pueblu hay o hebo una mazcarada tradicional. Infórmate y puxa por ella.        Fonte:  Asturies.com 

La mazcarada de Valdesoto celebra'l "Domingu de Sidros y Comedies"

Domingo de Sidros y Comedies,   Valdesoto 12 xineru2014 na Plaza la Iglesia

    Valdesoto cuenta les hores pa disfrutar de la so mazcarada d’iviernu. El ‘Domingu de Sidros y Comedies’ va atrayer a xente de toda Asturies y de fuera de les nueses llendes a la población sierense pa presenciar esta tradición.

    L’ Asociación pola Recuperación de los Sidros y les Comedies ‘El Cencerru’ de Valdesoto tien remataes toles actividaes pa esta cita, que va principiar a les 12.45 hores nel campu la Ilesia tres la salida de misa. Vecinos y visitantes van poder disfrutar de los sidros y de les comedies, cola representación de ‘Valdesoto XX OO 2024’, de Pergentino Martínez, por parte de los escolinos de Faes, y de ‘Si nun quies taza, taza y comedia’, de José Ramón Oliva, a cargu de la comedia d’El Cencerru

    La de Valdesoto ye una de les principales mazcaraes d’iviernu, tradición que nos años últimos vien recuperándose en delles poblaciones asturianes. Asina, en Añu Nuevu el Guirria tornó a les cais de San Xuan y, el 4 de xineru, Os Reises de Tormaleo percorrieron la parroquia asitiada n’Ibias –asina como los pueblos de la vecina Taladriz– pa pidir l’aguilando, al igual qu’Os Reises del Valledor nesta zona d’Ayande.            Fonte:   Asturies.com