Col cómic de nome 'El viaxe a la lluz'
Na semeya Ruma Barbero
El vienres fallóse'l primer de los Premios Lliterarios 2015, qu'entreguen la Conseyería d'Educación y Cultura, el VI Premiu Alfonso Iglesias de cómic, con una recompensa de 3.000 euros. Ésti foi pa Rumualdo Antón Barbero de Diego, más conocíu como Ruma Barbero, pola bora 'El viaxe a la lluz', que presentó baxo'l nomatu de 'Charles Atlas'.
El xuráu del gallardón tuvo conformáu pol dibuxante Enrique Carballeira, ganador de la edición pasada; María Concepción Prieto, profesora y especialista en llingua asturiana; el dibuxante Berto Álvarez Peña; y los filólogos Luis Casteleiro y Xosé Miguel Suárez Fernández 'Tapia'. “La orixinalidá y complexidá de la historia, l’interés temáticu y l’anovación de les soluciones gráfiques y cromátiques” llevólos a escoyer por unanimidá la obra de Barbero como ganadora.
El dibuxante y músicu consigue asina'l so segundu Alfonso Iglesias, tres algamar la so primera edición, correspondiente al añu 2009, por 'Manzajú'. Fonte: asturies.com
