"Una lliteratura importante tien que tener producción propia y emprestada", diz Álvarez

Na semeya, García, Suárez García, Gutiérrez y Álvarez.

  Francisco 'Paco' Álvarez participó nel alderique 'Lliteratura asturiana y traducción' na carpa 3 de la 'Semana Negra' xunto a Antón García y Pablo Suárez García.

  Los trés valoraron énte un públicu qu'enllenó'l llugar la importancia de trayer obres d'otres lliteratures al nuesu idioma, destacando sobre manera lo que supón pal idioma la torna de los grandes clásicos de la lliteratura universal. Asina, tres ser introducíu por Vanessa Gutiérrez, que s'encargó de moderar l'alderique, Álvarez señaló que "una lliteratura importante amás de producción propia tien que tenela emprestada".

  Suárez García, pela so parte, propunxo la ellaboración d'un llistáu coles cien grandes obres de la lliteratura universa más destacaes pa dir tornándoles al asturianu y albidró un mayor enfotu de l'Academia de la Llingua Asturiana nel llabor traductor. Asina, destacó un artículu de Cristina Valdés espublizáu recién y comentó la posibilidá d'enfrentase a tornes "como na Edá Media, con dellos traductores faciendo una parte de la obra y un coordinador".

  "Si l'asturianu tien un futuru, la traducción va garrar importancia", afirmó García, que nun se mostró partidariu de facer tornes d'obres castellanes al asturianu. "Paezme inútil, un esfuerciu que nun paga la pena facer, salvo delles obres mui simbóliques, yá qu'un llector asturianu pue averase a elles en castellanu", apuntó.                                Fonte: asturies.com

Paco Álvarez recibe'l premiu del XIX Concursu de Cuentos pola Oficialidá

Cartelu de la gala de la entrega del XIX Concursu de cuentos pola oficialida del asturianu 

  

  Nel eventu va actuar Carlos Alba 'Cellero'.

  El El parque públicu de Rozaes va acoyer l'actu d'entrega de premios del XIX Concursu de Cuentos pola Oficialidá del Asturianu de magar les 19.30 hores. El ganador, Francisco 'Paco' Álvarez, va recibir la so recompensa de 600 euros por ganar el certame y va lleer el so testu ganador, 'El fotógrafu de la lluna'.

  Pela so parte, Montserrat Garnacho, segundu premiu con 'Perda', y Laura Marcos, terceru con 'Rexicidiu', lleven 450 y 300 euros, de manera respeutiva. Tres l'actu, el monologuista Cellero va representar col so personaxe Sindo 'Tengo casería...'.

  En casu de mal tiempu, l'actividá treslladaráse al Centru Social José Emilio González Aller, asitiáu en Martimporra.                                                                                Fonte: asturies.com

Paco Álvarez lleva'l XIX Concursu de Cuentos pola Oficialidá del Asturianu

Convócalu'l Conceyu de Bimenes

El periodista xixonés Francisco 'Paco' Álvarez

  'El fotógrafu de la lluna', del periodista xixonés Francisco 'Paco' Álvarez, resultó la obra vencedora del XIX Concursu de Cuentos pola Oficialidá del Asturianu qu'entama Bimenes. En segunda posición finó la mierense Montserrat Garnacho con 'Perda', mentes que'l tercer premiu foi pa Laura Marcos, tamién de Mieres. Los trés van llevar una recompensa de 600, 450 y 300 euros, de manera respeutiva.

  La entrega de los premios va celebrase'l vienres 8 de xunetu, de magar les 19.30 hores. Si’l tiempu lo permite fadráse al aire llibre, nel parque públicu de Rozaes y tres l’actu protocolariu, y la llectura del cuentu ganador na voz del so autor, va contar cola actuación del monologuista Carlos Alba 'Cellero', col so personaxe Sindo representando “Tengo casería…”.

  El xuráu d'esta edición tuvo compuestu polos escritores Xulio Vixil Castañón, Pablo Rodríguez Alonso y Ana Esther Martínez Sierra, ganadora del añu pasáu, amás de pol alcalde de Bimenes, Aitor García Corte, y el téunicu responsable de la Estaya de Cultura, Daniel Cueli, que fixeren les funciones de presidente y secretariu, de manera respeutiva.

Presentación de 'Lluvia d'agostu' n'Uviéu       Álvarez va tar güei presente n'Uviéu pa presentar nel Llar La Llegra la so obra 'Lluvia d'Agostu', XXXVI Premiu Xosefa Xovellanos de novela. Va ser a les 19.30 hores.                                                               Fonte: asturies.com