La Llaboral acueye'l preestrenu de 'Cantábrico' n'Asturies

El documental rodáu nel cordal cantábricu va proyeutase en cines dende'l 31 de marzu.

L'osu pardu ye'l protagonista principal d'esta cinta dirixida por Joaquín Gutiérrez Acha, que tuvo grabando nes viesques y montes del territoriu cantábricu mientres dos años pa ufrinos espectaculares imáxenes sobre la fauna y flora del llugar, ente la que destaca la d'una manada de llobos entamando una cacería, precisamente n'Asturies. Amás del pol espectacular escenariu natural, 'Cantábrico' destaca pola calidá d'imaxe y pol emplegu de medios áreos, como helicópteros o drones.

Gutiérrez Acha tuvo presente  nel Teatru de la Llaboral pa presentar esti trabayu, que va tener promoción internacional, xunto col productor José María Morales. La proyeición entamó a les 20 hores y el preciu de la entrada foi de 4 euros.

Fonte: Asturies.com

La rede y los peligros del mundu dixital, temática del V Día de les Ciencies Asturianes

Cartelu de la Unesco pa la celebración d'esti añu del Día Mundial de la Ciencia pa la Paz y el Desenvolvimientu

     Más d’ochocientos escolinos de Primaria y Secundaria van participar esti vienres nel V Día de les Ciencies Asturianes, actividá entamada por Educación que caltién dende la so nacencia l’usu del asturianu nella. La temática d’esti añu ye la rede y los peligros del mundu dixital.

    Esta celebración tien el so orixe nel Día Mundial de la Ciencia pa la Paz y el Desenvolvimientu, establecíu nel 2001 pola Unesco “pa fomentar el saber científicu y les sos aplicaciones concretes, y favorecer que los seres humanos puedan tener vides más plenes, dignes y llibres”. La xornada concreta ye’l 10 de payares, siendo esti añu’l tema a tocar ‘Educación científica de calidá: Asegurando un futuru sostenible pa toos’, fecha que’l Gobiernu aprovecha dende hai cinco años pa entamar el Día de les Ciencies Asturianes nel ámbitu escolar nel mes de payares.

    Asina, más d’ochocientos escolinos de 23 centros educativos de Primaria y Secundaria van participar mañana, a les 11 hores, nel xixonés Teatru de la Llaboral nun alcuentru con miembros de los colexos oficiales d'inxenieros n'informática d'Asturies, que van presentar la tema ‘El viaxe de les palabres pela rede. Los peligros del mundu dixital’. “L'oxetivu ye tresmitir a la xente mozo que la ciencia ye un patrimoniu común en que la so práctica y en que'l so progresu tien de participar la sociedá al completu, reconociendo y incorporando los llogros de la cultura científica y la evolución tecnolóxica y contribuyendo de manera crítica y xenerosa al so desenvolvimientu”, apunten dende la Conseyería d’Educación, Cultura y Deporte, que tien preparao pa esta xornada un material didáuticu específicu n’asturianu y gallego-asturiano “nel que se planteguen actividaes y esperiencies pa fomentar una convivencia dixital de calidá y concenciar sobre les consecuencies personales y socioafectives que puede provocar el mal usu de les Tecnoloxíes de la Información y la Comunicación”. Ésti ta disponible na web Educastur y nesta información na estaya de documentos axuntos.              Fonte: asturies.com

Adxuntu	Tamañu
Unidá didáutica Primaria. El viaxe de les palabres pela rede (llingua asturiana).pdf	4.34 MB
Unidá didáutica Primaria. El viaxe das palabras pola rede (gallego-asturiano).pdf	3.9 MB
Unidá didáutica Secundaria. Los peligros del mundu dixital (llingua asturiana).pdf	1.98 MB
Unidá didáutica Secundaria. Os peligros del mundo dixital (gallego-asturiano).pdf	2 MB

Programación especial na RPA: VII Premiu al Meyor Cantar

El Premiu al Meyor Cantar llega con novedaes y programación especial na RPA

   Por cuenta de la Gala del Premiu al Meyor Cantar, que va desenvolvese esti vienres 1 de marzu nel Teatru de La Llaboral de Xixón, Radio del Principáu d’Asturies (RPA) va emitir una programación especial. Asina, van producise dos programes específicos dedicaos a esti premiu, el primeru d’ellos na madrugada del miércoles al vienres, de 00:00 a 01:00 hores, y el segundu na madrugada del xueves al vienres nel mesmu horariu.

   Na primer entrega va falase de los motivos polos que se creó esti gallardón y de la so finalidá, asina como de la dinámica y funcionamientu del mesmu; va facese tamién un repasu de los ganadores de les seis ediciones anteriores y la última parte va dedicase a comentar el Festival de la Canción en Llingües Minoritaries d’Europa Liet International, al que va como representate oficial de la llingua asturiana’l grupu o artista que se fai con esti premiu.

   El segundu programa va ocupar el tiempu en falar colos cinco finalistes del presente añu: Aire, ACD, Taranus, Fala Non Caduca y La Tarrancha, y sentir y comentar con ellos el tema col que participen. La dirección y presentación d’estos espacios especiales va tar al cargu de Xune Elipe, que dirixó a lo llargo de seis años na mesma emisora’l programa Rockmería. Nellos va presentase tamién la sintonía o banda sonora orixinal compuesta a costafecha pa esta séptima edición del Premiu al Meyor Cantar pol músicu y productor corverán Sergio Rodríguez, siendo precisamente ésta una de les novedaes que tien el premiu na edición d’anguaño.

   La Gala d’Entrega del Premiu al Meyor Cantar va desarrollase’l vienres 1 de marzu, a partir de les 20:30 hores, nel Teatru de La Llaboral de Xixón, con entrada llibre. Na mesma, presentada por Sonia Fidalgo y Naciu Varillas, van participar los cinco finalistes cola interpretación en directo del tema nomináu y va incluir tamién l’actuación del grupu ganador del añu pasáu, Asturiana Minning Company.

   Como novedá va regalase un discu esclusivu, coles canciones ganadores de les ediciones anteriores y les finalistes d’esti añu, amás de la sintonía del VII Premiu al Meyor Cantar; el cedé ye una producción especial que namás va poder consiguise asistiendo a esti actu nel que va sabese cuála foi la meyor composición musical n’asturianu del añu 2012.

   Más información:  Finalistes del Premiu al Meyor Cantar.

   Fonte:  Asturnews.

El Teatru de la Llaboral va repetir como sede pal VII Premiu al Meyor Cantar

   El Teatru de la Llaboral va repetir como sede de la gala del Premiu al Meyor Cantar del añu 2012

   Yá se conocen les cinco formaciones que van lluchar el 1 de marzu pol VII Premiu al Meyor Cantar nel Teatru de la Llaboral, que repite como sede de la gala. Éstes son ACD, Aire, Fala Non Caduca, La Tarrancha y Taranus.

   Once yeren les bandes qu’aspiraben a entrar na final d’esti gallardón –La Tarrancha, pese a que nes primeres informaciones nun taba presente, tamién concursó– que cuenta cola participación nel Liet International 2013, que va celebrase esta seronda en Còrsica, como recompensa. Esta edición del Premiu al Meyor Cantar tien la particularidá de que los cinco finalistes avéranse más al rock qu’a la música tradicional, cola esceición d’Aire, grupu formáu Mapi Quintana, Jacobo de Miguel, Xuan Nel Expósito, Elías García y Fernando Arias que nació l’añu pasáu col oxetivu de dedicar un trabayu al acordión diatónicu o de botones, con gran presencia nos nuesos sones, pero poques vegaes protagonista discográficu. Esti conxuntu d’escelentes músicos va participar col cantar ‘Enzo’ (lletra de Ruma Barbero), un homenaxe al xenial Enzo Ferrero, consideráu’l meyor estranxeru que pasara poles files del Sporting nos sos casi 108 años de vida y que tien l’honor de formar parte del once históricu de Boca Juniors y del conxuntu xixonés que s’oficializó nel centenariu de los dos equipos.

    Competirá con Aire sobre les tables de la llaboral Adolfo Camilo Díaz baxo’l proyeutu ACD que surdió nel 2010 col oxetivu de llevar a la llingua asturiana dalgunos de los clásicos del rock. L’añu pasáu, Camilo Díaz editó un discu con cuatro cantares propios, del que sal ‘La güela’, candidatu al meyor tema del 2012. Ye tamién noveda na gala la presencia de Taranus, banda de folk-metal que presenta a concursu ‘Ensin ti’ (lletra de Diego Díaz Martino’, una balada a trés voces.

   Completen el cartelu de la final al Premiu al Meyor Cantar dos bandes que repiten participación. La Tarrancha, finalista nel 2007 col cantar ‘Exit-encia’, participa con ‘Qué faer!’ (lletra de Delfín Valdés) y Fala Non Caduca, que compitió nel 2011 con ‘Sele Sound System’, nesta ocasión va facelo con ‘Escoyer el camín’ (lletra d’Adrián González Pérez’). Como ye vezu, tamién va actuar nel teatru xixonés el grupu ganador de la edición anterior, Asturiana Mining Company (‘Si nun conoces Vaḷḷouta’), que va interpretar dellos temes mientres el xuráu toma la decisión de quién ye merecedor de viaxar a Còrsica a representar al idioma del país nel festival européu de la canción en llingües minoritaries.

   La gala del VII Premiu al Meyor Cantar, que va ser televisada en direuto pela TPA, va principiar el 1 de marzu a les 20.30 hores. La entrada al espectáculu va ser de baldre.

   Fonte: Asturies.com