Aragón tendrá direición xeneral de Política Llingüística

La Chunta Aragonesista (CHA) encargaráse de xestionar esti área.

El cambéu nel Gobiernu d'Aragón, col socialista Javier Lambán como presidente gracies al apoyu de Podemos, CHA y Izquierda Unida, llevaría a la creación per primer vegada d'una direición xeneral de Política Llingüística, según informa'l diariu 'Heraldo'.

La CHA, única formación qu'entra nel Executivu del PSOE al llevar Vertebración del Territorio, Movilidad y Vivienda, sería responsable tamién de la direición de Política Llingüística.

Fonte: Asturies.com

CHA denuncia en Bruxelles l'abandonu del aragonés y del catalán

Representantes de Chunta Aragonesista (CHA) reuniéronse en Bruxelles con miembros del gabinete del comisariu de Multillingüismu, Leonard Orban, y col eurodiputáu d’Eusko Alkartasuna, pa denunciar "l’abandonu" del aragonés y del catalán por parte del Gobiernu d'Aragón.

El portavoz de CHA algamó’l "firme sofitu de les instituciones europees" na defensa de la diversidá llingüística. Amás, l’Executivu comunitariu desplicó a los representantes de la Chunta qu’esiste la posibilidá d’algamar financiación europea pa la proteición de llingües minoritaries.

Alcordóse que'l Gobiernu d’Aragón ye l’únicu responsable del abandonu del aragonés y del catalán por nun tener remitío a les Cortes el proyeutu de llei de llingües minoritaries, pesia llevar prometiéndolo 10 años y qu’Aragón "ye ún de los pocos exemplos nos qu’un Gobiernu autonómicu tá faciendo política a la escontra de la so propia llingua".