"En trés décades consiguimos crear un corpus lliterariu al altor de cualquier lliteratura moderna", destaca Alonso

Na Semeya los premiaos, xunto a les autoridaes y los miembros de los xuraos de los premios.

  El paraninfu de la Universidá d'Uviéu acoyó esti xueves la gala d'entrega de los Premios Lliterarios, la gran fiesta de les nueses lletres. Genaro Alonso, conseyeru d'Educación y Cultura, destacó que "en poco más de trés décades consiguimos crear un corpus lliterariu propiu y cultu al altor de cualquier lliteratura moderna".

  El rector de la institución universitaria, Santiago García Granda, encargóse d'abrir l'actu, que tuvo presidíu tamién, xunto con Alonso, por Cristina Valdés, direutora xeneral d'Universidaes y Investigación, y Fernando Padilla, direutor xeneral de Planificación Llingüística y Normalización. Na so intervención, el responsable d'Educación y Cultura recordó l'aniciu d'estos gallardones, col Primer Concursu de Narraciones Curties Diputación d’Asturies, nel 1980, y emponderó la evolución de les nueses lletres nesti tiempu.

  "Ye llargu'l camín andáu. Ye muncho lo escrito y munchos los finxos algamos", siguó Alonso, que calificó la gala de "actu d'agradecimientu y reconocimientu" a los escritores "testigos una vegada más de la vitalidá y escelencia" de la lliteratura asturiana. Pa finar, citó a los cinco ganadores de los gallardones d'esti añu, "verdaderu valedores d'esti gran árbol de les lletres asturianes, corresponsables a la fin de la so evolución y ésitu".

  Los premiaos del 2016 son Xulio Arbésú, con 'El valor del rei' (XXXVII Premiu Xosefa Xovellanos de novela); Ángeles Carbajal, con 'Un vasu d'agua' (XXII Premiu Xuan María Acebal de poesía); Vanessa Gutiérrez, con 'El paisaxe nuestru' (XXII Premiu Máximo Fuertes Acevedo d’ensayu); Adolfo Camilo Díaz, con 'La mar' (IX Premiu María Xosefa Canellada de lliteratura infantil y xuvenil): y Luis Navazo, con 'Indianu' (VIII Premiu Alfonso Iglesias de cómic con ‘Indianu’). Toos ellos recibieron un 'Árbol de les lletres', una pieza artística esclusiva de l'artista Charo Cimas.

  La nota musical del actu púnxola Tuenda, el tríu formau por por Xosé Antón Fernández 'Ambás', Elías García y Pepín de Muñalén, qu'interpretó delles pieces.    Fonte: asturies.com

García Granda gana les eleiciones al Rectoráu de la Universidá d'Uviéu

Santiago García Granda nuevu rector

  El votu de los estudiantes resultó clave na segunda vuelta de les eleiciones al Rectoráu de la Universidá d'Uviéu, que ganó Santiago García Granda. El caderalgu de Química Física comprometiérase a dotar de mayor entidá a los estudios d'asturianu y a crear una Oficina de Normalización Llingüística na institución, ente otres munches midíes.

  Presentábase igualada esta segunda vuelta tres les eleiciones de la selmana anterior, que ganara en votos García Granda pero que col votu ponderáu diera'l trunfu a José Muñiz: 32,97 por cientu por 34 por cientu. El martes, el tercer de los cuatro candidatos, Pedro Sánchez Lazo, daba'l so sofitu al caderalgu de Química Física tres adquirir ésti ciertos compromisos, lo que paecía da-y cierta ventaya p'ayeri, anque finalmente lo que decantaría estes eleiciones foron los votos de los estudiantes.

  El sofitu a la gran mayoría de los pidimientos de les Asamblees Abiertes de la Universidá d'Uviéu y el Conseyu d'Estudiantes de la Universidá d'Uviéu, que llegaron tres una consulta al estudiantáu al traviés del procesu 'Garramos la pallabra', y la so predisposición al alderique colos representantes d'esti coleutivu pesaron na decisión de los alumnos que, pese a nun tener el mayor peso a la hora de ponderar el votu, sí qu'influyó sobre manera. García Granda algamó 2.533 votos polos 1.484 que'l so rival ente los estudiantes.

  En total, el yá rector sumó un votu ponderáu del 51,17 por cientu, un total de 3.665 votos, mentes que Muñiz algamó un 48,77 por cientu, con 2.687 apoyos. Mentes, 231 persones votaron en blanco.

  Por sectores, García Granda ganó ente el personal docente y investigador (PDI) non permanente, amás de colos estudiantes, y perdió ente'l PDI permanente y el personal d'alministración y servicios.

Compromisos pa col asturianu     El rector nuevu, que sustitúi a Vicente Gotor, destacó na campaña eleutoral por emplegar l'asturianu xunto al castellanu, llegando inclusive a llanzar una serie de compromisos pa col idioma nel casu de resultar escoyíu. Ente ellos taba la so intención de dotar mayor entidá a los estudios de llingua asturiana, cola creación d'una mención y un posible afondamientu mayor si hubiere un "máximu consensu de la comunidá universitaria".

  Tamién anunciaba l'entamu d'una Oficina de Normalización Llingüística "con personal propio y motivao" col finxu de "promover l'usu del asturianu y resolver duldes n'actuaciones concretes". "La universidá tien d’amosar la so imaxe corporativa en llingua asturiana con total normalidá y esparder l’usu de la llingua na cartelería o la señalética. Ye lo que dicta la Llei d’Usu en vigor y la universidá tien qu’acatalo y amosalo con arguyu", foi otra de les sos afirmaciones qu'apecíen nun documentu entituláu 'Llingua y universidá' que pue consultar completu calcando equí.

  D'igual forma, nel so programa proponía estudiar la implantación a mediu plazu de titulaciones como Comunicación y Traducción, estratéxiques pal idioma, "atendiendo a demandes y necesidaes emerxentes".                                                        Fonte: asturies.com

El precandidatu a rector García Granda propón mayor entidá pa los estudios d'asturianu

Santiago García Granda

  Sería la creación d'una mención y un posible afondamientu mayor si hubiere un "máximu consensu de la comunidá universitaria", apunta'l caderalgu del departamentu de Quimica Física y Analítica de la Universidá d'Uviéu. Tamién anuncia, nel casu de salir escoyíu, la creación d'una Oficina de Normalización Llingüística.

  Nun documentu entituláu "Llingua y universidá" —que se pue lleer completu na nuesa seición 'Opinión'—, Santiago García Granda, que compite pol rectoráu con Agustín Costa, José Muñiz y Pedro Sánchez Lazo, amuesa'l so compromisu pa col asturianu. Nel so enfotu por consiguir "una meyor posición nel contestu nacional ya internacional", propón la xeneralización del usu del inglés y la potenciación del "usu d'otros idiomas estratéxicos", ensin escaecer lo propo.

  Poro, "l’asturianu tien que xugar un papel. Xustamente’l papel que la Llei-y reserva y que nesti momentu nun apaez desenvueltu como debiere", afirma García Granda, qu'anuncia una serie de midíes nel casu de ganar les eleiciones. Una d'elles ye otorgar una mayor entidá académica a la llingua asturiana na Facultá de Filosofía y Lletres —ondeanguaño esiste un minor— al traviés d'una mención.

  "La formación y la investigación académica en llingua asturiana tampoco nun van tar escaecíes del programa d'esta candidatura porque nelli va contemplase la meyora del plan d'estudios del actual 'minor' hasta convertilos nuna mención, estudiando la posibilidá d'afondar na so entidá académica siempre col másimu consensu de la comunidá universitaria", asegura'l candidatu, qu'añade que "va afitase una normativa eficaz que garantice, dende la d'anguaño, la defensa de Tesis Doctorales, TFG y TFM en llingua asturiana".

L'usu del idioma na imaxe corporativa           Otro de los puntos destacaos del so compromisu ye la creación, "con personal propio y motivao', d'una Oficina de Normalización Llingüística "pa promover l'usu del asturianu y resolver duldes n'actuaciones concretes". Tamién ye de destacar l'apuesta por utilizar l'idioma na imaxe corporativa de la institución: "La universidá tien d’amosar la so imaxe corporativa en llingua asturiana con total normalidá y esparder l’usu de la llingua na cartelería o la señalética. Ye lo que dicta la Llei d’Usu en vigor y la universidá tien qu’acatalo y amosalo con arguyu".

  L'emplegu del asturianu na documentación y convocatories o la defensa de la especialidá docente de Llingua Asturiana y Gallego-asturiano son otres cuestiones a les que se compromete García Granda. "Ye'l nuesu determín que la llingua y la cultura asturiano nun s'escaezan d'un debate onde tien de vese en comuña progresu ya inclusión, afitando’l calter de la Universidá d’Uviéu como institución científica y pública al serviciu del progresu d’Asturies, garantizando’l compromisu de la universidá cola nuesa comunidá dende un puntu de vista social, cultural, económicu y llingüísticu, desendolcando la vertiente social de la Universidá d'Uviéu", fina'l documentu.                                                        Fonte: asturies.com